គណបក្សនយោបាយថ្មី២ ត្រូវបានបង្កើតឡើងក្នុងអាណត្តិនាយករដ្ឋមន្រ្តី សម្តេចធិបតី

សម្ដេចធិបតី ហ៊ុន ម៉ាណែត បានចូលកាន់តំណែងជានាយករដ្ឋមន្ត្រីកម្ពុជាផ្លូវការ នៅថ្ងៃទី២២ ខែសីហា ឆ្នាំ២០២៣ ចាប់តាំងពីពេលនោះមកទល់ដើមខែមិថុនា ឆ្នាំ២០២៤ នេះ មានគណបក្សនយោបាយចំនួន២ បានបង្កើតឡើង គឺគណបក្សជំនាន់ថ្មី និងគណបក្សដើម្បីកម្ពុជា។

គណបក្សជំនាន់ថ្មី ត្រូវបានឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អនុញ្ញាតឱ្យបង្កើតជាផ្លូវការកាលពីថ្ងៃទី២៨ ខែកញ្ញា ឆ្នាំ២០២៣ ពោលគឺរយៈពេលត្រឹមតែជាងមួយខែតែប៉ុណ្ណោះ ក្រោយការចូលកាន់តំណែងរបស់សម្ដេចធិបតី។ បន្តមកនៅថ្ងៃទី១២ ខែមេសា ឆ្នាំ២០២៤ លោក ស សុខា រដ្ឋមន្ត្រីក្រសួងមហាផ្ទៃ សម្រេចចុះឈ្មោះបក្សជំនាន់ថ្មី ទៅក្នុងបញ្ជីគណបក្សនយោបាយ នៅក្រសួងមហាផ្ទៃ។ រំលងបានជិត២ខែ ក្រោយក្លាយជាបក្សនយោបាយស្របច្បាប់ ទើបបក្សជំនាន់ថ្មី រៀបចំសមាជរបស់ខ្លួនជាលើកដំបូងបង្អស់ ដោយសម្រេចបោះឆ្នោតគាំទ្រឱ្យលោក មាជ សុវណ្ណរ៉ា អតីតមន្ត្រីជាន់ខ្ពស់ អតីតបក្សសង្គ្រោះជាតិ ធ្វើជាប្រធានគណបក្ស។

ឯគណបក្សដើម្បីកម្ពុជា ត្រូវបានលោករដ្ឋមន្ត្រីក្រសួងមហាផ្ទៃ អនុញ្ញាតឱ្យបង្កើតជាផ្លូវការកាលពីថ្ងៃទី២៧ ខែតុលា​ ឆ្នាំ២០២៣ និងនៅថ្ងៃទី៩ ខែឧសភា សម្រេចចុះបញ្ជីគណបក្សដើម្បីខ្មែរ របស់លោក ឯម សុខសុវណ្ណ អតីតមន្ត្រីជាន់ខ្ពស់គណបក្សយុវជនកម្ពុជា ទៅក្នុងបញ្ជីគណបក្សនយោបាយ នៅក្រសួងមហាផ្ទៃកម្ពុជា។

ជាការកត់សម្គាល់ ថ្នាក់ដឹកនាំបក្សនយោបាយថ្មីកើតក្រោយការចូលកាន់តំណែងជានាយករដ្ឋមន្ត្រីនីតិកាលទី៧នេះ គឺសុទ្ធតែអ្នកនយោបាយមកពីបក្សប្រឆាំង៕

ដោយ៖ ង៉ិល ណារ៉ាត់