សមត្ថកិច្ចបង្ក្រាបក្មេងទំនេីងបាន៣នាក់ ដែលបង្កហិង្សាដល់អ្នកដំណើរនៅក្រុងសៀមរាប

ក្មេងទំនើងចំនួន ៣នាក់ ត្រូវបាននគរបាលក្រុងសៀមរាប និងនគរបាលស្រុកជីក្រែង បង្ក្រាបបានជាបន្តបន្ទាប់ ខណៈពួកគេបានបង្កហិង្សាលើអ្នកដំណើរ។ ការចុះបង្ក្រាបនេះ ធ្វើឡើងនៅថ្ងៃទី២១ ខែសីហា ឆ្នាំ២០២៤។

លោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប បានឲ្យដឹងថា កម្លាំងនគរបាលផ្នែកយុត្តិធម៌ ក្រុងសៀមរាប សហការជាមួយកម្លាំងនគរបាលស្រុកជីក្រែង បានធ្វើការឃាត់ខ្លួនជនសង្ស័យចំនួន ៣នាក់ ពាក់ព័ន្ធនឹងករណី ហិង្សាដោយចេតនា (វាយនឹងមួកសុវត្ថិភាព) កាលពីថ្ងៃទី១៨ ខែសីហា ឆ្នាំ២០២៤ វេលាម៉ោង២០:០០នាទី នៅចំណុចលើផ្លូវ៦០ម៉ែត្រ ក្នុងភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប។ 

ក្រោយពីសួរនាំជនសង្ស័យបានសារភាពថា ខ្លួន និងបក្ខពួកសរុប០៧នាក់ទៀត ពិតជាបានធ្វើសកម្មភាព វាយទៅលើអ្នកធ្វើដំណើរពិតប្រាកដមែន។ ចំណែកបក្ខពួកផ្សេងទៀតបានរត់គេគេចខ្លួន។

សមត្ថកិច្ចបានធ្វើការដកហូតវត្ថុតាងរួមមាន៖ ម៉ូតូជនសង្ស័យធ្វើសកម្មភាព ១គ្រឿង ។ ចំណែកបក្ខពួកជនសង្ស័យ កំពុងស្រាវជ្រាវបន្ត។ បច្ចុប្បន្នជនសង្ស័យព្រមទាំងវត្ថុតាង ត្រូវបានបញ្ជូនទៅកម្លាំងការិយាល័យជំនាញ ដេីម្បីបន្តនីតិវិធី៕

ដោយ៖ជុន កុសល