អ្នកនាំពាក្យ៖ បុរសឈ្មោះ ប៊ុន រស្មី ហៅ ប៊ុន ផាក នឹងចូលខ្លួនបំភ្លឺនៅស្នងការរាជធានី នៅថ្ងៃទី​២១​មីនា អំពីពាក្យ សន្តិភាព

លោកវរសេនីយ៍ឯក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញ បានបញ្ជាក់នៅព្រឹកថ្ងៃទី២០មីនា នេះថា បុរសឈ្មោះ ប៊ុន រស្មី ហៅ ប៊ុន ផាក នឹងចូលខ្លួនមកបំភ្លឺតាមការកៅហៅរបស់លោកឧត្ដមសេនីយ៍ឯក ជូន ណារិន្ទ អគ្គស្នងការរង និងជាស្នងការនៃស្នងការដ្ឋាននគរបាលរាជធានីភ្នំពេញ ដើម្បីបកស្រាយបំភ្លឺពាក្យ សន្តិភាព ។ បើតាមលោកវរសេនីយ៍ឯក សំ វិច្ឆិកា លោក ប៊ុន ផាក នឹងចូលខ្លួនបំភ្លឺនៅវេលាម៉ោង៩និង៣០នាទីព្រឹក ថ្ងៃទី២១ ខែមីនា ឆ្នាំ២០២៥ នៅស្នងការដ្ឋាននគរបាលរាជធានីភ្នំពេញ។

បើតាមលោក សំ វិច្ឆិកា បុគ្គលឈ្មោះ ប៊ុន ផាក កាលពីថ្ងៃទី១៩មីនា ម្សិលមិញក៏បានបង្ហោះផ្សព្វផ្សាយតាមផេកផ្ទាល់ខ្លួនបកស្រាយមួយចំនួនអំពីពាក្យ(សន្តិភាព)រួចហើយផងដែរ។ តាមសំណេររបស់បុគ្គលឈ្មោះ ប៊ុន ផាក ដោយសារខ្លួនព្រួយបារម្ភនឹងចោរឆក់កាបូបមិត្តភក្តិខ្លួនជាជនបរទេសឈ្មោះChrist។

អ្នកនាំពាក្យបញ្ជាក់បន្ថែមថា អំពើឆក់ និងអំពើចោរកម្ម គឺជាបាតុភាពក្នុងសង្គមមួយដែលកើតឡើងតែមួយជ្រុងតូច ដែលសមត្ថកិច្ចមានតួនាទីភារកិច្ចយកចិត្តទុកដាក់បង្រ្កាប ហើយតែងបង្រ្កាបបានជាបន្តបន្ទាប់។ ដោយឡែកពាក្យសន្តិភាព គឺសំដៅប្រទេសគ្មានសង្រ្គាម ដែលទទួលបានការធានាអាយុជីវិត ទ្រព្យសម្បត្តិ ប្រជាជន និងហេដ្ឋារចនាសម្ពន័្ធទូទៅដែលបានរីកដុះដាលក្នុងប្រទេសដែលមានសន្តិភាព ហើយប្រជាជនមានសិទ្ធិប្រកមុខរបរ រកកស៊ី ធ្វើការងារបានដោយសេរី ទៅតាមលទ្ធភាព សមត្ថភាពរបស់ខ្លួន។ ពាក្យថាសន្តិភាព គឺមានតម្លៃធំធេងណាស់ សម្រាប់សង្គមជាតិមួយដែលចាំបាច់យើងគ្រប់គ្នាត្រូវតែថែរក្សាការពារឲ្យបានជាដាច់ខាត។

គួររំលឹកថា បុគ្គលឈ្មោះ ប៊ុន រស្មី ហៅ ប៊ុន ផាក ដែលគេស្គាល់ថា ជាគ្រូជោគជ័យ និងអ្នកសម្បូរទ្រឹស្ដិ កាលពីពេលថ្មីៗនេះបានបង្ហោះសារនៅលើបណ្ដាញសង្គមរបស់ខ្លួនដោយបានលើកឡើងថា «កំចាត់ក្មេងទំ និងចោរប្លន់ឲ្យបានទៅ ទើបអាចនិយាយបានថា យើងមានសន្តិភាព។

ក្រោយបង្ហោះសំណេរនេះឡើង មានមហាជន ក៏ដូចជាអ្នកលេងបណ្ដាញសង្គមជាច្រើនបានបញ្ចេញមតិរិះគន់ទៅលើបុគ្គលរូបនេះ ហើយខ្លះទៀតក៏បានលើកឡើងថា បុគ្គលរូបនេះមិនទាន់ស្គាល់ពាក្យ សន្តិភាព។

លោកឧត្ដមសេនីយ៍ឯក ជូន ណារិន្ទ អគ្គស្នងការរង និងជាស្នងការនៃស្នងការដ្ឋាននគរបាលរាជធានីភ្នំពេញ កាលពីថ្ងៃទី១៦ ខែមីនា ឆ្នាំ២០២៥ បន្ទាប់ពីបានឃើញនូវការបង្ហោះរបស់បុគ្គលឈ្មោះ ប៊ុន ផាក ក៏បានបញ្ជាឲ្យជំនាញខាងផែនសន្តិសុខអញ្ជើញបុគ្គលរូបនេះមកបំភ្លឺផងដែរ៕

អត្ថបទ៖ សុខុម