ចៅសង្កាត់មនោរម្យ តំណាងឲ្យពលរដ្ឋបង្ហាញក្ដីរីករាយចំពោះលទ្ធផលវិជ្ជមានក្នុងកិច្ចប្រជុំ GBC

ក្រោយកិច្ចប្រជុំ GBC នៅប្រទេសម៉ាឡេស៊ីទទួលបានលទ្ធផលល្អប្រសើប្រជាពលរដ្ឋនៅតាមមូលដ្ឋានបង្ហាញក្តីរីករាយចំពោះលទ្ធផលវិជ្ជមាននៃកិច្ចប្រជុំ ដោយរំពឹងថា លទ្ធផលនេះជាផ្លែផ្កានៃការស្ដារសន្តិភាពមកវិញឆាប់ៗខាងមុខ។

លោកស្រី ស៊ូ គឹមឡេង ចៅសង្កាត់មនោរម្យ នៃរដ្ឋបាលខណ្ឌ៧មករា តំណាងឲ្យពលរដ្ឋទូទាំងសង្កាត់ បានសម្តែងក្តីពេញចិត្ត រំភើបរីករាយ ចំពោះលទ្ធិផលវិជ្ជមានដ៏ត្រចះត្រចង់នៃកិច្ចប្រជុំ GBC នៅប្រទេសម៉ាឡេស៊ី ដែលជាលទ្ធផល បានកើតឡើងដោយការខិតខំប្រឹងប្រែងរបស់សម្ដេចតេជោ និងសម្តេចធិបតី ប្រមុខថ្នាក់ដឹកនាំដ៏ឆ្នើមរបស់កម្ពុជា ដែលសម្តេចព្យាយាមដោះស្រាយតាមរយៈយន្តការការទូតជាច្រើន បញ្ចៀសធ្វើយ៉ាងណាឲ្យកម្ពុជា-ថៃ រួចផុតពីការផ្ទុះជម្លោះព្រំដែនដោយប្រដាប់អាវុធ។

លោកស្រីចៅសង្កាត់បានបញ្ជាក់បន្ថែមថា ប្រទេសកម្ពុជាមិនចង់បានសង្ក្រាមនោះទេ កម្ពុជាចង់បានសន្តិភាព សង្គ្រាមបង្កឲ្យមានផលលំបាក បែកបាក់គ្រួសារ ប្ដីស្លាប់ប្រពន្ធមេម៉ាយ កូនកំព្រា ប្រជាពលរដ្ឋត្រូវចាកចេញពីលំនៅដ្ឋាន រកទីសុវត្ថិភាព ប៉ុន្តែក្នុងកាលៈទេសៈប្រទេសជិតខាងចង់ឈ្លានពាន នោះយើងត្រូវតែការពារបូរណភាពទឹកដីរបស់យើង “យើងមិនចង់បានរបស់គេ គេក៏មិនអាចមកដណ្ដើមរបស់យើងបានដែរ”។

គួរបញ្ជាក់ផងដែរ លោកជំទាវឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិកម្ពុជា បានបញ្ជាក់ថា កិច្ចប្រជុំវិសាមញ្ញ នៃគណៈកម្មាធិការព្រំដែនទូទៅកម្ពុជា-ថៃ(GBC) ថ្ងៃទី៧ ខែសីហា ឆ្នាំ២០២៥ បានមកនូវផ្លែផ្កាជាទីគាប់ចិត្ត និងឈានដល់ការសម្រេចបាននូវការឯកភាពគ្នាលើលក្ខខណ្ឌ នៃបទឈប់បាញ់គ្នារវាងប្រទេសទាំងពីរ៕

អត្ថបទ៖ សុភា