ឆៃប៉ូវង៉ិច ស៊ីវ ​មានទីផ្សារល្អដោយសារ​រសជាតិឆ្ងាញ់​

សិប្បកម្មផលិតឆៃប៉ូវឆ្ងាញ់ ង៉ិច ស៊ីវ ​ស្ថិតនៅភូមិព្រែកស្នាយ ឃុំព្រែកគយស្រុកស្អាង ខេត្តកណ្ដាល មានការចាប់អារម្មណ៍ និងទទួលបានការគាំទ្រច្រើនពីអតិថិជន។

​ម្ចាស់សិប្បកម្មឆៃប៉ូវអ្នកនាង ង៉ិច សៀវ មានវ័យជាង ៣០ ឆ្នាំ ​បានប្រាប់កម្ពុជាថ្មីឲ្យដឹងថា សិប្ប​កម្មឆៃប៉ូវឆ្ងាញ់ ង៉ិច ស៊ីវ បានបង្កើតឡើងជាង ១០ ឆ្នាំមកហើយ ​ដែលនាងចេះបច្ចេកទេសតពី​លោក​យាយ​របស់ខ្លួន ប៉ុន្តែនាងបានបន្ថែមការច្នៃប្រឌិត។​

​អ្នកនាង ង៉ិច សៀវបន្តថា បច្ចេកទេសធ្វើពីមុន​របស់ចាស់ៗជំនាន់មុនគឺពួកគាត់​ធ្វើដាក់ក្រឡុកកញ្ជើ ហើយរោយអំបិល ​ប៉ុន្តែបច្ចុប្បន្ននេះ មិនធ្វើដូចចាស់ៗទេ គឺយើងកាត់ក្បាលកន្ទុយហើយ​ យើងរោយអំបិលយកតែម្ដង​ ហើយបានយកមកលាងទឹក។ «បច្ចេកទេសខុសគ្នា គាត់ធ្វើរបៀបរាងខ្មៅ តែយើងមិនចង់បានខ្មៅទេ ដោយយកទៅហាលល្មម កុំឲ្យត្រូវកម្ដៅពេក។ ពីដើមហាលឡើងខ្មៅ ឥឡូវអត់ទេ»។ នេះបើតាមការបញ្ជាក់របស់អ្នកនាង ង៉ិច សៀវ។

បើតាមម្ចាស់សិប្បកម្មឆៃប៉ូវង៉ិចស៊ីវរូបនេះ ទីផ្សារមានការកាម៉ង់ច្រើនជាពិសេស នៅតាមបណ្ដាខេត្ត និងរាជធានីភ្នំពេញ ហើយឆៃថាវ ដែលខ្លួនទទួលបាន ពីតាមខេត្តផ្សេងៗប្រមាណ១០ តោនក្នុង១ ឆ្នាំ។ ចំពោះតម្លៃលក់ចេញ ក្នុង១ គីឡូ ចាប់ពី ៤ ពាន់រៀល ដល់ ១ ម៉ឺន រៀល ទៅតាម​ប្រភេទឆៃប៉ូវ។

​កាលពីពេលថ្មីៗនេះ ​លោក ជី ស៊ីវុត្ថា នាយករងរដ្ឋបាលសាលាខេត្តកណ្ដាល បានដឹកនាំមន្ទីរជំនាញពាក់ព័ន្ធក្រុមការងារភូមិមួយផលិតផលមួយចុះធ្វើការត្រួតពិនិត្យទីតាំងប្រកបអាជីវកម្មសិប្បកម្មផលិតឆៃប៉ូវ (៩៩៩ ង៉ិចស៊ីវ ឆៃពៅពិសេស) នៅភូមិព្រែកស្នាយ ឃុំព្រែកគយស្រុកស្អាង ខេត្តកណ្ដាល ដោយត្រួតពិនិត្យលើអនាម័យល្អ ទីតាំងបរិស្ថានល្អ លក្ខណៈបច្ចេកទេសតាមស្តង់ដារ៕

អត្ថបទ៖ ឡេង ដេត