សម្ដេច ហ៊ុន សែន «បើគ្មានសន្តិភាព គឺគ្មានទេលទ្ធិប្រជាធិបតេយ្យ និងសិទ្ធិមនុស្ស»

«បើគ្មានសន្តិភាព គឺគ្មានទេលទ្ធិប្រជាធិបតេយ្យ និងសិទ្ធិមនុស្ស»។ នេះជាការគូសបញ្ជាក់របស់សម្ដេចតេជោ ហ៊ុន សែន ទៅកាន់សមាជិកព្រឹទ្ធសភាជប៉ុន។ សម្ដេចតេជោ សែន ថា បើគ្មានសន្តិភាពទេ គឺជំនួយរបស់ភាគីជប៉ុនក្នុងការដោះមីននៅកម្ពុជា ក៏មិនអាចទៅរួចដែរ។

សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានបញ្ជាក់ពីការប្រកាន់ខ្ជាប់របស់សម្ដេច ដោយគ្មានថ្ងៃប្រែប្រួលនូវទស្សនៈផ្តល់តម្លៃដល់សន្តិភាព មុនអ្វីៗទាំងអស់ ពីព្រោះបើគ្មានសន្តិភាព គឺគ្មានទេលទ្ធិប្រជាធិបតេយ្យ និងសិទ្ធិមនុស្ស ។ សម្តេចតេជោ បានប្រៀបធៀបថា ប្រទេសជាច្រើនស្រែករកតែលទ្ធិប្រជាធិបតេយ្យ និងសិទ្ធិមនុស្ស ដោយមិនខ្វល់ពីកត្តាសន្តិភាពក្នុងប្រទេស ប្រៀបដូចជាការមើលតែមួយជ្រុង ឬមើលដើមឈើតែមួយដើម មិនព្រមមើលព្រៃទាំងមូល។

សម្ដេច ហ៊ុន សែន បានសង្កត់ធ្ងន់ថា៖ «សន្តិភាពពិតជាមានតម្លៃមិនអាចកាត់ថ្លៃបាន ពីព្រោះមានសន្តិភាព ទើបយើងអាចមានអ្វីៗបានដូចសព្វថ្ងៃនេះ។ ជាក់ស្តែង ចំពោះជំនួយរបស់ជប៉ុនក្នុងការបោសសម្អាតមីន ​ប្រសិនបើគ្មានសន្តិភាពទេ គឺមិនអាចទៅដោះមីនបានឡើយ ព្រោះយើងដោះមីនបានប៉ុណ្ណា គេក៏នឹងដាក់បន្ថែមប៉ុននោះ»។ ពាក់ព័ន្ធទៅនឹងលទ្ធិប្រជាធិបតេយ្យ និងសិទ្ធិមនុស្ស ត្រូវបានសម្តេចតេជោ បញ្ជាក់ថា ត្រូវតែដើរទន្ទឹមនឹងនីតិរដ្ឋ ទើបអាចរក្សាបានសន្តិភាព ។ ដូច្នេះ ការរក្សាឱ្យបាននូវតុល្យភាពនៃកត្តាទាំង៣នេះ ទើបប្រទេសមានការអភិវឌ្ឍ និងសន្តិភាពពិតប្រាកដ។

ការលើកឡើងទាំងនេះរបស់សម្ដេចតេជោ ហ៊ុន សែន ក្នុងឱកាសដែលសម្ដេចទទួលជួបជាមួយលោក យ៉ាម៉ាគូជិ ណាត់ស៊ូអូ សមាជិកព្រឹទ្ធសភាជប៉ុន និងជាប្រធានគណបក្ស Komeito នាព្រឹកថ្ងៃទី១៦ ខែកក្កដា ឆ្នាំ២០២៤នេះ នៅវិមានព្រឹទ្ធសភា ភ្នំពេញ។ លោក យ៉ាម៉ាគូជិ ណាត់ស៊ូអូ បានជម្រាបសម្តេចតេជោ ថា លោក ធ្លាប់មកបានបំពេញទស្សនកិច្ចនៅកម្ពុជា លើកទីមួយ ក្នុងឆ្នាំ១៩៩១ ដែលពេលនោះកម្ពុជានៅមានក្រុមប្រដាប់អាវុធរហូត៤ក្រុម ហើយនៅមានសង្គ្រាមនៅឡើយ ខណៈនៅឆ្នាំ១៩៩២ ​ជប៉ុនបានសម្រេចចិត្តបញ្ជូន​កងកម្លាំងរក្សាសន្តិភាពមកកម្ពុជា ​លោក ក៏បានមកកម្ពុជាចំនួន២ដងទៀត។

សម្រាប់ដំណើរទស្សនកិច្ចលើកនេះ គឺមានរយៈពេលជាង៣២ឆ្នាំ គិតពីពេលដែលលោក ​មកប្រទេសកម្ពុជាដំបូង លោកពិតជាភ្ញាក់ផ្អើលខ្លាំងនូវភាពរីកចម្រើនរបស់កម្ពុជា ជាពិសេសរាជធានីភ្នំពេញមានការអភិវឌ្ឍលឿនរហ័ស និងមានសុខសន្តិភាពពេញលេញ។ សមាជិកព្រឹទ្ធសភាជប៉ុនរូបនេះ បានកោតសរសើរពីភាពជាអ្នកដឹកនាំរបស់សម្ដេចតេជោ ក្នុងការស្វែងរកសុខសន្តិភាព កសាងប្រទេស និងអភិវឌ្ឍប្រទេសឱ្យមានការរីកចម្រើនជាបន្តបន្ទាប់នេះ។

សម្តេចតេជោ បានអរគុណលោក យ៉ាម៉ាគូជិ ចំពោះការរំលឹកពី​ដំណើរទស្សនកិច្ចមកកម្ពុជាក្នុងអំឡុងជាង៣២ឆ្នាំមកនេះ គឺចាប់តាំងពីប្រទេសកម្ពុជាកំពុងមានសង្រ្គាមនៅឡើយ និងសូម្បីតែក្រោយឆ្នាំ១៩៩៣ គឺនៅពេលដែល UNTAC ចាកចេញពីកម្ពុជាទៅហើយ ក៏សង្រ្គាមមិនទាន់បានបញ្ចប់ទាំងស្រុងដែរ។​ សម្តេចតេជោ ចាត់ទុកលោក ​យ៉ាម៉ាគូជិ ជាសាក្សី រស់ ដែលបានមើលឃើញពីការពិតនៃការអភិវឌ្ឍរបស់កម្ពុជា ​ដោយសារកត្តាសន្តិភាព ហើយសន្តិភាពកំពុងគ្របដណ្តប់ពេញប្រទេសកម្ពុជា រកមកបានយ៉ាងលំបាកណាស់៕