ព័ត៌មានជាតិ

អភិបាលខេត្តត្បូងឃ្មុំ ណែនាំឱ្យប្រជាកសិករប្រុងប្រយ័ត្នចំពោះការប្រើប្រាស់ទឹក នារដូវប្រាំង

បានផុស

១ ខែ មុន

នៅ

ថ្ងៃព្រហស្បតិ៍ ២០ កុម្ភៈ ២០២៥

ដោយ

លោក ប៉ែន កុសល្យ អភិបាលខេត្តត្បូងឃ្មុំ ណែនាំឱ្យប្រជាកសិករដែលដាំដុះដំណាំស្រូវអាស្រ័យផលក្នុងទំនប់បឹងសេកយំ និងទំនប់ប៉ើស ២ នេះ ប្រុងប្រយ័ត្នក្នុងរដូវប្រាំងនេះ ព្រោះអាច និងមានបញ្ហាខ្វះខាតទឹកក្នុងការប្រើប្រាស់លើដំណាំស្រូវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការណែនាំនេះ ក្នុងឱកាស លោក ប៉ែន កុសល្យ បានអញ្ជើញចុះត្រួតពិនិត្យទំនប់បឹងសេកយំ និងទំនប់ប៉ើស ២ និងសំណេះសំណាលជាមួយប្រជាកសិករអាស្រ័យផលក្នុងស្រុកក្រូចឆ្មារ កាលពីថ្ងៃទី ១៩ ខែកុម្ភៈ ឆ្នាំ ២០២៥ ម្សិលមិញ។

លោក ប៉ែន កុសល្យ អភិបាលខេត្តត្បូងឃ្មុំ មានប្រសាសន៍ថា «បងប្អូនប្រជាកសិករដែលដាំដុះដំណាំស្រូវអាស្រ័យផលក្នុងទំនប់បឹងសេកយំ និងទំនប់ប៉ើស ២ នេះ សូមបងប្អូនមានការប្រុងប្រយ័ត្នក្នុងរដូវប្រាំងនេះ ព្រោះអាច និងមានបញ្ហាខ្វះខាតទឹកក្នុងការប្រើប្រាស់លើដំណាំស្រូវ។ ហើយឥឡូវនេះ យើងកំពុងតែធ្វើការស្តារទំនប់នេះបឹងនេះបន្ថែម ដើម្បីមានភាពងាយស្រួលក្នុងការផ្ទុកទឹកសម្រាប់ប្រើប្រាស់ស្រោចស្រពដំណាំ»។

លោកអភិបាលខេត្ត គូសបញ្ជាក់ថា ប្រជាពលរដ្ឋដែលអាស្រ័យផលបឹងខាងលើ អាចអាស្រ័យផលនៅបឹងនេះបាន ប៉ុន្តែយើងនឹងទុកបឹងនេះជាសម្បត្តិរដ្ឋ ដើម្បីប្រើប្រាស់រួមគ្នា និងមិនតម្រូវឱ្យពុះប្លង់កម្មសិទ្ធិសម្រាប់បុគ្គលណាម្នាក់ឡើយ ដោយដីផ្ទៃបឹងនេះគឺនឹងធ្វើការស្តារបន្ថែមទៀត ដើម្បីងាយស្រួលនៅរដូវវស្សាអាចផ្ទុកទឹកក្នុងបឹងសម្រាប់កសិករក្នុងស្រុកក្រូចឆ្មារប្រើប្រាស់ដាំដុះដំណាំកសិកម្ម។

លោក ប៉ែន កុសល្យ ក៏បានណែនាំដល់អាជ្ញាធរមូលដ្ឋាន ត្រូវត្រួតពិនិត្យ និងធ្វើការណែនាំដល់ប្រជាកសិករពលរដ្ឋដែលអាស្រ័យផលកសិកម្មក្នុងរដូវប្រាំងនេះ សូមមានការប្រុងប្រយ័ត្នខ្ពស់ក្នុងការប្រើប្រាស់ទឹក ដើម្បីរក្សាបានប្រាក់ចំណូលផ្គត់ផ្គង់គ្រួសារ និងមិនមានការខាតបង់លើការដាំដុះក្នុងរដូវប្រាំងនេះ៕

អត្ថបទ៖ សារី ឡែម