រដ្ឋ៖ ការចូលរួមពីវិស័យឯកជនលើមូលបត្ររដ្ឋ​ជួយអភិវឌ្ឍន៍វិស័យនេះនៅកម្ពុជា

លោក ស៊ូ សុជាតិ  អគ្គនាយកនៃនិយ័តករមូលបត្រកម្ពុជា បានលើកឡើងថាជាមួយនឹងការអភិវឌ្ឍនៃវិស័យមូលបត្រ​នៅកម្ពុជា វិស័យឯកជនគឺជាតួអង្គដ៏សំខាន់មិនអាចខ្វះបានក្នុងការអភិវឌ្ឍវិស័យនេះ ជាពិសេសមូលបត្រ​រដ្ឋដែលជាផលិតផលហិរញ្ញវត្ថុថ្មីមួយទៀត។

ថ្លែងនៅក្នុងពិធីប្រកាសជាផ្លូវការនៃការទទួលបានការអនុញ្ញាតធ្វើជាអន្តរការីមូលបត្ររដ្ឋរបស់ ធនាគារ អេស៊ីលីដា ភីអិលស៊ីកាលពីនៅថ្ងៃទី២៨ ខែកុម្ភៈ ឆ្នាំ២០២៥ លោក ស៊ូ សុជាតិ  ​ថា ការទទទួលស្គាល់ធនាគារ អេស៊ីលីដា ភីអិលស៊ី ​ឱ្យធ្វើជាអន្តរការីមូលបត្ររដ្ឋគឺបង្ហាញអំពីការសហការវាងរដ្ឋនិងឯកជនក្នុងការអភវិឌ្ឍន៍ផលិតផលមូលបត្រនៅកម្ពុជាឱ្យកាន់តែមានភាពសម្បូរបែប។លោកក៏លើកទឹកចិត្តដល់សាធារណៈវិនិយោគលើមូលបត្ររដ្ឋ ព្រោះមានសុវត្ថិភាព និងមានការទូទាត់សង់ទៀងទាត់ ហើយរដ្ឋក៏ទទួលបានថវិកាសម្រាប់វិនិយោគសាធារណៈផ្សេងៗ។

លោកបានថ្លែងថា៖«មូលបត្ររដ្ឋគឺជាឧបករណ៍ហិរញ្ញវត្ថុមួយដែលមានសារៈសម្រាប់បម្រើដល់គោលនយោបាយរបស់រាជរដ្ឋាភិបាល ក្នុងការកៀរគរហិរញ្ញប្បទានទាំងក្នុងស្រុក ក្រៅស្រុក និងពីវិស័យឯកជនសម្រាប់ការអភិវឌ្ឍន៍សេដ្ឋកិច្ចនិងសង្គម។

លោកបណ្ឌិត អ៊ិន ចាន់នី ប្រធាន​នាយក​ប្រតិបត្តិ​ធនាគារ អេស៊ីលីដា ភីអិលស៊ី បាន​មាន​ប្រសាសន៍​ថា ធនាគារអេស៊ីលីដាបានចូលរួមចំណែកក្នុងការអភិវឌ្ឍន៍វិស័យមូលបត្រនៅកម្ពុជាអស់រយៈជាច្រើនឆ្នាំ។ ជាមួយនឹងការទទួលបានការអនុញ្ញាតពីនិយ័តករមូលបត្រកម្ពុជា ធ្វើជាអន្តរការីមូលបត្ររដ្ឋក្នុងវិស័យមូលបត្របង្ហាញអំពីការផ្តល់ទំនុកចិត្តនិងភាពជឿជាក់មកលើស្ថាប័នខ្លួន។

លោកបណ្ឌិតបានថ្លែងថា៖«ការទទួលការអនុញ្ញាត ធ្វើជាអន្តរការីមូលបត្ររដ្ឋក្នុង     វិស័យមូលបត្រ ដើម្បីផ្តល់សេវាកម្មនេះជូនដល់វិនិយោគិន ទាំងក្នុង និងក្រៅប្រទេសដែលមានបំណងវិនិយោគ និង/ឬជួញដូរ      មូលបត្ររដ្ឋនៅកម្ពុជា តាមរយៈធនាគារ អេស៊ីលី​ដា ដែលជាជម្រើសនៃការវិនិយោគមួយបន្ថែមទៀតប្រកបដោយ       សុវត្ថិភាព និងទទួលបានអត្ថប្រយោជន៍ និងក៏ជា ​ការចូលរួមចំណែក​ដល់ការអភិវឌ្ឍន៍នៃសេដ្ឋកិច្ចជាតិ»។

ក្រសួងសេដ្ឋកិច្ច និងហិរញ្ញវត្ថុបានឱ្យដឹងថា រដ្ឋាភិបាលនឹងធ្វើការកៀរគរទុនក្នុងស្រុកចំនួន ១២៣,៦៨៧ លានដុល្លារតាមរយៈការបោះផ្សាយលក់មូលបត្រ​រដ្ឋ​ក្នុងឆ្នាំ២០២៥នេះ ដើម្បីយកមចូលរួមគាំទ្រដល់កម្រោងវិនិយោគសាធារណៈនានា ក្នុងការជំរុញដល់សកម្ម​ភាពសេដ្ឋកិច្ច ក៏ដូចជាធ្វើការទូរទាត់សងការប្រាក់និងប្រាក់ដើមនៃ​ការបោះផ្សាយមូលបត្រ​រដ្ឋ​មុនៗ។

យោងតាមសេចក្តីប្រកាសព័ត៌មានស្តីពី ផែនការបោះផ្សាយលក់មូលបត្ររដ្ឋឆ្នាំ២០២៥ចេញផ្សាយកាលពីថ្ងៃទី១៣ខែមករា ក្រសួងសេដ្ឋកិច្ច និងហិរញ្ញវត្ថុថា ដោយអនុលោមតាមច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៥ និងក្របខ័ណ្ឌគោលនយោបាយស្តីពីការអភិវឌ្ឍមូលបត្ររដ្ឋ ២០២៣-២០២៨ របស់រាជរដ្ឋាភិបាល សម្រាប់ឆ្នាំ២០២៥នេះ ក្រសួងសេដ្ឋកិច្ច និងហិរញ្ញវត្ថុនឹងធ្វើការបោះផ្សាយលក់មូលបត្ររដ្ឋ តាមរយៈការដេញថ្លៃនៅលើថ្នាលរបស់ធនាគារជាតិនៃកម្ពុជា (National Bank of Cambodia Platform-NBCP) ក្នុងទំហំ ៥០០ ប៊ីលានរៀល (ឬជាង១២៣,៦៨៧ លានដុល្លារ)។

បើតាមក្រសួងសម្រាប់ការបោះផ្សាយនេះនឹងមានតម្លៃចារឹកក្នុងមួយប័ណ្ណ១លានរៀល ដែលមានឥណទានប្រតិទាន ១ឆ្នាំ ២ឆ្នាំ ៣ឆ្នាំ ៥ឆ្នាំ ១០ឆ្នាំ និង ១៥ឆ្នាំ ជាមួយអត្រាគូប៉ុងថេរ និងការទូទាត់គូប៉ុងរៀងរាល់៦ខែម្តង ដោយគិតចាប់ពីថ្ងៃបោះផ្សាយ។

​គិតត្រឹមដំណាច់ខែធ្នូ ឆ្នាំ២០២៤ នេះ ធនាគារ អេស៊ីលីដា មានទ្រព្យសកម្មសរុបចំនួនជាង ១០,៨៣ប៊ីលានដុល្លារអាមេរិក ប្រាក់បញ្ញើសន្សំសរុបចំនួន ៨,៣៦ប៊ីលានដុល្លារអាមេរិក និងមានអតិថិជនប្រមាណជាង ៥,៥២លាននាក់។ ធនាគារ អេស៊ីលីដា មានដៃគូអាជីវកម្ម សរុបច្រើងជាង ០,៥២លានដៃគូ និងមានអ្នកប្រើប្រាស់ អេស៊ីលីដា ស៊ូភើអេប សរុបចំនួនជាង ៤,៤២លាននាក់៕