ឃាត់ខ្លួន​ជនសង្ស័យម្នាក់​ពាក់ព័ន្ធករណី​ជួញដូរ និង​ចែកចាយ​គ្រឿងញៀន​ជាង៤០កញ្ចប់​

ស្នងការនគរបាលខេត្តឧត្តរមានជ័យ នៅថ្ងៃទី ២៧ ខែធ្នូ ឆ្នាំ ២០២១ បានចុះបង្ក្រាបមុខសញ្ញាជួញដូរ និងប្រើប្រាស់គ្រឿងញៀនមួយករណី ឃាត់ខ្លួនបុរសជនសង្ស័យម្នាក់ នៅភូមិអភិវឌ្ឍន៍ ឃុំអន្លង់វែង ស្រុកអន្លង់វែង ខេត្តឧត្តរមានជ័យ។

បុរសជនសង្ស័យឈ្មោះ គឹម ច័ន្នសុភ័ក្តិ អាយុ ៣៩ឆ្នាំ រស់នៅភូមិអភិវឌ្ឍន៍ ឃុំអន្លង់វែង ស្រុកអន្លង់វែង ខេត្តឧត្តរមានជ័យ។

ប្រតិបត្តិមានការដឹកនាំបញ្ជាផ្ទាល់ ពីលោកឧត្តមសេនីយ៍ទោ ហួត សុធី ស្នងការនគរបាលខេត្ត និងមានការដឹកនាំសម្របសម្រួលនិតិវិធី ពីឯកឧត្តម តូច សុភក្តី ព្រះរាជអាជ្ញាអមសាលាដំបូងខេត្ត ព្រមទាំងមានការចង្អុលបង្ហាញ ពីលោកវរសេនីយ៍ឯក ស៊ីម វណ្ណៈ ស្នងការរងទទួលផែនការងារប្រឆាំងគ្រឿងញៀន លោកវរសេនីយ៍ទោ ស៊ូ នូវ អធិការនគរបាលស្រុក បានដឹកនាំកម្លាំងផែនការងារប្រឆាំងគ្រឿងញៀន និងកម្លាំងអន្តរាគមន៍។

វត្ថុតាងថ្នាំញៀនមេតាំហ្វេតាមីនប្រភេទម៉ាទឹកកក ( ICE ) ចំនួន ៤៨ កញ្ចប់ (កញ្ចប់ធំ ៤០កញ្ចប់, កញ្ចប់តូច ៨កញ្ចប់ ) ទម្ងន់ ៧៧៤ ក្រាម។ បច្ចុប្បន្នសមត្ថកិច្ចកំពុងកសាងសំណុំរឿង អនុវត្តតាមនីតិវិធី៕

អត្ថបទ៖ ចាន់ ធី