ក្រសួងយុត្តិធម៌៖ សមត្ថកិច្ចកំពុងធ្វើការតាមជំហានៗ លើរឿងពលរដ្ឋចាញ់បោកក្រុមហ៊ុន CIC Plc

ក្រុមព័ត៌មាន និងទំនាក់ទំនងសាធារណៈនៃក្រសួងយុត្តិធម៌ បានឱ្យដឹងនៅរសៀលថ្ងៃទី២៥ ខែមីនា ឆ្នាំ២០២៤ នេះ ថា ស្ថាប័នសមត្ថកិច្ចកំពុងយកចិត្តទុកដាក់ខ្ពស់ជាប់ជាប្រចាំចំពោះរឿងរ៉ាវពលរដ្ឋចាញ់បោកក្រុមហ៊ុន CIC Plc  និងបានធ្វើការជាជំហានៗ និងខិតខំសម្របសម្រួលរកដំណោះស្រាយការពារផលប្រយោជន៍របស់អ្នកវិនិយោគតាមច្បាប់។

ក្រសួងយុត្តិធម៌ បានឱ្យដឹងថា តាមព័ត៌មានដែលក្រសួងទទួលបានពីស្ថាប័នមានសមត្ថកិច្ច គឺករណីចាញ់បោកក្រុមហ៊ុន CIC Plc នេះ ពុំមែនជាដូចជាករណីរឿង ឡេង ចាន់ណា ដែលជាករណីសំណុំរឿងបោកប្រាស់នោះទេ។  មិនដូចករណីរឿង ឡេង ចាន់ណា  ត្បិតថាករណីរឿងក្រុមហ៊ុន CIC គឺជាក្រុមហ៊ុនដែលមានការចុះបញ្ជីដើម្បីធ្វើការវិនិយោគ មានក្រុមប្រឹក្សាភិបាលគ្រប់គ្រងច្បាស់លាស់ និងមានស្ថាប័នសមត្ថកិច្ច ត្រួតពិនិត្យកិច្ចការនេះ។

ចំពោះការចោទរបស់អតីតតំណាងរាស្ត្របក្សសង្គ្រោះជាតិថាអាជ្ញាធរសមត្ថកិច្ចមិនធ្វើការងារលើករណីនេះ ក្រសួងយុត្តិធម៌ក៏បានបំភ្លឺថា ស្ថាប័នមានសមត្ថកិច្ច កំពុងធ្វើការងារជាប់ជាប្រចាំលើករណីនេះ។ក្រសួងយុត្តិធម៌ ក៏បានសុំឱ្យពលរដ្ឋរង់ចាំមើលអ្វីដែលជាដំណោះស្រាយតាមផ្លូវច្បាប់ក្នុងរឿងនេះ ដោយអាជ្ញាធរ ហើយអ្នកវិនិយោគទាំងឡាយក្នុងក្រុមហ៊ុន CIC គួរខិតខំរកវិធីដោះស្រាយបញ្ហាក្នុងពេលដែលក្រុមហ៊ុនជួបវិបត្តិ៕