នគរបាលព្រហ្មទណ្ឌបំបែកសំណុំរឿងកាប់សម្លាប់នៅខេត្តព្រៃវែង ជនដៃដល់មកលាក់ខ្លួននៅខណ្ឌច្បារអំពៅ

កម្លាំងនគរបាលនៃនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ សហការជាមួយកម្លាំងនៃស្នងការដ្ឋាននគរបាលខេត្តព្រៃវែង និងអធិការដ្ឋាននគរបាលខណ្ឌច្បារអំពៅ ស្រាវជ្រាវឈានដល់ការឃាត់ខ្លួនជនដៃដល់ម្នាក់ក្នុងសំណុំរឿងកាប់សម្លាប់ជនរងគ្រោះម្នាក់កាលពីថ្ងៃទី១៣មិថុនាកន្លងទៅ នៅខេត្តព្រៃវែង។

ការឃាត់ខ្លួនជនដៃដល់ក្នុងករណីឃាតកម្មនេះ បានធ្វើឡើងនៅវេលាម៉ោង០៩និង១០នាទីព្រឹកថ្ងៃទី២២​មិថុនានេះ នៅចំណុចលើផ្លូវជាតិលេខ១ សង្កាត់និរោធ ខណ្ឌច្បារអំពៅ រាជធានីភ្នំពេញ។ បច្ចុប្បន្នជនសង្ស័យត្រូវបាននាំខ្លួនមកកាន់នាយកដ្ឋាននគរបាលព្រហ្មទណ្ឌ ដើម្បីធ្វើការសាកសួរ។

តាមរបាយការណ៍របស់នាយកដ្ឋាននគរបាលព្រទណ្ឌ ជនដៃដល់មានឈ្មោះ ចាន់ សារិន ភេទប្រុស អាយុ៤១ឆ្នាំ ជនជាតិខ្មែរ រស់នៅភូមិរោង ឃុំចាម ស្រុកកំពង់ត្របែក ខេត្តព្រៃវែង។

តាមរបាយការណ៍ កាលថ្ងៃទី១៣ ខែមិថុនា ឆ្នាំ២០២៥ វេលាម៉ោង១៩និង១០នាទី ជនដៃដល់បានធ្វើសកម្មភាពយក កាំបិតផ្គាក់កាប់ទៅលើជនរងគ្រោះឈ្មោះ ហុង ថន ហៅ ធុយ ភេទប្រុស អាយុ២៨ឆ្នាំ ជនជាតិខ្មែរ បណ្តាលឲ្យស្លាប់នៅចំណុចភូមិរោង ឃុំចាម ស្រុកកំពង់ត្របែក ខេត្តព្រៃវែង រួចជនដៃដល់បានគេខ្លួនបាត់។

តាមចម្លើយសារភាព ជនសង្ស័យបានសារភាពថា ខ្លួនពិតជាបានធ្វើសកម្មភាពយកកាំបិតផ្គាក់កាប់ទៅលើជនរងគ្រោះបណ្តាលឲ្យស្លាប់ប្រាកដមែន មូលហេតុដោយសារតែជនរងគ្រោះស្រវឹងស្រា រួចប្រើពាក្យសម្តីមិនសមរម្យមកលើខ្លួន ហើយយកកាំបិតបុ័ងតោកាប់មកលើខ្លួនឲ្យរបួសត្រង់ផ្ទៃមុខ និងដៃ ទើបធ្វើឲ្យខ្លួនមានការខឹង ហើយធ្វើសកម្មភាពខាងលើតែម្តង។

ក្រោយពីសាកសួរ នាយកដ្ឋាននគរបាលព្រហ្មទណ្ឌ បានប្រគល់ជនសង្ស័យខាងលើ ជូនស្នងការដ្ឋាននគរបាលខេត្តព្រៃវែង ដើម្បីអនុវត្តនីតិវិធីបន្ត៕