នគរបាលរាជធានី កោះហៅម្ចាស់រថយន្តដែលចោទសមត្ថកិច្ចលួចម៉េមូរីក្នុងរថយន្តមកបំភ្លឺនៅថ្ងៃ​ទី២៧មករា

នគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ បានចេញលិខិតកោះហៅបុរសម្នាក់ ដែលបានអះអាងថាសមត្ថកិច្ច បានដកហូត មេម៉ូរី នៅក្នុងរថយន្តរបស់ខ្លួនអោយចូលខ្លួនមកបំភ្លឺនៅថ្ងៃទី២៧មករា នេះ ។

តាមការបញ្ជាក់ពីឧត្តមសេនីយ៍ត្រី ប៊ុត សត្យា ស្នងការរងទទួលផែនការងារព្រហ្មទណ្ឌ កាលពីថ្ងៃទី២០ ខែមករា ឆ្នាំ២០២៥ លោកបានចេញលិខិតកោះហៅឈ្មោះ សា ទុងវី ភេទប្រុស អាយុ ៣៦ឆ្នាំ អោយចូលមកកាន់ស្នងការដ្ឋាននគរបាលរាជធានីភ្នំពេញនៅថ្ងៃទី២៧ ខែមករា ឆ្នាំ២០២៥ ដើម្បីស្រាយបំភ្លឺករណីដែលបានកើតឡើងកាលពីវេលាម៉ោង ២រសៀល ថ្ងៃទី២៥ ខែធ្នូ ឆ្នាំ២០២៤ តាមបណ្តោយមាហាវិថី សហព័ន្ធរុស្សី នៅក្នុងមូលដ្ឋានខណ្ឌពោធិ៍សែនជ័យ រាជធានីភ្នំពេញ។

គួរបញ្ជាក់ផងដែរថា កាលពីថ្ងៃទី២៥ ខែធ្នូ ឆ្នាំ២០២៤ បុរសដែលជាម្ចាស់រថយន្ត ឡិចសុីស ពណ៍ស ពាក់ស្លាកលេខ ភ្នំពេញ 2BT-9357 បានឈ្លោះប្រកែកគ្នាជានគរបាលចរាចរណ៍ នៅគោលដៅក្បែរអាកាសយានដ្ឋានអន្តរជាតិភ្នំពេញ និងបញ្ចេញកាយវិការមិនសមរម្យហើយថែមទាំងបានចោទទៅកាន់សមត្ថកិច្ចថា លួចមេម៉ូរីក្នុងរថយន្តរបស់ខ្លួនទៀតផង៕

អត្ថបទ៖ រដ្ឋា