កម្មករផ្សារដែកសាងសង់ផ្លូវម្នាក់នៅខេត្តកែបវិជ្ជមាន​កូវីដ១៩

កម្មករផ្សារដែកសាងសង់ផ្លូវម្នាក់នៅខេត្តកែបរកឃើញវិជ្ជមានកូវីដ១៩ នៅពេលធ្វើតេស្តសំណាកលើកទទី២។

រដ្ឋបាលខេត្តកែប បានឲ្យដឹងថា បុរសវ័យ ២១ ឆ្នាំ ឈ្មោះ អ៊ុន រិទ្ធី មានស្រុកកំណើតនៅភូមិត្រពាំងស្តៅ ឃុំត្រពាំងភ្លាំង ស្រុកឈូកខេត្តកំពត ដែលជាកម្មករស្ថាបនាផ្លូវនៅភូមិដំណាក់ចង្អើរ សង្កាត់ព្រៃធំ ក្រុងកែប ខេត្តកែប រកឃើញវិជ្ជមាន កូវីដ១៩។

រដ្ឋបាលខេត្តកែប ឲ្យដឹងថា មុនថ្ងៃទី ១០ ខែមីនា បំពេញការងារជាកម្មករផ្សារដែកនៅផ្សារថ្នល់ទទឹង ខេត្តកំពង់ស្ពឺ ហើយនៅថ្ងៃទី ១០ បានធ្វើដំណើមកដល់ការដ្ឋានផ្លូវ ភូមិដំណាក់ចង្អើរ សង្កាត់ព្រៃធំ ក្រុងកែប ខេត្តកែប តាមរថយន្ត១គ្រឿងមានគ្នា (៤ នាក់ ចិន២ ខ្មែរ២) មកធ្វើការនិងស្នាក់នៅ។

រហូតដល់ថ្ងៃទី ១៣ ក្រុមការងារឆ្លើយតបបន្ទាន់ បានយកបុគ្គលទាំង៤នាក់នេះ ទៅធ្វើចត្តាឡីស័ក និងយកសំណាក រហូតដល់ថ្ងៃទី ២៦ យកវត្ថុសំណាកវិភាគលើកទី២ ទទួលលទ្ធផលវិជ្ជមាន ម្នាក់ឈ្មោះ អ៊ុន រិទ្ធី បច្ចុប្បន្នកំពុងសម្រាកព្យាបាលនៅមន្ទីរពេទ្យបង្អែកខេត្តកែប។
រដ្ឋបាលខេត្តកែប សូមអំពាវនាវដល់បុគ្គលគ្រប់រូប ដែលបានប៉ះពាល់ដោយផ្ទាល់ ឬដោយប្រយោលជាមួយបុគ្គលវិជ្ជមានកូវីដ-១៩ រូបនេះ សូមអញ្ជើញផ្ដល់ព័ត៌មានមកកាន់ក្រុមការងារឆ្លើយតបបន្ទាន់នៃមន្ទីរសុខាភិបាលខេត្ត៕