កម្ពុជាប្រកាសផ្ដល់ជំនួយ ១៣លានដុល្លារ វ៉ាក់សាំងស៊ីណូវ៉ាក់៥០ម៉ឺនដូស និងរថយន្ត២គ្រឿងដល់ឡាវ

សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសផ្ដល់ជំនួយចំនួន១៣លានដុល្លារ ដល់ប្រទេសឡាវ ដែលក្នុងនោះ៣លានដុល្លារជាថវិកា​របស់រាជរដ្ឋាភិបាលកម្ពុជា និង ១០លានដុល្លារទៀត គឺជាថវិការបស់ក្រុមហ៊ុនឯកជន។ ជាមួយគ្នានេះ កម្ពុជា ក៏បានសម្រេចប្រកាសផ្ដល់ជំនួយវ៉ាក់សាំងស៊ីណូវ៉ាក់ចំនួន ៥០ ម៉ឺនដូស និងរថយន្តពីរគ្រឿងថែមទៀតជូនប្រទេសឡាវ ដើម្បីប្រយុទ្ធប្រឆាំងនឹងកូវីដ-១៩ ។ នេះបើតាមការបញ្ជាក់របស់សម្តេចតេជោ ហ៊ុន សែន នៅក្នុងជំនួបពិភាក្សាការងារជាមួយលោកនាយករដ្ឋមន្ត្រីឡាវនៅវិមានសន្តិភាពនាល្ងាចថ្ងៃទី ២៩ ខែ វិច្ឆិកា ២០២១។

លោក ផនខាំ វីផាវ៉ាន់ (Phankham Viphavanh) នាយករដ្ឋមន្ត្រីឡាវបានអបអរសាទរកម្ពុជាដែលទទួលបានជោគជ័យលើការគ្រប់វិស័យជាពិសេសគឺការទទួលធ្វើជា ម្ចាស់ផ្ទះនៃការរៀបចំកិច្ចប្រជុំកំពូលអាស៊ី-អឺរ៉ុប។ លោកសន្យាថា នឹងសហការជាមួយនឹងកម្ពុជាធ្វើយ៉ាងណាជួយកម្ពុជាដឹកនាំកិច្ចប្រជុំកំពូលអាស៊ាន។ លោកបានស្នើសម្ដេចតេជោបន្តពង្រឹងពង្រីកកិច្ចសហប្រតិបត្តិការទ្វេភាគីជាពិសេសគឺការបន្តកិច្ចសហប្រតិបត្តិការទ្វេភាគីគ្នាទៅវិញទៅមក ដើម្បីបញ្ចប់បញ្ហា​នៃការព្រមព្រៀងគ្នាជាពេលកន្លងមក។ ជាពិសេស គឺការចរចានឹងពិភាក្សាគ្នាធ្វើយ៉ាងណាបញ្ចប់កិច្ចព្រមព្រៀងកិច្ចសហប្រតិបត្តិការក្នុងភាព​ជាដៃគូគ្រប់ជ្រុងជ្រោយ។ ជំរុញឲ្យគណៈកម្មការចម្រុះនៃប្រទេសទាំងពីរបន្តធ្វើយ៉ាងណាសម្រេចនូវអ្វីដែលបានកំណត់ទុក ពិសេសកិច្ចសហប្រតិបត្តិការលើការ​ពាណិជ្ជកម្មទ្វេភាគី និងពង្រឹងកិច្ចសហប្រតិបត្តិការលើវិស័យអប់រំ វប្បធម៌ និងលើវិស័យទេសចរណ៍ ផ្សេងទៀត។ លើសពីនេះទៀត ក៏ជំរុញការវិនិយោគផ្នែកតំបន់ និងអន្តរជាតិផងដែរ។

សម្ដេចតេជោបានស្នើសុំឱ្យនាយករដ្ឋមន្ត្រីឡាវធ្វើយ៉ាងណាឲ្យប្រជាជនទាំងពីរអាចធ្វើដំណើរទៅវិញទៅមកដើម្បីដោះដូរពាណិជ្ជកម្មតាមព្រំដែន។សម្ដេចគាំទ្រការលើកឡើងក្នុងការជំរុញពាណិជ្ជកម្មទ្វេភាគី ដោយជំរុញការវិនិយោគរវាងប្រទេសទាំងពីរ ក្នុងការពង្រឹងនិងពង្រីកកិច្ច សហប្រតិបត្តិការទាំងផ្នែកនយោបាយ សេដ្ឋកិច្ចជាដើម ៕ ដោយ៖ណារី