អ្នកមិនអើពើបង់ថ្លៃសំរាម ដល់ពេលពិន័យ ខណៈភ្នាក់ងារអសកម្ម ក៏គួរដកចេញ

ការអនុវត្តលើការផាកពិន័យសំរាមដល់ពេលហើយ មិនគួរបណ្តែតបណ្តោយទៀតទេ ចំពោះអ្នកមិនអើពើលើការបង់ថ្លៃសំរាម ហើយចំពោះភ្នាក់ងារអសកម្មនឹងការងារ ក៏គួរដកចេញ ឬរំសាយចោលដែរ ដើម្បីឱ្យការងារនេះកាន់តែមានប្រសិទ្ធិភាព។

នេះជាការព្រមានរបស់ លោក ហួត ហៃ អភិបាលរងរាជធានីភ្នំពេញ ខណៈលោកកោះអញ្ជើញអាជ្ញាធរខណ្ឌទាំង ១៤សង្កាត់ និងក្រុមហ៊ុនប្រមូលសំរាមដែលជាភ្នាក់ងារប្រមូលសំរាម មកធ្វើណែនាំលើការសំអាតសំរាមឱ្យកាន់តែមានប្រសិទ្ធិភាពនៅក្នុងរាជធានីភ្នំពេញ នាព្រឹកថ្ងៃទី៨ សីហា ឆ្នាំ២០២៣ នេះនៅសាលារាជធានីភ្នំពេញ។

លោក ហួត ហៃ មានប្រសាសន៍បន្តថា ភ្នាក់ងារបំពេញការងាររឿងសំរាម ដែលសហការជាមួយអាជ្ញាធរដែនដី ត្រូវពន្យល់ប្រាប់ប្រជាពលរដ្ឋឱ្យបានយល់ច្បាស់ពីតួនាទីក្នុងការទុកដាក់សំរាមត្រឹមត្រូវ ដោយត្រូវបញ្ចេញសំរាមតាមម៉ោងពេលកំណត់ និងត្រូវបង់ថ្លៃសំរាមទៅតាមការកំណត់របស់សេចក្តីជូនដំណឹង នៃរដ្ឋបាលរាជធានីភ្នំពេញ។

ភ្នាក់ងារប្រមូលសំរាមត្រូវធ្វើរបាយការណ៍មករដ្ឋបាលរាជធានីភ្នំពេញឱ្យបានទៀងទាត់រយៈពេលមួយខែម្តង ហើយភ្នាក់ងារនេះដែរក៏ត្រូវជូនដំណឹងដល់ប្រជាពលរដ្ឋពីកាតព្វកិច្ចបង់ថ្លៃសំរាមឱ្យបានទៀងទាត់ ព្រោះពេលនេះ ដល់ពេលអនុវត្តការផាកពិន័យហើយ មិនគួរបណ្តែតបណ្តោយតទៅទៀតឡើយចំពោះអ្នកដែលមិនអើពើលើការបង់ថ្លៃសំរាម ហើយភ្នាក់ងារអសកម្មនឹងការងារគួរដកចេញ ឬរំសាយ ភ្នាក់ងារនោះចោលតែម្តង ដើម្បីឪ្យិការងារនេះកាន់តែមានប្រសិទ្ធិភាព។

លោក ហួត ហៃ បានលើកឡើងថា មានតួអង្គ៣ សំខាន់ដែលពាក់ពន្ធ័ទៅនឹងការងារសំរាមនេះ ទី១. ប្រជាពលរដ្ឋអ្នកផលិតសំរាម ទី២. ក្រុមហ៊ុនប្រមូលសំរាម និងទី៣. ទីលានចាក់សំរាមប្រកបដោយសុវត្ថិភាព។

លោកអភិបាលរង មានប្រសាសន៍បន្ថែមថា កន្លងមករដ្ឋបាលរាជធានីភ្នំពេញបានខិតខំកែលំអរទៅលើការទុកដាក់ ប្រមូល និងដឹកជញ្ជូនសំរាមចេញក្រៅក្រុង ពីមានតែមួយក្រុមហ៊ុន រហូតដល់ ៣ក្រុមហ៊ុនប្រមូលសំរាម ដោយចែកជាតំបន់ទទួលខុសត្រូវដាច់ពីគ្នាដែលធ្វើឱ្យការប្រមូលសំរាមទទួលបានលទ្ធផលល្អប្រសើរនាពេលបច្ចុប្បន្ន៕

អត្ថបទ៖ ស្រីរ័ត្ន