អតីតអគ្គលេខាធិការ UN ចាត់ទុកសម្ដេចតេជោ ថា ជាមេដឹកនាំដែលតែងខ្វល់ខ្វាយពីអាស៊ាន

អតីតអគ្គលេខាធិការអង្គការសហប្រជាជាតិ លោក បាន គីមូន បានចាត់ទុកសម្ដេចតេជោ ហ៊ុន សែន អតីតនាយករដ្ឋមន្ត្រីកម្ពុជា ថា ជាមេដឹកនាំដែលតែងខ្វល់ខ្វាយ និងជួយដោះស្រាយរាល់បញ្ហានានារបស់អាស៊ាន។

លោក បាន គីមូន បានបញ្ជាក់ថា សម្ដេចតេជោ ជាមេដឹកនាំដែលនាំឱ្យកម្ពុជាទទួលបានសុខសន្តិភាព ហើយជាអ្នកដឹកនាំម្នាក់ក្នុងតំបន់អាស៊ាន ដែលមានចក្ខុវិស័យវែងឆ្ងាយ និងបានជួយដោះស្រាយបញ្ហានានាក្នុងតំបន់អាស៊ាន។ លោក បាន គីមូន បានអបអរសាទរដល់សម្ដេចតេជោ ដែលទទួលបានសញ្ញាបត្របណ្ឌិតកិត្តិយសទាក់ទងនឹងការដឹកនាំ និងការកសាងសន្តិភាព។​

ការលើកឡើងរបស់អតីតអគ្គលេខាធិការ UN បានធ្វើឡើងក្នុងជំនួបពិភាក្សាការងារជាមួយសម្ដេចហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រីកម្ពុជា កាលពីរសៀលថ្ងៃទី១១ ខែកញ្ញា ឆ្នាំ ២០២៤ នៅក្នុងឱកាសសម្ដេចតេជោ អញ្ជើញចូលរួមក្នុង​​វេទិកាចំណេះដឹងពិភពលោក នៅកូរ៉េខាងត្បូង។ លោក បាន គីមូន ក៏បានអបអរសាទរសម្ដេចតេជោ ដែលបានក្លាយជាប្រធានព្រឹទ្ធសភានៃកម្ពុជា។

សម្ដេចតេជោ ហ៊ុន សែន និងលោក បាន គីមូន បានរម្លឹកអនុស្សាវរីយ៍ដែលលោកទាំងពីរធ្លាប់បានធ្វើការងារជាមួយគ្នា ហើយលោក បាន គីមូន បានអរគុណសម្តេចតេជោ ក៏ដូចជាកម្ពុជា ​ដែលបានគាំទ្រអង្គការសហប្រជាជាតិ នៅក្នុងអំឡុងពេលដែលលោក នៅជាអគ្គលេខាធិការ។ លោក ថា ការដឹកនាំរបស់សម្ដេចតេជោ បានធ្វើឱ្យទំនាក់ទំនងកម្ពុជា និងកូរ៉េមានភាពល្អប្រសើរ និងបានរួមចំណែកដល់សុខសន្តិភាពទាំងតំបន់ និងពិភពលោកផងដែរ។

ជាកិច្ចឆ្លើយតប សម្ដេចតេជោ ហ៊ុន សែន បានប្រាប់លោក បាន គីមូន ថា ទោះបីជាសម្ដេច នៅមានសុខភាពល្អ អាចធ្វើជានាយករដ្ឋមន្ត្រី មួយអាណត្តិ ឬពីរអាណត្តិទៀតក៏ដោយ ក៏ប៉ុន្តែ​សម្ដេច បានសម្រេចលះបង់ ដើម្បីផ្ទេរអំណាចទៅអ្នកជំនាន់ក្រោយ ដែលជាការ​ដោះដូរនឹងសុខសន្តិភាព និងការអភិវឌ្ឍរយៈពេលយូរអង្វែងនៅកម្ពុជា។​

សម្ដេចតេជោ អរគុណលោក បាន គីមូន និងរដ្ឋាភិបាលកូរ៉េ ដែលបានខិតខំជួយកម្ពុជាក្នុងការអភិវឌ្ឍវិស័យសំខាន់ៗ ហើយសម្ដេច សង្ឃឹមថា តាមរយៈស្ពានមិត្តភាពកម្ពុជា-កូរ៉េ ដ៏វែងមួយដែលកាត់ទន្លេចំនួន២ នឹងលេចចេញជារូបរាងក្នុងពេលឆាប់ៗខាងមុខ។ សម្ដេច បន្ថែមថា ទំនាក់ទំនងរវាងប្រទេសទាំងពីរ ជាពិសេសកិច្ចព្រមព្រៀងពាណិជ្ជកម្មសេរី បានធ្វើឱ្យប្រទេសទាំងពីរ ពង្រីកសក្តានុពលក្នុងវិស័យសេដ្ឋកិច្ច និងពាណិជ្ជកម្មបន្ថែមទៀត៕