​អាជ្ញាធរជួសជុល ផ្លូវវាងច្រាំងទន្លេបាក់ស្រុតជាង ២០០ ម៉ែត្រ​

ប្រធានមន្ទីរអភិវឌ្ឍជនបទខេត្តត្បូងឃ្មុ លោក អាន ស៊ីណា បានឱ្យដឹងថា អាជ្ញាធរ​ខេត្តត្បូង​ឃ្មុំ​បានដាក់ម៉ាស៊ីនខួងយកអាចម៍ដីទៅពិនិត្យរួចហើយ ចំណុច​បាក់ស្រុតច្រាំងទន្លេប្រវែង ២០០​ម៉ែត្រ ស្ថិតនៅចុងភូមិទួលគរ ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ។

លោកបន្តថា មានជម្រើសពីរ ក្នុងការជួសជុលផ្លូវនេះ ១.ករណីក្រសួងពិនិត្យឃើញថា បើជួសជុល​ទប់​ច្រាំងហើយនៅតែបន្តបាក់នោះ ២.ក្រសួងនឹងធ្វើផ្លូវវាងខាងកើតវត្តពាមចក ចំណុចគល់ស្ពានអង្កូ បន្តទៅស្ពានព្រែកតាខ្វាន់ចុងភូមិទួលគរ ហើយថវិកាក្រសួងជាអ្នកចំណាយ គ្រាន់តែការជួសជុល​មិនទាន់កំណត់ថ្ងៃបរិច្ឆេទច្បាស់លាស់ ផ្លូវបេតុងនេះ ស្រុតខ្លាំងមែនហើយ តែអាចធ្វើចរាចរណ៍​បាន។ ​

ផ្លូវបេតុងមួយកន្លែងនេះបានរងការបាក់ស្រុតចូលទន្លេមេគង្គ កាលពីថ្ងៃទី ២៣ ខែធ្នូ ឆ្នាំ២០២៣ ដោយសារទឹកហូរជ្រាប។ ផ្លូវបេតុង មួយខ្សែនេះ ជាផ្លូវដ៏សំខាន់សម្រាប់ប្រជាពលរដ្ឋធ្វើដំណើរពីស្រុកត្បូងឃ្មុំ ខេត្តត្បូងឃ្មុំ ឆ្ពោះទៅកាន់ស្រុកកោះសូទិន ខេត្តកំពង់ចាម៕