ក្រសួងព័ត៌មាន និងក្រសួងកិច្ចការនារី រៀបចំវេទិកាសារព័ត៌មានប្រចាំឆ្នាំស្តីពីសមភាពយេនឌ័រ

ក្រសួងព័ត៌មាន និងក្រសួងកិច្ចការនារី បានសហការរៀបចំវេទិកាសារព័ត៌មានប្រចាំឆ្នាំ ស្តីពីសមភាពយេនឌ័រ ក្រោមប្រធានបទ “តួនាទីរបស់សារព័ត៌មានក្នុងការលើកកម្ពស់សមភាពយេនឌ័រ និងទប់ស្កាត់អំពើហិង្សាលើស្ត្រី” រយៈពេលមួយព្រឹកពេញ នៅថ្អៃទី៤ ខែធ្នូ ឆ្នាំ២០២៤។

វេទិកានេះ រៀបចំឡើងដើម្បីកៀងគរភាគីពាក់ព័ន្ធសំខាន់ៗសហការគ្នាក្នុងការលើកកម្ពស់សមភាពយេនឌ័រ និងដោះស្រាយបញ្ហាអំពើហិង្សាទាក់ទងនឹងយេនឌ័រ ក្នុងតួនាទីរបស់ប្រព័ន្ធផ្សព្វផ្សាយ។ដោយសារតែភាពជឿនលឿននៃបច្ចេកវិទ្យាក្នុងសម័យបច្ចុប្បន្ននេះ ជាហេតុត្រូវជំរុញឱ្យមានការគិតគូរពីសុវត្ថិភាពនៃការប្រើប្រាស់ប្រព័ន្ធអ៉ីនធឺណិតរបស់ស្ត្រី កុមារ ជនងាយរងគ្រោះ និងអ្នកសារព័ត៌មានជាស្រ្តីផង។

បើតាមក្រសួងព័ត៌មាន វេទិកាខាងលើ មានគោលបំណងសំខាន់ៗ៣។ គោលបំណងទី១ លើកកម្ពស់ការយល់ដឹងពីតួនាទៅភាគីពាក់ព័ន្ធនៃប្រព័ន្ធផ្សព្វផ្សាយ ក្នុងការលើកកម្ពស់សមភាពយេនឌ័រ ទប់ស្កាត់អំពើហិង្សាលើស្ត្រី និងក្មេងស្រី ជំរុញការរាយការណ៍ព័ត៌មានពីអំពើហិង្សាលើស្ត្រី និងជនងាយរងគ្រោះប្រកបដោយវិជ្ជាជីវៈ។ ទី២ លើកកម្ពស់ការយល់ដឹងជាសាធារណៈពីក្រមប្រតិបត្តិប្រព័ន្ធផ្សព្វផ្សាយ សម្រាប់ការរាយការណ៍ព័ត៌មានពីអំពើហិង្សាលើស្ត្រី និងគោលការណ៍ណែនាំពីសុវត្ថិភាបរំញោចយេនឌ័រសម្រាប់ប្រព័ន្ធផ្សព្វផ្សាយកម្ពុជា ប្រព័ន្ធផ្សព្វផ្សាយចម្រុះ សមភាព និងបរិយាបន្ន។ ទី៣ បង្កើតបរិយាកាសពិភាក្សា កំណត់អត្តសញ្ញាណ ការអនុវត្តល្អ និងចែករំលែកអនុសាសន៍ជាមួយគ្រប់ភាគីពាក់ព័ន្ធ រួមទាំងដំណោះស្រាយរួមគ្នា ដើម្បីពង្រឹងក្របខ័ណ្ឌគតិយុទ្ធពាក់ព័ន្ធ។

បន្ថែមពីនេះ វេទិកាសារព័ត៌មានប្រចាំឆ្នាំ ស្តីពីសមភាពយេនឌ័រ រំពឹងថា តាមរយៈវេទិកានេះ នឹងបង្កើនការយល់ដឹងពីតួនាទីរបស់ប្រព័ន្ធផ្សព្វផ្សាយក្នុងការលើកកម្ពស់សមភាពយេនឌ័រ ការផ្តល់ភាពអង់អាចដល់ស្ត្រី និងក្មេងស្រី និងទប់ស្កាត់អំពើហិង្សាទាក់ទងនឹងយេនឌ័រ។ ផ្តល់យុទ្ធសាស្ត្រ និងអនុសាសន៍ដល់ប្រព័ន្ធផ្សព្វផ្សាយ ដើម្បីទទួលយកការអនុវត្តដែលឆ្លើយតបនឹងយេនឌ័រ។ ពង្រឹងកិច្ចសហការរវាងប្រព័ន្ធផ្សព្វផ្សាយ អ្នកបង្កើតគោលនយោបាយ និងអង្គការសង្គមស៊ីវិល ដើម្បីដោះស្រាយបញ្ហាវិសមភាពយេនឌ័រ។ ជាមួយគ្នានេះ ក៏រំពឹងថា មានការប្តេជ្ញាចិត្តពីភាគីពាក់ព័ន្ធក្នុងការអនុវត្តគោលនយោបាយលើកកម្ពស់សមភាពយេនឌ័រ និងសុវត្ថិភាពលើប្រព័ន្ធអ៉ីនធឺណិតសម្រាប់ស្ត្រី និងក្មេងស្រី៕