ឆេះឃ្លាំងស្តុបសម្ភារៈក្នុងសាកលវិទ្យាល័យភូមិន្ទភំ្នពេញអស់ទាំងស្រុង

អគ្គិភ័យមួយបានឆាបឆេះឃ្លាំងស្តុបកៅអីចាស់ៗ និងក្តារខៀនអស់ទាំងស្រុង នៅក្នុងសាកលវិទ្យាល័យភូមិន្ទភំ្នពេញ បង្កការភ្ញាក់​ផ្អើលកាលពីវេលាម៉ោង០៧និង១០នាទីយប់ ថ្ងៃទី២៨ ខែមីនា ឆ្នាំ២០២២ តាមបណ្ដោយផ្លូវសហព័ទ្ធរុស្សី ភូមិ១៦ ក្រុម៦១ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ។

សមត្ថកិច្ចបានឱ្យដឹងថា ឃ្លាំងដែលឆាបឆេះខាងលើប្រភេទ ថ្មបេងតុងទំហំ៨ម៉ែត្រx២៥ម៉ែត្រ ។ សម្ភារៈដែលខូចខាតមានកៅអីចាស់ៗ ក្តារខៀនអស់ទាំងស្រុង និងពុំបណ្ដាលឱ្យឆេះរាលដាលដល់អ្នកក្បែរខាងឡើយ ។

ក្នុងហេតុការណ៍នេះមិនបណ្ដាលឲ្យមនុស្សណាម្នាក់ស្លាប់ឬរងរបួសនោះទេដោយកម្លាំងអន្តរាគមន៍បង្ការពន្លត់អគ្គិភ័យបានប្រើប្រាស់ រថយន្តការិយាល័យអគ្គិភ័យ ចំនួន០៨គ្រឿង ប្រើប្រាស់ទឹកអស់០៥រថយន្ត ស្មើរនឹង២០ម៉ែត្រគូប និងពន្លត់ចប់នៅវេលាម៉ោង  ០៨និង០០នាទីយប់ថ្ងៃខែឆ្នាំដដែល ។ សមត្ថកិច្ចបញ្ជក់ថា មូលហេតុនៃការឆាបឆេះខាងលើបណ្តាលមកពីឆ្លងចរន្តអគ្គិសនី៕

អត្ថបទ៖ សុខា