ត្រឹម២ថ្ងៃ រុស្ស៊ី ជួបហេតុការណ៍រន្ធត់ផ្ទួនៗ ផ្តាច់ជីវិតមនុស្សរាប់សិបនាក់

ត្រឹមរយៈពេល២ថ្ងៃប៉ុណ្ណោះ ប្រទេសរុស្ស៊ី ត្រូវរងគ្រោះដោយហេតុការណ៍ដ៏រន្ធត់ចំនួន២លើកផ្ទួនៗគ្នា ឆក់យកជីវិតមនុស្សរាប់សិបនាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ទីមួយគឺ ការវាយប្រហារភេរវកម្មបណ្តាក់គ្នាទៅលើមន្ត្រីប៉ូលិស និងវិហារសាសនាគ្រិស្ត ក្នុងសាធារណរដ្ឋ Dagestan ភាគខាងត្បូងកាលពីថ្ងៃអាទិត្យទី២៣ខែមិថុនាឆ្នាំ២០២៤ ដែលបានផ្តាច់ជីវិតប៉ូលិសចំនួន១៥នាក់ និងជនស៊ីវិលរាប់សិបនាក់ទៀត។

តាមសេចក្តីរាយការណ៍ ខ្មាន់កាំភ្លើងមិនស្គាល់មុខមួយក្រុម បានបើកការបាញ់ប្រហារទៅលើអគារនានាដោយអាវុធស្វ័យប្រវត្តិ និងថែមទាំងដុតកម្ទេចព្រះវិហារមួយចំនួនផងដែរ មុនពេលរត់គេចពីកន្លែងកើតហេតុ។

អំពើភេរវកម្មនេះកើតឡើងក្នុងទីក្រុង Derbent និង Makhachkala អំឡុងពិធីបុណ្យ Pentecost ខណៈអ្នកស្លាប់រួមមាន ប៉ូលិស អាចារ្យ និង​សន្តិសុខ ចំណែក ខ្មាន់កាំភ្លើងចំនួន៦នាក់ ក៏ត្រូវសម្លាប់នៅនឹងកន្លែងផងដែរ។

ត្បិតតែហេតុផលនៅពីក្រោយរឿងរ៉ាវដ៏រន្ធត់នេះ មិនទាន់ត្រូវបានបញ្ជាក់ច្បាស់ក៏ដោយ ប៉ុន្តែគេដឹងថា សាធារណរដ្ឋ Dagestan ធ្លាប់មានប្រវត្តិនៃការវាយប្រហាររបស់ក្រុមអ្នកកាន់សាសនាឥស្លាម។

ហេតុការណ៍ទីពីរ គឺករណីអគ្គិភ័យយ៉ាងសាហាវ ឆាបឆេះអគារការិយាល័យដ៏ធំមួយក្នុងតំបន់ Fryazino ក្បែរទីក្រុង មូស្គូ ដែលបានផ្តាច់ជីវិតមនុស្សចំនួន៨នាក់ កាលពីថ្ងៃចន្ទទី២៤ខែមិថុនាឆ្នាំ២០២៤។

មន្ត្រីមកពីក្រសួងសង្គ្រោះបន្ទាន់និយាយថា កងពន្លត់អគ្គិភ័យជាង១៣០នាក់ និងឧទ្ធម្ភាគចក្រ២គ្រឿង ត្រូវបានបញ្ជូនទៅជួយពន្លត់ភ្លើងនេះ។

ទោះបីជាយ៉ាងណាក៏ដោយ ភ្លាមៗ គេនៅមិនទាន់ដឹងច្បាស់ទេថា មូលហេតុបង្កគ្រោះកាចនេះគឺបណ្តាលមកពីអ្វី ប៉ុន្តែសាក្សីម្នាក់បានប្រាប់សារព័ត៌មាន Tass ថា អគ្គិភ័យបានផ្ទុះឡើងនៅជាន់ទី៦ មុនពេលរីករាលដាលឆាបឆេះយ៉ាងសន្ធោសន្ធៅ៕

អត្ថបទ៖ សុខ សុវណ្ណ

ចុចអាន៖ ការវាយប្រហារភេរវកម្មបណ្តាក់គ្នាដ៏រន្ធត់នៅរុស្ស៊ី ផ្តាច់ជីវិតមនុស្សរាប់សិបនាក់