ឃាត់ខ្លួនជនសង្ស័យ ២នាក់ ពាក់ព័ន្ធនឹងគ្រឿងញៀន រួមទាំងដាវ និងកាំភ្លើងច្នៃ

ខេត្តតាកែវ៖ កម្លាំងការិយាល័យជំនាញប្រឆាំងបទល្មើសគ្រឿងញៀន ដឹកនាំដោយលោកអនុសេនីយ៍ទោ ហួត វឿន ជានាយការិយាល័យ ដោយមានការសម្របសម្រួលនីតិវិធីពីលោក ជីវ ចាន់តារា ព្រះរាជអាជ្ញាអមសាលាដំបូងខេត្តតាកែវ បានចុះបង្ក្រាបករណីជួញដូរប្រើប្រាស់នូវសារធាតុញៀនដោយខុសច្បាប់មួយករណី បានឃាត់ខ្លួនជនសង្ស័យ ២ នាក់ រួមទាំងអាវុធច្នៃ ១ ដើម នៅ ត្រង់ចំណុចភូមិត្រពាំងត្រកៀត ឃុំឧត្តមសូរិយា ស្រុកត្រាំកក់ ខេត្តតាកែវ នៅ វេលាម៉ោងម៉ោង១៤និង៣០នាទីថ្ងៃទី០៧ ខែធ្នូ ឆ្នាំ ២០២១។

ជនសង្ស័យទាំង ២ នាក់ មានឈ្មោះ យី ពុទ្រា (ហៅ ពៅ ) ភេទប្រុស អាយុ ២៥ ឆ្នាំ ជនជាតិខ្មែរ មុខរបរមិនពិតប្រាកដ (មានថ្នាំញៀន) រស់នៅ ភូមិត្រពាំងត្រកៀត ឃុំឧត្តមសូរិយា ស្រុកត្រាំកក់ ខេត្តតាកែវ និងឈ្មោះ អុីង សុផេន ភេទប្រុសអាយុ ២២ ឆ្នាំ ជនជាតិខ្មែរ មុខរបរមិនពិតប្រាកដ (មានថ្នាំញៀន) រស់នៅ រស់ភូមិរំពាក់ពេន ឃុំឧត្តមសូរិយា ស្រុកត្រាំកក់ ខេត្តតាកែវ។

ចំណែកវត្ថុតាងដកហូតបានរួមមាន ម្សៅក្រាម ស ថ្លាចំនួន ១១ កញ្ចប់ មានទម្ងន់សរុប ២៧,៩១ ក្រាម (ថ្លឹងទាំងសំបក់ថង់) ជញ្ជីងថ្លឹងថ្នាំញៀន ០១ សម្ភារៈសេពថ្នាំញៀនមួយចំនួន (ដបទឹកសុទ្ធ ០១ កែវសម្រាប់ជក់ ០២) ទូរស័ព្ទដៃ ០៤ គ្រឿង ម៉ូតូ ០២ គ្រឿង ដាវដែកចំនួន ០១ ដើម និងកាំភ្លើងកែឆ្នៃ ០១ ដើមផងដែរ។

បច្ចុប្បន្នជនសង្ស័យ រួមទាំងវត្ថុតាងត្រូវបានកម្លាំងការិយាល័យជំនាញនៃកងរាជអាវុធហត្ថខេត្តតាកែវ សាកសួរដើម្បីកសាងសំណុំរឿងបញ្ជូនទៅ សាលាដំបូងខេត្តតាកែវចាត់ការតាមនីតិវិធី៕

អត្ថបទ៖ វីរៈ