កម្លាំងអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ បានចុះប្រតិបត្តិការបង្ក្រាបរថយន្ដមួយគ្រឿងដែលនាំចូលសត្វមាន់រស់ និងស៊ុតពីប្រទេសវៀតណាមដោយគ្មានលិខិតអនុញាត។

ប្រតិបត្តិការចុះបង្ក្រាបនេះ បានធ្វើឡើងកាលពីវេលាម៉ោង០៣និង០៥នាទីទៀបភ្លឺ ថ្ងៃទី០៩ ខែឧសភា ឆ្នាំ២០២៣ នៅលើផ្លូវជាតិលេខ១ ចំណុចភូមិ១ ឃុំព្រែកខ្សាយ(ខ) ស្រុកពាមរក៍ ខេត្តព្រៃវែង។

លោក ហ៊ុន សារ៉ាត់ ប្រធានក្រុមការងារអន្តរាគមន៍បង្ក្រាបបទល្មើសចរាចរណ៍សត្វ និងផលិតផលមានដើមកំណើតពីសត្វ បានឲ្យដឹងនៅព្រឹកថ្ងៃទី៩ ខែឧសភា នេះថា ការចុះបង្ក្រាបនេះបានធ្វើឡើងក្រោមការបញ្ជាផ្ទាល់ពីឯកឧត្តម តាន់ ផាន់ណារ៉ា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ ដោយបានឃាតរថយន្ដមួយគ្រឿងម៉ាក HYUNDIA ពណ៌ស ជាប្រភេទរថយន្តដឹកទំនិញចំណុះ ២.៥តោន ពាក់ស្លាក​លេខភ្នំពេញ ៣F-៨៣៦៤ ដឹកសត្វមាន់រស់ចំនួន១៣៧០ក្បាល និងស៊ុតមាន់ចំនួន១៨០០០គ្រាប់ ដែលលួចនាំចូល​ពីប្រទេសវៀតណាម តាមច្រកស្វាយអាង៉ោង ស្រុកកំពង់ត្របែក ខេត្តព្រៃវែង និងបន្តឆ្ពោះទៅលក់ចែកចាយនៅរាជធានីភ្នំពេញ ដោយគ្មានលិខិតអនុញ្ញាតអ្វីទាំងអស់។

ក្រោយពីឃាត់ និងឆែកឃើញ កម្លាំងបាននាំយកបទល្មើស និងវត្ថុតាងទាំងនោះទៅរក្សាទុកនៅទីតាំងចត្តាឡីស័កសត្វរបស់អគ្គនាយកដ្ឋានសុខភាពសត្វ និងផលិតកម្មសត្វ ដើម្បីចាត់ការទៅតាមនីតិវិធីច្បាប់៕

អត្ថបទ៖ សុខុម