ជិតបំណាច់ឆ្នាំ២០២៤ អ្នកធ្វើដំណើរឆ្លងកាត់ច្រកព្រំដែនចាំយាមប្រមាណ២៦ម៉ឺននាក់

ក្រុមមន្រ្តីសមត្ថកិច្ចប្រចាំការបានបង្ហាញថា ជិតបំណាច់ឆ្នាំ២០២៤នេះ មានអ្នកដំណើរចេញចូលឆ្លងកាត់ព្រំដែនសរុបប្រមាណ២៦ម៉ឺននាក់នៅច្រកទ្វារព្រំដែនអន្តរជាតិចាំយាម ស្រុកមណ្ឌលសីមា ខេត្តកោះកុង។

កំឡុងពេល១០ខែឆ្នាំនេះ អត្រាចំនួនអ្នកដំណើរចេញចូលឆ្លងកាត់តាមច្រកទ្វារព្រំដែនចាំយាមមានប្រមាណ២៦ម៉ឺននាក់ ធៀបនឹងរយៈពេលដូចគ្នាឆ្នាំ២០២៣ កើនបាន៣ម៉ឺននាក់ ដោយចាត់ទុកថា ជាសន្ទុះអ្នកចេញចូលច្រើនគួរសម។

ក្រុមមន្រ្តីនគរបាលអន្តោប្រវេសន៍ និងមន្រ្តីទីស្នាក់ការត្រួតពិនិត្យច្រកទ្វារព្រំដែនអន្តរជាតិចាំយាម ខេត្តកោះកុង គូសបញ្ជាក់នៅថ្ងៃទី២៧ ខែវិច្ឆិកា ឆ្នាំ២០២៤ថា លំហូរអ្នកដំណើរដែលបានឆ្លងកាត់ព្រំដែនទៅប្រទេសថៃ ភាគច្រើនពួកគាត់ទៅរកសេវាពិនិត្យសុខភាព ដើរកម្សាន្តតាមរមណីយដ្ឋានានា និងទៅធ្វើជំនួញជួញដូរពាណិជ្ជកម្ម។

បើតាមក្រុមមន្រ្តីដដែលបន្ថែមថា ទំនិញដែលនាំចូលពីថៃចូលកម្ពុជាតាមច្រកទ្វារព្រំដែនចាំយាម រួមមាន គ្រឿងយន្ត ម៉ូតូ បន្លែផ្លែឈើ សម្ភារៈប្រើប្រាស់ផ្សេងៗ។ រីឯទំនិញផលិតផលសេវាកម្មដែលកម្ពុជានាំចូលទៅកាន់ប្រទេសថៃ មានទិន្នផលនេសាទ ការទៅរកសេវាពិនិត្យជំងឺ និងដំណើរកម្សាន្ត។

អ្នកស្រី វីន ជាពលរដ្ឋមកពីខេត្តព្រៃវែង និងកញ្ញា សុនា ជាពលរដ្ឋនៅខេត្តរកោះកុង បានឱ្យដឹងថា ពួកគាត់ឆ្លងដែនទៅទឹកដីថៃ ដើម្បីទៅលេងក្រុមគ្រួសារដែលធ្វើការងារនៅខេត្តត្រាត និងទៅពិនិត្យសុខភាពផងដែរ។ ចំពោះការផ្តល់សេវាបែបបទរដ្ឋបាលរបស់ក្រុមមន្រ្តីសមត្ថកិច្ចនៅព្រំដែន ប្រព្រឹត្តទៅដោយល្អប្រសើរក្រោមក្រមសីលធម៌វិជ្ជាជីវៈឆាប់រហ័សពុំមានការទាមសេវាក្រៅផ្លូវការអ្វីឡើយ។

តំណាងពលរដ្ឋ២នាក់ខាងលើ អះអាងថា ២សប្តាហ៍ ឬ២ខែទៀត ពួកគាត់វិលត្រឡប់មកកម្ពុជាវិញ បន្ទាប់ពីបានទៅ​លេងកម្សាន្ត និងសួរសុខទុក្ខក្រុមគ្រួសារដែលកំពុងធ្វើការងារនៅខេត្តមួយចំនួនរបស់ប្រទេសថៃ។ ដោយឡែកក្រុមគ្រូពេទ្យនៃមន្ទីរសុខាភិបាលខេត្តកោះកុង ក៏នៅតែបន្តត្រួតពិនិត្យតាមដានសុខភាពរបស់អ្នកដំណើរដើម្បីធានាសុខសុវត្ថិភាព និងបញ្ចៀសការរីករាលដាលជំងឺផ្សេងៗនៅក្នុងសហគមន៍ ទោះបីជាបញ្ហាជំងឺកូវីដ១៩ បានសាបរលត់សូន្យទៅហើយក្តី៕

អត្តបទ៖ សិរីវឌ្ឍនៈ