អាជ្ញាធរខណ្ឌមានជ័យឃាត់រថយន្តគ្លីនិកឯកជន​៣គ្រឿងដែលល្មើសបម្រាម

រថយន្តគ្លីនិកឯកជនចំនួន៣គ្រឿង ត្រូវបានកម្លាំងអាជ្ញាធរខណ្ឌមានជ័យ ក្រោមបញ្ជាពីលោក ហែម ដារិទ្ធ អភិបាលខណ្ឌមានជ័យ ចាប់ឃាត់នាំយកទៅរក្សាទុកនៅរដ្ឋបាលខណ្ឌកាលពីយប់ថ្ងៃទី២៥ ខែឧសភា ឆ្នាំ២០២៣ បន្ទាប់ពីក្រុមរថយន្តទាំងនោះ បន្តធ្វើសកម្មភាពល្មើសបម្រាមរបស់ក្រសួងសុខាភិបាល ដោយចេញដឹកសពជនរងគ្រោះ ក្នុងករណីគ្រោះថ្នាក់ចរាចរណ៍ និងគ្រោះថ្នាក់ផ្សេងៗ។

តាមការលើកឡើងរបស់ប្រជាពលរដ្ឋ រថយន្តគ្លីនិកឯកជនមួយចំនួននៅតែផ្គើនទៅនឹងបម្រាមរបស់ក្រសួងសុខាភិបាល ដែលបានហាមឃាត់ ដោយលួចធ្វើសកម្មភាពចេញទៅដឹកសពជនរងគ្រោះគ្រោះថ្នាក់ចរាចរណ៍ គ្រោះថ្នាក់ផ្សេងៗ ហើយការដឹកសពជនរងគ្រោះនោះ គិតតម្លៃសេវាកប់ពពកហួសហេតុពេក ក្នុង១គីឡូម៉ែត្រ៣០ដុល្លារទៅ៤០ដុល្លារ ។

ពលរដ្ឋបន្តទៀតថា រថយន្តគ្លីនិកមួយចំនួនតែងតែរត់ដណ្តើមយកជនរងគ្រោះបង្កភាពអាណាធិបតេយ្យរហូតដល់ឈ្លោះបង្កហិង្សាដាក់គ្នាជារឿយៗ ។

ដោយសារបាតុភាពទាំងនេះ ទើបក្រសួងសុខាភិបាល ដាក់ផែនការឲ្យសមត្ថកិច្ចអាជ្ញាធរមូលដ្ឋានសហការចាត់វិធានការ ទៅលើរថយន្តគ្លីនិកឯកជនណាប្រព្រឹត្តល្មើសនឹងបម្រាមរបស់ក្រសួងសុខាភិបាល។ ហើយនៅយប់ថ្ងៃទី២៥ ខែឧសភា ឆ្នាំ២០២៣ កម្លាំងអាជ្ញាធរខណ្ឌមានជ័យ តាមចាប់ឃាត់បានរថយន្តគ្លីនិកឯកជនបានចំនួន៣គ្រឿង នៅក្នុងភូមិសាស្ត្រខណ្ឌមានជ័យ រួចយកទៅរក្សាទុកនៅរដ្ឋបាលខណ្ឌមានជ័យ ដើម្បីចាត់ការតាមនីតិវិធី៕

អត្ថបទ៖ សុខា