ទីក្រុង Barcelona ប្រកាសឈប់ជួលអាផាតមិនឲ្យទេសចរបរទេស ត្រឹមឆ្នាំ​២០២៨

ទីក្រុង Barcelona ដែលជាគោលដៅទេសចរណ៍វិស្សមកាលដ៏ពេញនិយមរបស់អេស្ប៉ាញ បានប្រកាសថា ខ្លួននឹងបញ្ឃប់ការជួលអាផាតមិនដល់ភ្ញៀវទេសចរទៀតហើយនៅត្រឹមឆ្នាំ២០២៨ ដែលនេះគឺជារឿងគ្រប់គ្នាមិននឹកស្មានដល់ ខណៈទីក្រុងព្យាយាមដំឡើងថ្លៃផ្ទះ។ នេះបើយោងតាមការចេញផ្សាយរបស់សារពត៌មាន CNN កាលពីថ្ងៃទី​​២៤ ខែ មិថុនា។

យោងតាមអភិបាលក្រុងលោក Jaume Collboni បានឲ្យដឹងថា ត្រឹមខែវិច្ឆិកាឆ្នាំ ២០២៨ ទីក្រុង Barcelona នឹងលុបចោលអាជ្ញាប័ណ្ណនៃអាផាតមិនចំនួន ១០ ១០១ ដែលបច្ចុប្បន្នត្រូវបានអនុម័តជាការជួលរយៈពេលខ្លី។

ការជួលរយៈពេលខ្លីកាន់តែខ្លាំងឡើងៗនៅទីក្រុងBarcelona ធ្វើឲ្យអ្នកស្រុកមួយចំនួនមិនអាចទិញអាផាតមិនបានទេបន្ទាប់ពីការជួលបានកើនឡើង ៦៨ ភាគរយ ក្នុងរយៈពេល ១០ ឆ្នាំកន្លងមក ហើយតម្លៃទិញផ្ទះក៏បានកើនឡើង ៣៨ ភាគរយ ជាពិសេសសម្រាប់យុវជនដែលមិនមានលទ្ធភាពគ្រប់គ្រាន់ផងដែរ។

គួរបញ្ជាក់ថាអេស្ប៉ាញជាប់ចំណាត់ថ្នាក់ក្នុងចំណោមប្រទេសដែលមានអ្នកទេសចរច្រើនជាងគេបំផុតទាំង ៣ នៅលើពិភពលោក ប៉ុន្តែបញ្ហាតម្លៃនៃការជួលផ្ទះ និងម្ចាស់ផ្ទះជួលឲ្យទេសចរកប្រាក់កម្រៃបានសន្ធឹកសន្ធាប់ បានក្លាយជាប្រធានបទក្តៅនៅទូទាំងទ្វីបអឺរ៉ុប។

ទាក់ទងនឹងបញ្ហានេះសមាគមអាផាតមិនទេសចរណ៍ Barcelona APARTUR បានចេញសេចក្តីថ្លែងការណ៍មួយថា លោកអភិបាលក្រុង Collboni កំពុងសាងកំហុសនាំទៅរកភាពក្រីក្រ និងភាពគ្មានការងារធ្វើ ហើយការហាមឃាត់នេះនឹងបង្កឱ្យមានការកើនឡើងនៃអាផាតមិនទេសចរណ៍ខុសច្បាប់ ជាក់ជាមិនខាន។

មិនមានអាផាតមិនទេសចរណ៍ថ្មីត្រូវបានអនុញ្ញាតឲ្យសាងសង់នៅក្នុងទីក្រុងនេះទេ នារយៈពេលប៉ុន្មានឆ្នាំចុងក្រោយនេះ ខណៈរដ្ឋាភិបាលក្នុងតំបន់បានបញ្ជាឱ្យបិទផ្ទះល្វែងទេសចរណ៍ខុសច្បាប់ចំនួន ៩ ៧០០ ចាប់តាំងពីឆ្នាំ ២០១៦មក៕

អត្ថបទ៖ ប៊ុន សុភាព