Update៖ សមត្ថកិច្ចចាប់ខ្លួនជនសង្ស័យម្នាក់ ក្នុងហេតុការណ៍ផ្ទុះអាវុធ នៅក្នុងបុរីប៉េងហួតបឹងស្នោ

សមត្ថកិច្ច បានចាប់ឃាត់ខ្លួនជនសង្ស័យម្នាក់ នៅក្នុងហេតុការណ៍ផ្ទុះអាវុធ នៅទីតាំងបុរីប៉េងហួតបឹងស្នោ ខណ្ឌច្បារអំពៅ រាជធានីភ្នំពេញ នៅវេលាម៉ោង៣៖៥០នាទី រសៀលថ្ងៃ ទី១៧ខែមិថុនា នេះ។ នេះបើតាមមន្ត្រីជំនាញមកពីកងរាជអាវុធហត្ថរាជធានីភ្នំពេញបានប្រាប់កម្ពុជាថ្មីមុននេះ។

ទោះជាយ៉ាងណាសមត្ថកិច្ចមិនទាន់បានបញ្ជាក់ពីអត្តសញ្ញាណជនសង្ស័យឡើយ។

គួរឱ្យដឹងថា តាមចម្លើយរបស់សាក្សីដែលជាជនរងគ្រោះម្នាក់នៅក្នុងហេតុការណ៍នោះ បានឱ្យដឹងថា មុនពេលកើតហេតុ គាត់ និងម្ចាស់ផ្ទះជនរងគ្រោះកំពុងតែបំពេញកាងារ សុខៗក៏ស្រាប់តែលេចមុខជនល្មើសដើរលបចូលមកក្នុងផ្ទះរួចនិយាយគ្នាចុះឡើងរឿងហាលខោអាវ រហូតដល់តឹងសសៃករដាក់គ្នា។

ភ្លាមៗស្រាប់តែ ជនល្មើសទ្រាំមិនបានក៏ដកកាំភ្លើងខ្លីពីចង្កេះបាញ់ជាច្រើនគ្រាប់តែម្ដង រួចក៏រត់គេចខ្លួនតាមរថយន្ត ហើយក្នុងពេលធ្វើដំណើរដល់ខណ្ឌឬស្សីកែវក៏ផ្លុងរថយន្តចោល រួចបន្តជិះម៉ូតូ Zoomer Xគេចខ្លួន តែត្រូវសមត្ថកិច្ចតាមចាប់បាន៕

ដោយ៖ នរា