លោក ឌួង ងៀប ត្រូវបញ្ជូនទៅកាន់តុលាការមុននេះ ដោយសារជាប់ពាក់ព័ន្ធនឹងលុយ ១០លានដុល្លារ

សមត្ថកិច្ចរាជធានីភ្នំពេញ បានបញ្ជូនខ្លួនអតីតឧកញ៉ា ឌួង ងៀប ដែលជាឧត្តមសេនីយ៍ផ្កាយ ៣ នៅក្រសួង​មហាផ្ទៃ ទៅកាន់សាលាដំបូងរាជធានីភ្នំពេញហើយ បន្ទាប់ពីចាប់ខ្លួននៅព្រឹកថ្ងៃទី ១៤ ខែកុម្ភៈ ឆ្នាំ ២០២២នេះ។

ប្រភពព័ត៌មានច្បាស់ការ ពីសាលាដំបូងរាជធានីភ្នំពេញ បានឲ្យដឹងថា សមត្ថកិច្ចរាជធានីភ្នំពេញ បានឃាត់ខ្លួនឈ្មោះ ឌួង ងៀប អតីតឧកញ៉ា និងជាឧត្តមសេនីយ៍ផ្កាយ៣នៅក្រសួងមហាផ្ទៃ នៅព្រឹកថ្ងៃច័ន្ទនេះ។

ប្រភពបានបញ្ជាក់ថា ការឃាត់ខ្លួនលោក ឌួង ងៀប គឺអនុវត្តតាមដីកាបង្គាប់ឲ្យចាប់ខ្លួន របស់ចៅក្រមស៊ើបសួរ សាលាដំបូងរាជធានីភ្នំពេញ លោក អ៊ឹម វណ្ណៈ ពាក់ព័ន្ធនិងបទល្មើស «មិនបំពេញកាតព្វកិច្ច ចំពោះឧបករណ៍ដែលអាចជួញដូរបាន» មានទឹកប្រាក់ប្រមាណ ១០លានដុល្លារ ដែលត្រូវបានប្ដឹង ដោយអ្នកវិនិយោគជនជាតិចិនតៃវ៉ាន់។

គិតត្រឹមម៉ោង ១១កន្លះ ថ្ងៃទី ១៤ ខែកុម្ភៈ ឆ្នាំ ២០២២នេះ លោក ឌួង ងៀប ត្រូវបានតុលាការសម្រេចឃុំខ្លួន នៅពន្ធនាគារប៉េហ្ស៊ីហើយ៕

អត្ថបទ៖ មករា