សណ្ដាប់ធ្នាប់នៅផ្លូវវេងស្រេងនៅតែជាបញ្ហា

កំណាត់ផ្លូវចោមចៅ (វេងស្រេង)ត្រង់ចំណុចមុខរោងចក្រមួយកន្លែង​ជាប់ក្រុមហ៊ុនផលិតម៉ូតូហុងដា ក្នុងសង្កាត់ចោមចៅទី១​ ខណ្ឌពោធិ៍សែនជ័យ ត្រូវបានក្រុមអ្នកលក់ដូរមួយចំនួននៅតែបន្តយកចំណីផ្លូវដាក់តាំង តុ របស់របរលក់ដូរ រាល់ថ្ងៃ ធ្វើឱ្យកកស្ទះចរាចរណ៍រាល់ថ្ងៃ។

បើតាមប្រជាពលរដ្ឋបានលើកឡើងថា ជារៀងរាល់ថ្ងៃទៅហើយ ពិសេសនៅវេលាម៉ោង៤​ និងម៉ោង៦រសៀល មានអ្នកលក់ដូរមួយចំនួនតូចយកចំណីផ្លូវធ្វើជាកន្លែងលក់ដូរ បង្កឱ្យបាត់សណ្តាប់ធ្នាប់ដងផ្លូវ កកស្ទះចរាចរណ៍ ស្របពេលកម្មករចេញ ឬចូលរោងចក្រទៀតធ្វើឱ្យកាន់តែកកស្ទះ។ ពលរដ្ឋបន្តទៀតថា ចំណុចខាងលើអាជ្ញាធរសង្កាត់ក៏ធ្លាប់ចុះរៀបចំសណ្តាប់ធ្នាប់ដែរ តែបានតែមួយភ្លែត ពេលកម្លាំងអាជ្ញាធរទៅបាត់អ្នកលក់ដូរក៏ដាក់មកលើចំណីផ្លូវដដែល។

លោក​ កង​ វង​ ចៅសង្កាត់ចោមចៅទី១​ បានឱ្យដឹងថា​ ករណីលក់ដូររំលោភលើចំណីផ្លូវសាធារណៈនេះ មិនថាតែទីតាំងនេះទេ​ គឺឱ្យតែមានអាជីវករដាក់លក់ដូរ​ ក៏ដូចជារំលោភចំណីផ្លូវសារធារណៈលោកតែងតែចុះរៀបចំសណ្តាប់ធ្នាប់ជាញឹកញាប់ មិនត្រឹមតែប៉ុណ្ណោះក៏ធ្លាប់ចេញសេចក្តីជូនដំណឹងជាហូហែរដែរ តែអាជីវករនៅតែបន្តដាក់លក់ដដែល។ លោកចៅសង្កាត់បានបន្តថា​ ករណីនេះលោករង់ចាំចូលឆ្នាំប្រពៃណីខ្មែររួចរាល់ លោកនឹងចាត់វិធាការរដ្ឋបាលលេីក្រុមអាជីវករណាដែលមិនស្តាប់​ ចាប់យកសម្ភារៈមករក្សាទុក និងធ្វេីកិច្ចសន្យាទៅលេីបុគ្គលនោះ៕

អត្ថបទ៖ សុខា