កីឡា

នៅ ស្រីពៅ និង ខុន ស៊ីចាន់ ពន្យល់ជំនួបរវាង ចាន់ រតនា និង Xie Wei

បានផុស

៣ years មុន

នៅ

ថ្ងៃពុធ ៩ ធ្នូ ២០២០

ដោយ

អ្នកលេងគុនខ្មែរ និងគុនចម្រុះពីររូបប្រចាំសង្វៀនអន្តរជាតិ ONE Championship បានចេញមកពន្យល់អំពីជំនួបរវាង ចាន់ រតនា និង Xie Wei នៅថ្ងៃទី ១៨ ខែ ធ្នូ ខាងមុខនៅកីឡដ្ឋាន Singapore Indoor Stadium នៃប្រទេសសិង្ហបុរី។

ចាន់ រតនា ដែលខកខានឡើងសង្វៀនធំបំផុតនៅអាស៊ីរយៈពេលប្រមាណជាងមួយឆ្នាំកន្លះ នឹងត្រូវតតាំងជើងខ្លាំងមកពីចិន Xie Wei ក្នុងទម្ងន់ Flyweight នៅព្រឹត្តិការណ៍ ONE: COLLISION COURSE និងជាការដាក់គោលដៅដើម្បីដណ្ដើមជ័យជម្នះលើកទី៨ របស់ខ្លួននៅសង្វៀនលំដាប់ពិភពលោកមួយនេះ។

មុនទូតសុច្ឆន្ទៈរបស់ក្រុមហ៊ុនសែលកាត ចេញទៅប្រកួត កីឡាការិនីលំដាប់លេខ១នៅកម្ពុជា នៅ ស្រីពៅ បានពិពណ៌នាថា៖ «បើតាមខ្ញុំមើលការប្រកួតកន្លងទៅ Xie Wei ល្អទាំងជំហរលើ និងល្អទាំងជំហរក្រោម។ Wei ពូកែម៉ិកគូប្រកួតដែរ។ បើសិនគេដឹងថា យើងពូកែខាងលើ នោះគេច្បាស់ជាចូលចាប់មិនខាន។ មួយវិញទៀតកម្លាំងស៊ុហ្វក៏ខ្លាំងមិនអាចមើលរំលងបានដែរ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«យ៉ាងណា ខ្ញុំសង្ឃឹមថា បង រតនា អាចទប់បាន ហើយខ្ញុំសង្ឃឹមលើគាត់រហូតដល់ ៧០% ក្នុងការទទួលជ័យជម្នះ។ បង រតនា មានជំហរលើរបស់គាត់ក៏ច្បាស់…អីចឹងបើគាត់ទប់បានគឺល្អណាស់។ ប៉ុន្តែ បង រតនា លើកនេះធ្វើការងារធ្ងន់ជាងលើកមុនបន្តិចហើយ។ អ្វីដែលខ្ញុំបារម្ភបំផុត គឺ ការចាញ់កម្លាំងគេ។ កម្លាំងរបស់ Wei ត្រឹម ៣ទឹកអីអត់ស្រុតទាល់តែសោះ»។ ម្ចាស់មេដាយសំរឹទ្ធស៊ីហ្គេម២០១៩គូសសង្កត់ធ្ងន់បែបនេះ។

រតនា ឡើងសង្វៀនគុនចម្រុះបានចំនួន ១០ លើកក្នុងនោះឈ្នះ ៧ លើកនិងចាញ់៣ដង។ អ្វីដែលគួរឲ្យកត់សម្គាល់ក្នុងចំណោមបរាជ័យ ៣ លើក រូបគេចាញ់កីឡាករចិនរហូតដល់ ២ លើក ជាប់ឯណោះ។ បុរសវ័យ ៣៥ ឆ្នាំចាញ់កីឡាករចិន Haobin Ma ដោយពិន្ទុជាឯកច្ឆន្ទនៅកម្មវិធី ONE: HEROES OF THE WORLD នាខែសីហា ឆ្នាំ ២០១៦ មុនពេលចាញ់ Xie Bin នៅទឹកទី២ក្នុងព្រឹត្តិការណ៍ ONE:KING OF DESTINY កាលខែមេសា ឆ្នាំ ២០១៧។ បែបណាក្ដី ៣ ឆ្នាំចុងក្រោយនេះ ម្ចាស់ក្លិប «សិល្បៈ» មិនទាន់ស្គាល់រសជាតិចាញ់នោះឡើយ (ឈ្នះ ៣លើកជាប់គ្នា)។
ចំណែក ខុន ស៊ីចាន់ បានបញ្ចេញមតិដែរថា៖«អ្នកទាំងពីរ ខ្ញុំគិតថាមិនលើសខ្វះគ្នាប៉ុន្មានទេ។ ខ្ញុំបានមើលវីដេអូរបស់ Wei ហូរហែដែរ។ កីឡាករចិននេះគេល្អការវ៉ៃក្នុងគម្លាតឬចម្ងាយឆ្ងាយ។ ហើយវ៉ៃចេញចូល គឺ ញាប់ដូចគ្នា។ ប៉ុន្តែ បើ រតនា ចូលវ៉ៃកៀក ខ្ញុំគិតប្រហែលខាងយើងល្អកម្លាំងជាង»។
គ្រូបង្វឹក Lorenzo និង រតនា នឹងចាកចេញពីប្រទេសកម្ពុជាទៅកាន់សិង្ហបុរីនៅថ្ងៃសុក្រចុងសប្ដាហ៍នេះ ដើម្បីត្រៀមខ្លួន, ហ្វឹកហាត់, តេស្តសុខភាព និងធ្វើតេស្តកូវីដ-១៩ នៅទីនោះ។

ចាន់ រតនា កំពុងផ្ដោតគោលដៅយកកំណត់ត្រាឈ្នះលើកទី៤ជាប់គ្នានៅសង្វៀន ONE ដែលកាដូសម្រាប់អ្នកគាំទ្រមុនដាច់ឆ្នាំ២០២០ និង កើនចំណាត់ថ្នាក់នៅសង្វៀនអន្តរជាតិមួយនេះដើម្បីទៅជួបជើងខ្លាំងជាបន្តបន្ទាប់ទៀត។

រីឯ Xie Wei ឡើងប្រកួតនៅសង្វៀន ONE Championship ចំនួន ៦ ដងក្នុងនោះឈ្នះ រហូតដល់ ៥ដងឯនោះ។ កីឡាករវ័យ ២៤ ឆ្នាំរូបនេះឈ្នះជាប់គ្នារហូតដល់ ៥ លើកនៅសង្វៀន ONE មុនចាញ់ជើងខ្លាំង ហ្វីលីពីន Danny Kingad នៅក្នុងការប្រកួតចុងក្រោយនាចុងខែ មករា ឆ្នាំ២០២០ នេះ។ បើសរុបការប្រកួតទាំងក្នុងនិងក្រៅសង្វៀន ONE ជើងខ្លាំងមកពីចិនឡើងសង្វៀនគុនចម្រុះបាន ៨ ដង (ឈ្នះ ៥ និង ចាញ់ ៣ដង)៕