Update ៖ ក្រុមរថយន្ដចង្កូតស្តាំយល់ព្រមបើកផ្លូវវិញហើយ ក្រោយមានតំណាងក្រសួងមកទទួលសំណើ

យោងតាមប្រភពព័ត៌មានពីសមត្ថកិច្ចខណ្ឌដង្កោ ប្រាប់អោយដឹងថា កាលពីព្រឹកថ្ងៃទី០៥ ខែកក្កដា ឆ្នាំ២០២២ មានតៃកុងឡានដឹកដីចង្កូតស្តាំប្រភេទ៥តោន បាននាំគ្នាយករថយន្តមកបិទផ្លូវត្រង់ចំណុចរង្វង់មូលគួរស្រូវ ស្ថិតក្នុងភូមិកណ្តាល សង្កាត់រលួស ខណ្ឌដង្កោ រាជធានីភ្នំពេញ ។

មនុស្សប្រហែល២០០នាក់ រថយន្តប្រហែល១៧៥គ្រឿង បានធ្វើការតវ៉ាបិតផ្លូវទាំងស្រុង (ទាំងបួនច្រក) នៅរង្វង់មូលគួរស្រូវ ដោយសុំទាមទារចំនួន០១ចំណុច ៖ សុំទាមទារបង់ពន្ធ តែសុំមិនកែចង្កូច។

ប្រភពព័ត៌មានប្រាប់បន្តថា សកម្មភាពតវ៉ាបិតផ្លូវនេះ អូសបន្លាយរហូតវេលាម៉ោងជាង១២ ថ្ងៃខែឆ្នាំដដែល ទើបមានតំណាងក្រសួងសាធារណៈការនិងដឹកជញ្ជូន ដឹកនាំដោយលោក សូរ ពិសី អគ្គនាយករង នៃអគ្គនាយកដ្ឋានសាធារណៈការ និងដឹកជញ្ជូន ដោយមានការចូលរួមពីលោកស្រី គឹម ញឹប អភិបាលខណ្ឌដង្កោ លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានទទួលយកសំណើររបស់ពួកគាត់ទៅរាយការណ៍ជូនថ្នាក់ដឹកនាំ ដើម្បីសុំគោលការបន្ត ទើបពួកគាត់បានរំសាយទៅវិញនៅវេលាម៉ោង១២និង៣៥នាទី ថ្ងៃខែឆ្នាំដដែលដោយមិនធ្វើការបិទផ្លូវទៀតទេ ៕

អត្ថបទ៖ រ៉ាវុទ្ធ