ចាប់ខ្លួនឧត្តមសេនីយ៍ផ្កាយពីរក្លែងក្លាយបញ្ជូនទៅតុលាការ

កម្លាំងអាវុធហត្ថរាជធានីភ្នំពេញ បានស្រាវជ្រាវនិងឃាត់ខ្លួនជនសង្ស័យជាអ្នកគក់ជេរដី និងជាតៃកុងរថយន្ដម្នាក់ដែលក្លែងខ្លួនជាឧត្តមសេនីយ៍ផ្កាយពីរ និងក្លែងឯកសាររត់ការចូលក្របខ័ណ្ឌបោកលុយជនរងគ្រោះជិត១ម៉ឺនដុល្លារ។

ការឃាត់ខ្លួននេះបានធ្វើឡើងនៅចំណុចមុខផ្សារបុរីពិភពថ្មីកំបូល៣ ភូមិថ្មដា សង្កាត់កន្ទោក ខណ្ឌកំបូល រាជធានីភ្នំពេញ។ ជនសង្ស័យមានឈ្មោះ ផន ច័ន្ទផានិត មានមុខរបរត្រឹមតែជាអ្នកគួកជេរដី និងជាតៃកុងឡានប៉ុណ្ណោះ ក្នុងនោះកម្លាំងអាវុធហត្ថបានចាប់យកអាវុធខ្លីកែច្នៃ០១ដើម ពុំមានម៉ាក និងឯកសារក្លែងមួយចំនួនពីជនសង្ស័យផងដែរ។

សូមបញ្ជាក់ថា កាលពីថ្ងៃទី០១ ខែមេសា ឆ្នាំ២០២៣ អាវុធហត្ថរាជធានីភ្នំពេញ បានទទួលពាក្យបណ្តឹងពីជនរងគ្រោះម្នាក់ សុំប្តឹងជនសង្ស័យឈ្មោះ ផន ច័ន្ទផានិត ពាក់ព័ន្ធករណីឆបោក និងក្លែងឯកសារសារធារណៈ ដោយជនសង្ស័យបានអះអាងចំពោះមុខជនរងគ្រោះថា ខ្លួនពាក់ស័ក្តិ ឧត្តមសេនីយ៍ទោ ជាដៃស្តាំឯកឧត្តម ហ៊ុន ម៉ាណែត គឺអាចជួយឲ្យជនរងគ្រោះចូលក្របខ័ណ្ឌបាន តែត្រូវប្រគល់ប្រាក់ ១០,០០០ដុល្លារ ហើយជនសង្ស័យបានបង្ហាញរូបថតដែលមានរូបខ្លួនថតជាមួយឯកឧត្តម ហ៊ុន ម៉ាណែត និងថតជាមួយថ្នាក់ដឹកនាំផ្សេងទៀត ទៅជនរងគ្រោះមើលទើបធ្វើឲ្យជនរងគ្រោះ មានការជឿទុកចិត្តព្រមប្រគល់ប្រាក់ជាដំណាក់កាលឲ្យទៅជនសង្ស័យដើម្បីរត់ការចូលក្របខ័ណ្ឌ។ ជនសង្ស័យបានឲ្យជនរងគ្រោះផ្ញើប្រវត្តិរូបផ្ទាល់ខ្លួន រូបថត និងឯកសារផ្សេងៗ ដើម្បីបំពេញបែបបទបញ្ចូលក្របខ័ណ្ឌ។ បន្ទាប់មកជនសង្ស័យក៏បានប្រគល់អត្តសញ្ញាណប័ណ្ណកងទ័ព និងលិខិតបញ្ជាបេសកកម្មទៅជនរងគ្រោះប្រើប្រាស់។

ក្រោយមកជនរងគ្រោះបានសួររកប្រាក់ខែរដ្ឋ អង្គភាព និងមេកើយ ស្រាប់តែជនសង្ស័យបានប្រាប់ថា ចាំសួរថ្នាក់លើឲ្យ និងរកលេសដោះសាររហូត ទើបជនរងគ្រោះដឹងថា ខ្លួនត្រូវបានចាញ់បោកគេក៏ដាក់ពាក្យបណ្តឹងនៅកងរាជអាវុធហត្ថ រាជធានីភ្នំពេញតែម្តង។

តាមចម្លើយសារភាពរបស់ជនសង្ស័យបានទទួលស្គាល់ថា ខ្លួនពិតជាបានទទួលប្រាក់ពីជនរងគ្រោះដើម្បីរត់ការចូលក្របខ័ណ្ណពិតប្រាកដមែន ដែលការរត់ការចូលក្របខ័ណ្ឌនេះ គឺខ្លួនបានក្លែងឯកសារប្រគល់ឲ្យ ជនរងគ្រោះ និងបានទទួល​លុយពីជនរងគ្រោះទើបតែបាន៨,០០០ដុល្លារប៉ុណ្ណោះ ក៏ត្រូវជនរងគ្រោះចាប់ចំណុចខ្សោយបាន។ បច្ចុប្បន្នជនសង្ស័យត្រូវបានអាវុធហត្ថរាជធានីភ្នំពេញ កសាងសំណុំរឿង បញ្ជូនទៅតុលាការតាមនិតិវិធី៕

អត្ថបទ៖ សុខុម