Connect with us

នយោបាយ

មន្ត្រីជាន់ខ្ពស់ គ.ជ.ប ៖ អត្តសញ្ញាណប័ណ្ណប្រភេទចាស់ ក៏អាចចុះឈ្មោះបោះឆ្នោតបានដែរ ឲ្យតែមានសុពលភាព

បានផុស

នៅ

មន្ត្រីជាន់ខ្ពស់ គណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជាក់ថា ដើម្បីអាចចុះឈ្មោះបោះ​ឆ្នោត​​បាន ប្រជាពលរដ្ឋខ្មែរដែលមានអាយុ ១៨ឆ្នាំឡើងទៅ ត្រូវមានអត្តសញ្ញាណប័ណ្ណសញ្ជាតិខ្មែរ ដែលមានសុពល​ភាព ឬឯកសារបញ្ជាក់អត្តសញ្ញាណ បម្រើឲ្យការចុះឈ្មោះបោះឆ្នោត។ ការបញ្ជាក់នេះ គ្រាដែលការពិនិត្យបញ្ជី​ឈ្មោះ និងចុះឈ្មោះបោះឆ្នោតឆ្នាំ២០២១ នឹងត្រូវធ្វើឡើងចាប់ពីថ្ងៃទី១២​ ខែតុលា ដល់ថ្ងៃទី៣០ ខែវិច្ឆិកា ឆ្នាំ២០​២១ នៅតាមសាលាឃុំ-សង្កាត់ និងនៅតាមភូមិមួយចំនួនក្នុងឃុំ-សង្កាត់ទូទាំងប្រទេស។

លោក សោម សូរីដា អគ្គលេខាធិការរង និងជាអ្នកនាំពាក្យគ.ជ.ប បានឲ្យដឹងនៅព្រឹកថ្ងៃទី២០ ខែកញ្ញានេះថា ប្រ​ជា​ពលរដ្ឋខ្មែរ ដែលមានអាយុចាប់ពី ១៨ឆ្នាំឡើងទៅ ពោលគឺកើតមុន ឬកើតត្រឹមថ្ងៃទី៦ ខែមិថុនា ឆ្នាំ២០០៤ ត្រូវ​មានអត្តសញ្ញាណប័ណ្ណសញ្ជាតិខ្មែរមានសុពលភាព ទើបអាចចុះឈ្មោះបោះឆ្នោតបាន។ លោកមានប្រសាសន៍​ប​ញ្ជា​ក់​ថា «ជាទូទៅ! គឺយើងប្រើអត្តសញ្ញាណប័ណ្ណ ដែលមានសុពលភាព ហើយម៉ោងនេះ គ.ជ.ប ដូចជាបង្ហាញ​អំពីអត្តសញ្ញាណប័ណ្ណប្រភេទ១ ប្រភេទ២ ប្រភេទ៣ ក៏ប៉ុន្តែដើម្បីដោះស្រាយចម្ងល់ និងកុំឲ្យមានបញ្ហា គឺយើងប្រើ​ពាក្យថា អត្តសញ្ញាណប័ណ្ណសញ្ជាតិខ្មែរ មានសុពលភាព»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យគ.ជ.ប បានគូសបញ្ជាក់ថា ទោះបីជាអត្តសញ្ញាណប័ណ្ណប្រភេទចាស់ក៏ដោយ ឲ្យតែនៅមានសុពលភាព នៅតែអាចប្រើប្រាស់ សម្រាប់ការចុះឈ្មោះ និងពិនិត្យបញ្ជីឈ្មោះបោះឆ្នោតឆ្នាំ២០២១បានដែរ។ លោក សោម សូរី​ដា បានឲ្យដឹងទៀតថា នៅឆ្នាំ២០២១នេះ គឺជាឆ្នាំដែលត្រូវរៀបចំបញ្ជីឈ្មោះបោះឆ្នោត សម្រាប់ការបោះឆ្នោតជ្រើ​ស​​រើសក្រុមប្រឹក្សាឃុំ-សង្កាត់អាណត្តិទី៥ ឆ្នាំ២០២២។ រីឯឆ្នាំ២០២៣ គឺគ.ជ.ប ត្រូវការបញ្ជីឈ្មោះបោះឆ្នោត ដែល​ត្រូវរៀបចំនៅឆ្នាំ២០២២ គឺជាបញ្ជីឈ្មោះបោះឆ្នោតមួយ ដែលអ្នកបោះឆ្នោតមានអាយុ ១៨ឆ្នាំឡើងទៅ គិតដល់ថ្ងៃ​បោះ​ឆ្នោត ជ្រើសតាំងតំណាងរាស្រ្ដនីតិកាលទី៧ ហើយត្រូវទៅចុះឈ្មោះបោះឆ្នោត នៅចុងឆ្នាំ២០២២ខាងមុខ។

អគ្គលេខាធិការរង គ.ជ.បរូបនេះ បានបញ្ជាក់បន្ថែមថា ប្រសិនបើប្រជាពលរដ្ឋរូបណា មិនមានឈ្មោះក្នុងបញ្ជី​បោះ​ឆ្នោ​តនាឆ្នាំ២០២១នេះទេ គឺមិនអាចបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ឆ្នាំ២០២២​នោះឡើ​យ​។ ចំណែកប្រជាពលរដ្ឋដែលត្រូវប្ដូរឃុំ-សង្កាត់ ចុះឈ្មោះបោះឆ្នោតនោះ ត្រូវមានឯកសារដូចជា៖ មានឈ្មោះក្នុង​បញ្ជី​បោះឆ្នោត, មានអត្តសញ្ញាណប័ណ្ណសញ្ជាតិខ្មែរ មានសុពលភាព, និងលិខិតបញ្ជាក់អំពីការប្ដូរលំនៅឋានជា​ដើម។

បើតាមលោក សោម សូរីដា គ.ជ.ប បានធ្វើការងារយ៉ាងជិតស្និត ជាមួយក្រសួងមហាផ្ទៃ ក៏ដូចជាអគ្គនាយកដ្ឋាន​អត្តសញ្ញាណកម្ម ក្នុងការធ្វើយ៉ាងណាជួយសម្រួល ដោះស្រាយបញ្ហានៃការធ្វើអត្តសញ្ញាណប័ណ្ណ ជូនប្រជាពលរដ្ឋ​ខ្មែរ ដែលគ្រប់អាយុ១៨ឆ្នាំ ក៏ដូចជាប្រជាពលរដ្ឋ ដែលមានអត្តសញ្ញាណប័ណ្ណ​ ហួសសុពលភាពផងដែរ។

តាមការប៉ាន់ស្មានរបស់គ.ជ.ប នៅឆ្នាំ២០២១នេះ គឺគ្រោងចុះឈ្មោះអ្នកបោះឆ្នោតថ្មីចំនួន ១,៦៣៥,៩៩០នាក់។ រីឯអ្នកដែលត្រូវលុបឈ្មោះចេញ ដោយសារបញ្ហាផ្សេងៗ គឺមានចំនួន ៨៣, ០៤៣នាក់៕

អត្ថបទ៖ ឃួន សុភ័ក្រ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

កីឡា៦ ថ្ងៃ មុន

ឈ្នះខ្សែក្រវាត់ថ្ងៃជាមួយ​ ឈឿង ល្វៃ កីឡាករ Erdene ក៏មានរថយន្តទទួល

ព័ត៌មានជាតិ៥ ថ្ងៃ មុន

ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅ​តែរឹងទទឹងមិនព្រមវាយកម្ទេចរបងចេញ

សន្តិសុខសង្គម៧ ថ្ងៃ មុន

ដកហូតមុខតំណែង មេបញ្ជាការរងស្រុកស្វាយជ្រុំ​៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ

ព័ត៌មានជាតិ៥ ថ្ងៃ មុន

ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល

ព័ត៌មានអន្ដរជាតិ៤ ថ្ងៃ មុន

អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ

Sokha Hotels

ព័ត៌មានពេញនិយម