ព័ត៌មានជាតិ

២នាក់ប្ដីប្រពន្ធ តេស្ដមានវិជ្ជមានកូវីដ១៩ ពេលទៅមើលកសិដ្ឋានចិញ្ចឹមមាន់ នៅខេត្តកំពង់ឆ្នាំង

បានផុស

៤ years មុន

នៅ

ថ្ងៃអង្គារ ២៣ មីនា ២០២១

ដោយ

លោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង បានឲ្យដឹងថា កាលពីព្រឹកថ្ងៃ២១ខែមីនា មន្ទីរពេទ្យបង្អែកខេត្តកំពង់ឆ្នាំង បានយកសំណាកបុរសនិងស្ត្រី២នាក់ប្ដីប្រពន្ធ ដែលមកពីទីក្រុងភ្នំពេញ បានធ្វើតេស្តរកមេរោគកូវីដ១៩ លទ្ធផលបានបង្ហាញនៅព្រឹកថ្ងៃទី២៣ ខែមីនាឆ្នាំ២០២១នេះថា បុរសនិងស្ត្រី២នាក់ប្ដីប្រពន្ធ គឺមានវិជ្ជមានកូវីដ១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិតបានឲ្យដឹងទៀតថា ២នាក់ប្ដីប្រពន្ធដែលមានវិជ្ជមានមេរោគកូវីដ១៩ខាងលើនេះ មានទីលំនៅផ្ទះលេខ ៩១ F ផ្លូវ ២០៨ បុរីវិមានភ្នំពេញ ស្ថិតក្នុងភូមិច្រាំងចំរេះ សង្កាត់ច្រាំងចំរេះ ខណ្ឌឬស្សីកែវ រាជធានីភ្នំពេញ គាត់ទាំង២នាក់ បានមកមើលកន្លែងចិញ្ចឹមមាន់នៅភូមិទ័ពត្បែង ឃុំពង្រ ស្រុករលាប្អៀរ ខេត្តកំពង់ឆ្នាំង។ បន្ទាប់ពីទទួលបានព័ត៌មានថា ប្អូនគាត់ជាអ្នកបើកបររថយន្តរបស់គាត់មានវិជ្ជមានកូវីដ១៩ គាត់និងប្រពន្ធក៏សម្រេចចិត្តយកសំណាកមកពិនិត្យនៅក្នុងមន្ទីរពេទ្យបង្អែកខេត្តកំពង់ឆ្នាំង កាលពីថ្ងៃអាទិត្យទី២១ ខែមីនា ឆ្នាំ២០២១ គឺបន្ទាប់ពីយកសំណាកហើយគាត់បានត្រឡប់ទៅភ្នំពេញវិញ ដោយមិនមានចុះពីរថយន្តនៅតាមផ្លូវឡើយ ។ ឥឡូវទទួលបានលទ្ធផលវិជ្ជមាន ពីវិទ្យាស្ថានប៉ាស្ទ័រនៅថ្ងៃទី២២ ខែមីនាវេលាម៉ោង១២យប់។

ដោយឡែកនៅថ្ងៃទី២៣ខែមីនានេះ ក្រុមការងារមន្ទីរសុខាភិបាលខេត្តកំពង់ឆ្នាំង កំពុងតែស្វែងរកអ្នកពាក់ព័ន្ធនៅក្នុងភូមិទ័ពត្បែង ឃុំពង្រ ស្រុករលាប្អៀរ ដើម្បីយកសំណាកទៅធ្វើតេស្ត និងដាក់ពួកគាត់ឲ្យនៅធ្វើចត្តាឡីស័កដាច់ដោយឡែករយៈពេល១៤ថ្ងៃ បច្ចុប្បន្នដែលក្នុងពេលនេះ បានរកឃើញអ្នកដែលពាក់ព័ន្ធផ្ទាល់ចំនួន ៣នាក់ហើយ និងកំពុងតែបន្តរកអ្នកពាក់ព័ន្ធផ្សេងៗទៀតផង ដើម្បីយកសំណាកមកធ្វើតេស្តផងដែរ។

មន្ទីរសុខាភិបាលខេត្តកំពង់ឆ្នាំងសូមធ្វើការអំពាវនាវដល់ប្រជាពលរដ្ឋនៅគ្រប់មូលដ្ឋាន សូមមេត្តាចូលរួមទាំងអស់គ្នា ធ្វើអនាម័យតាមការណែនាំរបស់ក្រសួងសុខាភិបាលដោយត្រូវពាក់ម៉ាសលាងដៃនឹងសាប៊ូ និងត្រូវអនុវត្ត ៣ និង ៣ការពារឲ្យបានគ្រប់គ្រប់គ្នា ដើម្បីរួមគ្នាទប់ស្កាត់ជំងឺកូវីដ១៩ កុំឲ្យរាលដាលចូលក្នុងសហគមន៍របស់យើង៕

អត្ថបទ៖ ឈៀង ថារិទ្ធ

សូមចុចអាន៖ ២៤ ម៉ោងនេះ បន្តរកឃើញអ្នកឆ្លងថ្មី ៣៥ នាក់ទៀត