Connect with us

ព័ត៌មានជាតិ

បណ្ឌិត អ៊ិន​ ចាន់នី៖ នៅ​ក្នុង​ស្ថាន​ភាព​កូវីដ១៩ បើ​អតិថិ​ជន​ជួប​បញ្ហា ​ធនាគារ​ក៏​ជួប​បញ្ហា​ដែរ​​​

បានផុស

នៅ

ដើម្បីសម្រាលទុក្ខលំបាកដល់ប្រជាពលរដ្ឋ និងអាជីវកម្មដែលរងគ្រោះដោយសារជំងឺកូវីដ១៩ គ្រឹះស្ថានធនាគារ និង មីក្រូហិរញ្ញវត្ថុទាំងអស់នៅប្រទេសកម្ពុជាបានអនុវត្តការរៀបចំឥណទានឡើងវិញ តាមសារាចរណែនាំរបស់ធនាគារជាតិនៃកម្ពុជាដែលបានដាក់ចេញនៅឆ្នាំ២០២០។

លោកបណ្ឌិត អុិន ចាន់នី ដែលជាប្រធានសមាគមធនាគារនៅកម្ពុជា មានប្រសាសន៍ថា៖ «ដើម្បីរួមចំណែកជួយសម្រាលបន្ទុកប្រជាពលរដ្ឋដែលរងផលប៉ះពាល់ពីជំងឺកូវីដ១៩គ្រឹះស្ថានធនាគារនៅទូទាំងប្រទេសបានផ្ដល់ការអនុគ្រោះដល់អ្នកខ្ចី តាមរយៈការរៀបចំឥណទានឡើងវិញក្នុងទំហំទឹកប្រាក់ជាង៣ពាន់លានដុល្លារអាមេរិក ស្មើនឹងជាង៤៣.០០០គណនីយកាលពីឆ្នាំ២០២០។»

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អុិន ចាន់នី បានបន្តថា៖ «គ្រឹះស្ថានធនាគារនឹងបន្តរៀបចំឥណទានឡើងវិញដល់អតិថិជនបន្ថែមទៀតនៅឆ្នាំ ២០២១នេះ ពីព្រោះការលូតលាស់របស់ធនាគារផ្សាភ្ជាប់នឹងការរីកចម្រើនរបស់អតិថិជន។ នៅក្នុងស្ថានភាពកូវីដ១៩ បើអតិថិជនជួបបញ្ហា ធនាគារក៏ជួបបញ្ហាដែរ ដូច្នេះយើងយោគយល់គ្នាដោយអនុវត្តតាមគោលការណ៍របស់ធនាគារជាតិក្នុងការបន្ធូបន្ថយសម្រាលការបង់ប្រាក់រំលស់។»

ទាក់ទងនឹងការបន្ធូបន្ថយការបង់ប្រាក់ លោក អុិន ចាន់នី បានពន្យល់ថា នៅពេលដែលអតិថិជនបានស្នើសុំរៀបចំឥណ ទានឡើងវិញ ដោយសារតែមុខរបររបស់គាត់បានរងផលប៉ះពាល់ដោយសារជំងឺកូវីដ១៩ ដូចជាវិស័យផ្ទះសំណាក់ ភោជនីយដ្ឋាន និងម៉ូតូកង់បីជាដើម ពួកគាត់នឹងត្រូវបានធនាគារបន្ធូបន្ថយការបង់ប្រាក់ដូចជា ពីមុនពួកគាត់ធ្លាប់បង់រំលស់១០០ដុល្លារក្នុងមួយខែ តែបន្ទាប់ពីមានការបន្ធូរបន្ថយ ពួកគាត់សុំសងមួយខែតែ១០ដុល្លារទេ។

យោងតាមរបាយការណ៍របស់ធនាគារជាតិនៃកម្ពុជាឆ្នាំ២០២០ ដើម្បីរួមចំណែកជួយសម្រាលបន្ទុកប្រជាពលរដ្ឋដែល រងផលប៉ះពាល់ពីជំងឺកូវីដ១៩ គ្រឹះស្ថានធនាគារ និងមីក្រូហិរញ្ញវត្ថុ បានផ្ដល់ការអនុគ្រោះដល់អ្នកខ្ចី តាមរយៈការរៀបចំឥណទានឡើងវិញចំនួនជិត៣សែនគណនីយស្មើនឹង៤,២ពាន់លានដុល្លារ។

ទោះបីស្ថិតក្នុងស្ថានភាពនៃជំងឺកូវីដ១៩ក្ដី ការផ្ដល់ឥណទានដល់អតិថិជនមិនមានការថយចុះនោះទេ តែបានកើនឡើងគួរឱ្យកត់សម្គាល់ក្នុងឆ្នាំ២០២០។ របាយការណ៍របស់ធនាគារជាតិនៃកម្ពុជាឆ្នាំ២០២០បង្ហាញថា ឥណទានរបស់គ្រឹះស្ថានធនាគារបានកើនឡើងប្រមាណ១៥% ស្មើនឹងជាង៣០ពាន់លានដុល្លារអាមេរិក ដោយមាន១,២លានគណនីយ។ ឥណទានដែលត្រូវបានផ្ដល់ឱ្យច្រើនជាងគេគឺនៅក្នុងវិស័យសំណង់ និងការជួញដូរអចលនទ្រព្យស្មើនឹង ១៧,៦% នៃឥណទានសរុប ការជួញដូររាយ ១៥,៥% និងការឱ្យខ្ចីទិញផ្ទះជាកម្មសិទ្ធិផ្ទាល់ខ្លួន ១២,៨% ៕

លោក អុិន ចាន់នី បានបញ្ជាក់ថា ការកើនឡើងនៃឥណទានឆ្នាំ២០២០ គឺដោយសារតែគោលនយោបាយរបស់ធនាគារជាតិ ដែលអនុគ្រោះចំពោះបទបញ្ញតិផ្សេងៗទាក់ទងនឹងការរៀបចំឱ្យមានឥណទានឡើងវិញ ដូចជាការបន្ធូបន្ថយអនុបាតទុនបំរុង ការពន្យាការអនុវត្តដើមទុនទ្រនាប់ និងការបន្ធូបន្ថយពន្ធកាត់ទុកសម្រាប់កម្ចីពីបរទេសជាដើម។

ធនាគារជាតិនៃកម្ពុជាបានទម្លាក់អត្រាប្រាក់បំរុងកាតព្វកិច្ចជារៀល និងជាដុល្លារអាមេរិកមកត្រឹម៧%ចាប់ពីខែមេសាឆ្នាំ២០២០ពីកម្រិត៨%សម្រាប់ប្រាក់រៀល និង១២,៥%សម្រាប់រូបិយប័ណ្ណបរទេស ដើម្បីផ្ដល់សន្ទនីយភាពបន្ថែមដល់គ្រឹះស្ថានធនាគារ និងហិរញ្ញវត្ថុ។ ប្រការនេះធ្វើឱ្យវិស័យធនាគារមានលទ្ធភាពបង្កើនឥណទាន និងផ្ដល់ការអនុគ្រោះនានាដល់អតិថិជនដែលរងផលប៉ះពាល់ពីឥទ្ធិពលនៃជំងឺកូវីដ១៩។

អត្ថបទ៖ វ៉ាត វិន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានអន្ដរជាតិ១ ម៉ោង មុន

អតីតសេដ្ឋិនីវៀតណាម Truong My Lan ត្រូវបានរដ្ឋអាជ្ញាស្នើកាត់ទោសប្រហារជីវិត

ព័ត៌មានអន្ដរជាតិ៥ ម៉ោង មុន

ស្ត្រីវៀតណាមដែលបានលក់ផ្លែពុទ្រាក្នុងតម្លៃថ្លៃទៅឱ្យភ្ញៀវទេសចរម្នាក់ ត្រូវរងការព្រមានពីអាជ្ញាធរ

ព័ត៌មានជាតិ៥ ម៉ោង មុន

ក្រសួង​ការងារ និង​បណ្តុះបណ្តាល​វិជ្ជាជីវៈ បើក​វគ្គ​បណ្តុះបណ្តាល​លើ​ជំនាញ​ផ្នែក​កំបោរ​ក្នុង​វិស័យ​សំណង់

ព័ត៌មានជាតិ៦ ម៉ោង មុន

ក្រសួងការងារ៖ ការបំផ្លើសព័ត៌មានអំពីការបើកប្រាក់ឈ្នួលដល់កម្មករ Y & W នៅថ្ងៃស្អែកនេះ ជាព័ត៌មានមិនពិត

ព័ត៌មានជាតិ៦ ម៉ោង មុន

មន្ត្រីជំនាញខេត្តកំពង់ចាម ចុះព្រមានម្ចាស់យានដ្ឋាន កែច្នៃ ឧបករណ៍បំពងសំឡេងខុសបច្ចេកទេស

Sokha Hotels

ព័ត៌មានពេញនិយម