NBC-IBS ​ ​ និងវិទ្យាស្ថាន Chartered Banker Institute របស់​អង់គ្លេសសហការគ្នាផ្តល់ជំនាញ​ធនាគារកម្រិតខ្ពស់

វិទ្យាស្ថាន​សិក្សាបច្ចេកទេសធនាគារនៃធនាគារជាតិនៃកម្ពុជា​ (NBC-IBS) និងវិទ្យាស្ថាន Chartered Banker Institute របស់​អង់គ្លេសបានសហការគ្នាផ្តល់នូវមុខជំនាញវិជ្ជាជីវៈ​កម្រិតខ្ពស់បួនមុខនៃវិស័យនេះដែលត្រូវបានទទួលស្គាល់ជា​អន្តរជាតិ។

យោងតាមសេចក្តីប្រកាសអំពីភាពជាដៃគូរ របស់ NBC-IBS កាលពីចុងសប្តាហ៍នេះ វិស្ថានទាំងពីរបានឈានដល់ការសម្រេចបាននូវការសហការនេះ សំដៅបណ្តុះបណ្តាលធនធានមនុស្ស​ក្នុងវិស័យធនាគារ និងហិរញ្ញវត្ថុ​នៅកម្ពុជាឱ្យកាន់តែមានកម្រិតជំនាញខ្ពស់ និងជាការឆ្លើយតបទៅនឹងតម្រូវការទីផ្សារ និងការរីកលូតលាស់យ៉ាងឆាប់រហ័សនេះវិស័យនេះ។

NBC-IBS បានលើកឡើងថា៖«យើងមានសេចក្តីរំភើបរីករាយក្នុងការប្រកាសពីភាពជាដៃគូរវាងវិទ្យាស្ថាន​សិក្សាបច្ចេកទេសធនាគារនៃធនាគារជាតិនៃកម្ពុជា​ (NBC-IBS) និងវិទ្យាស្ថាន Chartered Banker Instituteរបស់ចក្រភពអង់គ្លេស»។​ ជាផ្នែកមួយនៃកិច្ចសហការនេះ និស្សិតដែលបានចុះឈ្មោះចូលរៀនថ្នាក់បរិញ្ញាបត្រផ្នែកធនាគាររបស់ NBC-IBS ឥឡូវនេះពួកគេនឹងទទួលបាននូវសញ្ញាបត្រ​កម្រិតបរិញ្ញាបត្ររង( Associate Chartered Banker—ACB) ដែលជាកម្រិតវិជ្ជាជីវៈដែលត្រូវបានទទួលស្គាល់ជាអន្តរជាតិ»។

​យោងតាម NBC-IBS ​ជំនាញសំខាន់ចំនួន៤ដែលនឹងផ្តល់នោះគឺ វិញ្ញាបនប័ត្រធនាគារអាជីព; ឌីជីថល និង ការប្រើប្រាស់បញ្ញាសិប្បនិម្មិត AI នៅក្នុងធនាគារ;ធនាគារនិរន្តរភាព; និង កម្ចីពាណិជ្ជកម្ម និងសាជីវកម្ម។

«ភាពជាដៃគូនេះធានាថា អ្នកជំនាញផ្នែកធនាគារនាពេលអនាគតនៅក្នុងប្រទេសកម្ពុជាត្រូវបានបំពាក់ដោយជំនាញដែលត្រូវការដើម្បីការរីកចម្រើនក្នុងឧស្សាហកម្មទំនើប និរន្តរភាព និងឌីជីថល។ យើងមានមោទនភាពក្នុងការជួយរៀបចំអនាគតធនាគារនៅកម្ពុជា» នេះបើយោងតាម NBC-IBS។

ក្នុងពិធីសម្ពោធជាផ្លូវការនៃការប្រែក្លាយមណ្ឌលសិក្សាបច្ចេកទេសធនាគារ ទៅជា វិទ្យាស្ថានសិក្សាបច្ចេកទេសធនាគារកាលពីថ្ងៃទី២៦ ខែធ្នូ ឆ្នាំ២០២៤ លោកស្រីបណ្ឌិត ជា សិរី ទេសាភិបាល ធនាគារជាតិនៃកម្ពុជា បានលើកឡើងអំពីប្រវត្តិសង្ខេប និងការវិវត្តនៃមណ្ឌលសិក្សាបច្ចេកទេសធនាគារដែលត្រូវបានបង្កើតឡើងដោយធនាគារជាតិនៃកម្ពុជានៅអំឡុងឆ្នាំ១៩៩៤។

លោកស្រីថាដំបូងឡើយ ​  នៅថ្ងៃទី២៤ ខែវិច្ឆិកា ឆ្នាំ២០២២ មណ្ឌលសិក្សាបច្ចេកទេសធនាគារបានអភិវឌ្ឍហេដ្ឋារចនាសម្ព័ន្ធរបស់ខ្លួនជាបន្តបន្ទាប់ ដោយបានផ្លាស់ប្តូរទៅទីតាំងថ្មីនៅខណ្ឌសែនសុខ រាជធានីភ្នំពេញ ដែលជាទីតាំងកម្មវិធីនាពេលនេះ។ លោកស្រីថា នៅខែតុលា ឆ្នាំ២០២៤ មណ្ឌលសិក្សានេះត្រូវបានអនុញ្ញាតឱ្យប្រែក្លាយទៅជាវិទ្យាស្ថានសិក្សាបច្ចេកទេសធនាគារ ​។ ក្រោមក្របខ័ណ្ឌនៃអនុក្រឹត្យនេះ វិទ្យាស្ថានមានសមត្ថភាពគ្រប់គ្រាន់ក្នុងការបណ្តុះបណ្តាលនិស្សិតថ្នាក់បរិញ្ញាបត្រ និងថ្នាក់បរិញ្ញាបត្ររង លើមុខជំនាញគ្រប់គ្រងធនាគារ ហិរញ្ញវត្ថុ និងសេដ្ឋកិច្ច។

​​គិតមកដល់ចុងខែធ្នូ ឆ្នាំ​២០២៤  វិទ្យាស្ថានបានទទួលបណ្តុះបណ្ដាលនិស្សិតថ្នាក់ប្រកាសនីយបត្រជាន់ខ្ពស់លើជំនាញធនាគារបានចំនួន ៣៣ជំនាន់ ដែលមាននិស្សិតសរុបចំនួន ៣​១៧៥រូប ក្នុងនោះនិស្សិតស្រីមានចំនួន ១ ៩៩៧រូប និងមានសាស្រ្តាចារ្យសរុបចំនួន ៦៥រូប៕