ព័ត៌មានជាតិ

រកឃើញម្ចាស់ជ័យលាភីពានរង្វាន់អក្សរសិល្ប៍ពុទ្ធសាសនបណ្ឌិត្យឆ្នាំ២០២៥

បានផុស

៩ ខែ មុន

នៅ

ថ្ងៃពុធ ១៧ កញ្ញា ២០២៥

ដោយ

រដ្ឋមន្ត្រីក្រសួងធម្មការ និងសាសនាទើបតែបានប្រកាសនូវបញ្ជីជ័យលាភី ពានរង្វាន់អក្សសិល្ប៍ពុទ្ធសាសនបណ្ឌិត្យលើកទី៨ ឆ្នាំ២០២៥ ដែលមានបេក្ខជន៦នាក់លើផ្នែករឿងខ្លី និងផ្នែកកំណាព្យរឿងខ្លី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមបញ្ជីជ័យលាភីឆ្នាំ២០២៥ ដែលទើបត្រូវបានរដ្ឋមន្ត្រីធម្មការលោក ចាយ បូរិន ចុះហត្ថលេខាកាលពីថ្ងៃទី១៥ ខែកញ្ញា ម្ចាស់ជ័យលាភីលេខ១ផ្នែករឿងខ្លី បានទៅលើកញ្ញា កប វណ្ណហួច រឿងសំឡេងតូចមួយ លេខ២បានលើ ជ្រុយ នាវា និពន្ធរឿងទូរស័ព្ទឬដង្ហើមម៉ែ? លេខ៣បានលើ ជា សុលីនី និពន្ធរឿង បាតដៃទី៣។

ដោយឡែកសម្រាប់ម្ចាស់ជ័យលាភីលេខ១ ផ្នែកកំណាព្យរឿងខ្លីវិញបានលើលោក ចំរើន សុភ័ក្រ្ត និពន្ធកំណាព្យរឿងទីផ្សារអនឡាញបណ្ដាញស្នេហ៍ចាស់ លេខ២បានលើលោក សាន ពិសិទ្ធិ និពន្ធកំណាព្យរឿងស្រោមមុខ និងលេខ៣បានលើលោក ឯក ខន និពន្ធរឿងគ្រូបង្រៀនសម័យឌីជីថល។

ម្ចាស់ពានរង្វាន់ផ្នែកនិពន្ធរឿងខ្លីកញ្ញា កប វណ្ណហួច បានឱ្យដឹងថាកញ្ញាមានអារម្មណ៍រំភើបរីករាយជាមួយលទ្ធផលនេះ ដោយថានេះជាសមិទ្ធិផលដ៏ធំមួយសម្រាប់កញ្ញាក្នុងនាមជាអ្នកនិពន្ធ ដែលតែងតែចាប់អារម្មណ៍ចូលចិត្តប្រកួតប្រជែងជាច្រើន។

កញ្ញាបន្ថែមថា៖ «ការដាក់ប្រកួតរឿងខ្លីនេះ ក្នុងពានរង្វាន់នេះគឺជាលើកទីមួយសម្រាប់រឿងខ្លី។ ប៉ុន្តែកាលពីឆ្នាំ២០១៩ ខ្ញុំក៏ធ្លាប់ដាក់កំណាព្យក្នុងពានរង្វាន់នេះដែរ តែមិនបានជោគជ័យទេ។ ឥតមានភាពជោគជ័យណាដែលមិនធ្លាប់ឆ្លងកាត់បរាជ័យនោះទេ»។

កញ្ញា វណ្ណហួច បានបង្ហើបឱ្យដឹងថារឿងខ្លីរបស់កញ្ញានិយាយអំពីការតស៊ូរបស់ក្មេងស្រីម្នាក់ចង់ក្លាយជាអ្នកផ្សព្វផ្សាយអំពីការអាន និងបណ្តុះគំនិតអានដល់យុវជនជំនាន់ក្រោយរហូតទទួលបានលទ្ធផល និងការគាំទ្រច្រើន ហើយក៏មានក្រុមហ៊ុនស្រា និងល្បែងអនឡាញជួលនាងឱ្យផ្សព្វផ្សាយ ដែលអាចធ្វើឱ្យនាងក្លាយជាអ្នកមានបាន។ តែនាងនៅតែប្រកាន់គោលជំហរថាមិនផ្សាយពីរឿងដែលធ្វើឱ្យប៉ះពាល់ដល់សង្គម។ ក្នុងរឿងនោះដែរ ក៏មានបង្កប់នូវផលវិបាកនៃការលេងល្បែងអនឡាញ ឧក្រិដ្ឋកម្មអនឡាញ និងការបំពុលសង្គមក្នុងបណ្ដាញសង្គមជាច្រើនដែលជាបញ្ហារបស់សុខុមាលភាពសង្គមក្នុងបរិបទបច្ចេកវិទ្យាទំនើប។

ម្ចាស់ជ័យលាភីលេខ១ ផ្នែកកំណាព្យ លោក ចំរើន សុភ័ក្រ្ត ជាគ្រូបង្រៀនម្នាក់នៅខេត្តកំពត បានឱ្យដឹងថានេះជាលើកទី១ដែលលោកបានចូលរួមប្រកួតពានរង្វាន់អក្សរសិល្ប៍ពុទ្ធសាសនបណ្ឌិត។ លោកបានបង្ហាញអារម្មណ៍សប្បាយរីករាយចំពោះជ័យលាភីដែលទទួលបាន។

លោកថា៖ «ពូមានអារម្មណ៍សប្បាយរីករាយរំភើបព្រោះក្នុងវិស័យតែងនិពន្ធនេះយើងមិនសូវមានបទពិសោធន៍ទេ! យើងធ្លាប់ដាក់ដែរតែតិចតួចណាស់ទៅស្ថាប័នផ្សេងៗ ព្រោះក្នុងការប្រកួតប្រជែងពានរង្វាន់ឥន្ទ្រទេវីក៏ពូធ្លាប់បានពានរង្វាន់មាស១ដងដែរតែគិតបទពិសោធន៍ពូនៅខ្ចីនៅឡើយទេសម្រាប់វិស័យតែងនិពន្ធនេះ»។

លោក ចំរើន សុភ័ក្រ្ត បានឱ្យដឹងថាស្នាដៃកំណាព្យរឿងទីផ្សារបណ្ដាញស្នេហ៍ចាស់របស់លោកបានផ្ដោតលើ ការបង្កើតទីផ្សារកសិផលតាមរយៈប្រព័ន្ធអនឡាញដែលនិយាយពីតួអង្គឯកដែលគាត់រៀនចប់សាកលវិទ្យាល័យហើយត្រលប់មកអភិវឌ្ឍន៍ដីស្រែចម្ការរបស់គាត់និងបានផ្សព្វផ្សាយផលិតផលធម្មជាតិរបស់គាត់ដោយប្រើប្រាស់បណ្ដាញសង្គមធ្វើឱ្យរីកចម្រើន និងបានជួបគូរស្នេហ៍ចាស់របស់គាត់ដែលជាអ្នកគាំទ្រដល់គាត់។ ក្នុងរឿងក៏មានបង្ហាញពីការប្រើប្រាស់ប្រព័ន្ធអនឡាញបង្កគ្រោះថ្នាក់ដល់ខ្លួនឯងផងដែរដូចជាការលេងល្បែងអនឡាញជាដើម។

គួរឱ្យដឹងផងដែរថាពានរង្វាន់អក្សរសិល្ប៍ពុទ្ធសាសនបណ្ឌិត្យប្រចាំឆ្នាំ២០២៥ ត្រូវបានរៀបចំឡើងផ្ដោតលើប្រធានបទ សុខុមាលភាពសង្គមក្នុងបរិបទបច្ចេកវិទ្យាទំនើប ដោយម្ចាស់ជ័យលាភីនឹងទទួលបានរង្វាន់ជាថវិកា វិញ្ញាបនបត្រ និងការបោះពុម្ភស្នាដៃចំពោះម្ចាស់ជ័យលាភីទាំង៦នាក់។

ប្រធានពុទ្ធសាសនបណ្ឌិត្យកម្ពុជាលោក ស សុខនី បានឱ្យដឹងថាបេក្ខជនប្រកួតពានរង្វាន់អក្សរសិល្ប៍ពុទ្ធសាសនបណ្ឌិត្យឆ្នាំ២០២៥នេះមានចំនួន៣៩នាក់ (និពន្ធរឿងខ្លីចំនួន២២នាក់)។ លោកថាការរៀបចំជាបន្តបន្ទាប់របស់ពុទ្ធសាសនបណ្ឌិតលើការប្រកួតប្រជែងអក្សរសិល្ប៍នេះគឺមានគោលបំណង រួមចំណែកលើកស្ទួយវិស័យតែងនិពន្ធស្នាដៃអក្សរសិល្ប៍ បណ្ដុះទម្លាប់អានសៀវភៅ ផ្ដល់ឱកាសដល់អ្នកនិពន្ធ ជាពិសេសអ្នកនិពន្ធវ័យក្មេងបញ្ចេញសមត្ថភាពក្នុងការតែងនិពន្ធរបស់ខ្លួន និងបន្តប្រពៃណីក្នុងការជួយលើវិស័យអក្សរសាស្ត្រតាំងពីដើមរៀងមករបស់ពុទ្ធសាសនបណ្ឌិត្យ។

លោកបន្ថែមថា៖ «ពុទ្ធសាសនបណ្ឌិត្យបានចាប់ផ្ដើមកម្មវិធីពានរង្វាន់អក្សរសិល្ប៍ពុទ្ធសាសនបណ្ឌិត្យនេះ លើកទី១ នៅក្នុងឆ្នាំ២០១៨ ដែលកាលនោះបានធ្វើក្នុងទម្រង់ជារឿងប្រលោមលោក តែពីឆ្នាំ២០១៩មក បានរៀបចំប្រឡងក្នុងទម្រង់ជារឿងខ្លី និងកំណាព្យរឿងខ្លី។ មកដល់ឆ្នាំឆ្នាំ២០២៥នេះ គឺ បានរៀបចំលើកទី៨ ហើយនឹងបន្តរៀបចំទៅឆ្នាំខាងមុខៗទៀត ក្រោមប្រធានបទផ្សេងៗគ្នា»។

កញ្ញា កប វណ្ណហួច បានជំរុញលើកទឹកចិត្តដល់សាធារណជន និងយុវជនត្រូវហ៊ានសាកល្បងក្នុងការបង្ហាញស្នាដៃតែងនិពន្ធ និងគំនិតរបស់ខ្លួន កុំខ្លាចធ្លាក់ និងមិនត្រូវបោះបង់ទេ។ កញ្ញាថា ប្រឡងធ្លាក់មិនមែនជាបរាជ័យទេ ការឈប់ប្រឡងទើបជាបរាជ័យ ការប្រឡងយកពានគឺមិនមែនសរសេរដើម្បីតែពានទេ គឺបង្ហាញដល់អ្នកអានពីប្រធានបទដែលយើងចង់ឱ្យគេចាប់អារម្មណ៍។

កញ្ញា វណ្ណហួច៖ «សរុបមក ឱ្យតែយើងសរសេរបង្ហាញពីប្រធានបទនោះបានល្អ ច្បាស់លាស់ បូករួមជាមួយសាច់រឿងធ្ងន់ និងប្លែក នោះជ័យលាភី ឬពាននឹងធ្លាក់មកលើយើង។ សម្រាប់ខ្ញុំគឺ កុំសរសេរព្រោះចង់បានរង្វាន់ តែត្រូវសរសេររឿងរបស់យើងឱ្យល្អបំផុតតាមដែលអាចធ្វើបាន។ ប្រសិនជាយើងសរសេរព្រោះចង់បានរង្វាន់ ពេលធ្លាក់យើងនឹងលែងចង់ដាក់ប្រឡងទៀតហើយ»។

ក្នុងនាមជាអ្នកចូលចិត្តតែងនិពន្ធម្នាក់លោក ចំរើន សុភ័ក្រ្ត បានលើកទឹកចិត្តដល់យុវជនងាកមកចាប់អារម្មណ៍លើវិស័យតែងនិពន្ធដើម្បីលើកតម្កើនអក្សរសិល្ប៍ខ្មែរ ដោយថាទោះបីមិនអាចទទួលបានប្រាក់កម្រៃច្រើន តែវាបានបន្សល់ជាស្នាដៃសម្រាប់ខ្លួនឯង ក៏ដូចជាឯកសារដល់មនុស្សជំនាន់ក្រោយសិក្សាស្រាវជ្រាវផងដែរ។

លោកថា៖ «ជាយោបល់ខ្ញុំចង់ឱ្យយុវជនជំនាន់ក្រោយងាកមកចាប់អារម្មណ៍លើវិស័យតែងនិពន្ធនេះព្រោះជាការលើកស្ទួយវិស័យអក្សរសាស្ត្រ អក្សរសិល្ប៍របស់ខ្មែរយើងផងដែរ។ ហើយទោះបីជាការតែងនិពន្ធនេះវាមិនមែនជាទីផ្សារមួយដែលធ្វើឱ្យយើងទទួលបានប្រាក់កម្រៃច្រើនប៉ុន្ដែជាការរួមចំណែកមួយក្នុងការលើកកម្ពស់ក៏ដូចជាបង្កើតស្នាដៃទុកឱ្យមនុស្សជំនាន់ក្រោយបានទទួលការសិក្សារៀនសូត្រនិងស្រាវជ្រាវបន្ត»៕

អត្ថបទដោយ ហ៊ុន សិរីវឌ្ឍន៍

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា