កម្ពុជាបន្តបណ្ដេញជនជាតិវៀតណាម២១នាក់ទៀតចេញពីប្រទេស ក្រោយលួចស្នាក់នៅខុសច្បាប់​

អាជ្ញាធរកម្ពុជាបានបន្តបណ្ដេញជនជាតិវៀតណាមចំនួន២១នាក់ទៀតដែលលួចស្នាក់នៅ និងធ្វើការងារដោយខុសច្បាប់ ចេញពីប្រទេស។

យោងតាមអគ្គនាយកដ្ឋានអន្តោប្រវេសន៍ តាមរយៈការផ្សព្វផ្សាយនៅលើទំព័រហ្វេសប៊ុកផ្លូវការរបស់ខ្លួន គឺក្រោយទទួលបានពីស្នងការដ្ឋាននគរបាលខេត្តស្វាយរៀង នាថ្ងៃទី២៦ ខែវិច្ឆិកា ឆ្នាំ២០២៤ នាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ បានសម្រេចបណ្តេញជនជាតិវៀតណាមសរុបចំនួន ២១នាក់ (ស្រី ៤នាក់) ចេញពីព្រះរាជាណាចក្រកម្ពុជា តាមប៉ុស្តិ៍នគរបាលច្រកទ្វារព្រំដែនអន្តរជាតិបាវិត ខេត្តស្វាយរៀង ពាក់ព័ន្ធករណីលួចស្នាក់នៅធ្វើការងារខុសច្បាប់ និងគ្មានលិខិតឆ្លងដែន​។

ការអនុវត្តនីតិវិធីបណ្ដេញចេញជនជាតិវៀតណាមនេះ បានធ្វើឡើងតាមអនុសាសន៍ណែនាំរបស់ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស សុខា និងការណែនាំដោយផ្ទាល់ពីលោកឧត្តមសេនីយ៍ឯក សុខ វាសនា អគ្គនាយកនៃអគ្គនាយកដ្ឋានអន្តោប្រវេសន៍។

គួរជម្រាបថា ក្នុងរយៈពេល ២០ថ្ងៃ នៃខែវិច្ឆិកា ឆ្នាំ២០២៤កន្លងទៅនេះ កម្លាំងមានសមត្ថកិច្ចកម្ពុជា បានបណ្ដេញចេញជនជាតិវៀតណាមចំនួន ៧២នាក់ចេញពីប្រទេសកម្ពុជា ពីបទលួចស្នាក់នៅធ្វើការងារខុសច្បាប់ និងនេសាទដោយប្រើប្រាស់ឧបករណ៍ឆក់ គ្មានលិខិតឆ្លងដែនផងដែរ៕​