ករណីឃាតកម្មកាប់សម្លាប់អ្នករស់នៅក្នុងភូមិជាគ្នា ខណៈសមត្ថកិច្ចមិនទាន់បញ្ជាក់ពីមូលហេតុ

បុរសម្នាក់វ័យ៣៥ឆ្នាំម្នាក់បានស្លាប់ភ្លាមៗនៅកន្លែងកើតហេតុ ក្រោយត្រូវបុរសម្នាក់ទៀតដែលជាអ្នករស់នៅក្នុងភូមិជាមួយគ្នា ប្រើកាំបិតខ្វែវ កាប់សម្លាប់តែម្ដង។

ហេតុការណ៍ករណីឃាតកម្មនេះបានកើតឡើងនៅវេលាម៉ោង១២និង៤៥នាទីរំលងអធ្រាត្រ ឈានចូលថ្ងៃទី២ ខែកញ្ញា ឆ្នាំ២០២៥ នៅភូមិអូរចារ សង្កាត់អូរចារ ក្រុងបាត់ដំបង បណ្តាលអោយជនរងគ្រោះឈ្មោះ គិន សុឃៀ ភេទប្រុសអាយុ៣៥ឆ្នាំ រស់នៅក្នុងភូមិកេីតហេតុស្លាប់នៅកន្លែងកើតហេតុ។

ក្រោយពីកើតហេតុភ្លាមៗ សមត្ថកិច្ចនៃអធិការដ្ឋាននគរបាលក្រុងបាត់ដំបង សហការជាមួយកម្លាំងប៉ុស្តិ៍រដ្ឋបាលនគរបាលសង្កាត់អូរចារ បានចុះឃាត់ខ្លួនជនសង្ស័យមានឈ្មោះ និល មុន្នី អាយុ៣៥ឆ្នាំមានទីលំនៅក្នុងភូមិកេីតហេតុជាមួយជនរងគ្រោះ និងបាននាំខ្លួនទៅកាន់អធិការដ្ឋានដើម្បីធ្វើការសាកសួរ។

លោក ពេជ្រ សារ៉ែន អធិការនៃអធិការដ្ឋាននគរបាលក្រុងបាត់ដំបង បានបញ្ជាក់ឲ្យដឹងនៅព្រឹកថ្ងៃទី២ ខែកញ្ញានេះថា ជនសង្ស័យបានប្រើកាំបិតខ្វែវ កាប់ប្រហារលើជនរងគ្រោះបណ្ដាលឱ្យស្លាប់ ហើយនៅពេលនេះកម្លាំងកំពុងធ្វើការសាកសួរ ដោយមិនទាន់បញ្ជាក់អំពីមូលហេតុនៅឡើយទេ៕

អត្ថបទ៖ សោ និយមរ័ត្ន