កីឡា

ប្រកួតខ្សែក្រវាត់ Fernandes អត់ញញើតជំនាញល្បីផ្តួលដៃគូរបស់ Lineker ទេ

បានផុស

៤ years មុន

នៅ

ថ្ងៃសុក្រ ៤ កុម្ភៈ ២០២២

ដោយ

ខ្លាកំណាចប្រេស៊ីល Bibiano Fernandes កាន់ខ្សែក្រវាត់ពិភពលោក ONE Bantamweight របស់ខ្លួនឡើងសង្វៀនផ្សាយផ្ទាល់ ONE: BAD BLOOD ទល់នឹងជើងខ្លាំង John Lineker នាថ្ងៃទី១១ ខែកុម្ភៈខាងមុខនេះនៅប្រទេសសិង្ហបុរី។

សម្រាប់ការឡើងការពារខ្សែក្រវាត់លើកទី១២នេះ Fernandes ជួបនឹងដៃគូដែលល្បីខ្លាំងខាងផ្តួលដៃគូឲ្យសន្លប់ ប៉ុន្តែកីឡាករប្រេស៊ីលអាយុ៤១ឆ្នាំមិនញញើតនឹងជំនាញផ្តួលដៃគូនោះទេ។

មែនហើយស្ថិតក្នុងវ័យ៣១ឆ្នាំ Lineker ទទួលបានការចាប់អារម្មណ៍ខ្លាំងណាស់ បន្ទាប់ពីប្រកួតលើកទី១ឈ្នះត្រឹមពិន្ទុប៉ុណ្ណោះលើកីឡាករ Muin Gafurov ប៉ុន្តែលើកទី២បានផ្តួលកីឡាករអាមេរិក Troy Worthen ឲ្យសន្លប់ និងបន្តផ្តួលអតីតជើងឯកពិភពលោក Kevin Belingon ឲ្យសន្លប់ទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករប្រេស៊ីលបាននិយាយថា «គ្មានការប្រជែងគ្នាទេ។ ខ្ញុំគ្មានអ្វីប្រជែងជាមួយគាត់ (Lineker) ទេ។ គាត់ជាកីឡាករម្នាក់ដែលចង់បង្កើតអ្វីថ្មី។ ខ្ញុំជាកីឡាករអាជីព ខ្ញុំត្រូវតែវ៉ៃ»។

មុនការប៉ះគ្នាសប្តាហ៍ក្រោយនេះ Fernandes បានសិក្សាស៊ីជម្រៅដែរអំពីសមត្ថភាពរបស់ដៃគូ។ កីឡាករនិយាយថា «និយាយពីភាពខ្លាំងរបស់គាត់គឺ ទាត់ជើងក្រោមល្អ ពូកែអោបរឹត-ក ហើយកណ្តាប់ក៏ច្បាស់ និងស៊ូទ្រាំខ្លាំង។ ចំពោះចំណុចខ្សោយវិញ ខ្ញុំមិនចង់និយាយទេ ពីព្រោះខ្ញុំទុកក្តាប់ឱកាសពេលប្រកួត»។

តាមការគិតទុកជាមុន អ្នកជំនាញជឺជីតស៊ូប្រេស៊ីលយល់ឃើញថា ការប្រកួតនេះនឹងមិនចប់៥ទឹកទេ ហើយនឹងក្លាយជាការប្រកួតកក្រើកតាំងពីដើមទឹក។ កីឡាករនិយាយថា ៖«ខ្ញុំជឿថា យើងនឹងបើកឆាកប្រយុទ្ធស៊ីសាច់ហុតឈាមតាំងពីដំបូង»។

ឆ្លងកាត់ការប្រកួតដោយផ្តួលដៃគូឲ្យសន្លប់១៦លើក Lineker បានក្លាយជាកីឡាករម្នាក់ដែលល្បីខាងផ្តួលដៃគូឲ្យសន្លប់។ ពេលសួរថា តើកណ្តាប់ដៃរបស់ដៃគូម្នាក់នេះធ្វើឲ្យលោកមានអារម្មណ៍បារម្ភ ឬញញើតខ្លះទេ? អ្នកលេងគុនចម្រុះប្រេស៊ីល Fernandes បានឆ្លើយថា ៖«ខ្ញុំអត់ញញើតទេ។ ខ្ញុំត្រៀមរួចហើយដើម្បីតទល់នឹងអ្នកពូកែកណ្តាប់ដៃ»។

«ខ្ញុំបានហ្វឹកហាត់ច្រើនណាស់ សម្រាប់ការប្រកូតមួយនេះទាំងនៅជំរំ និងខាងក្រៅ។ ខ្ញុំអាចនិយាយបានថា ការប្រកួតនេះនឹងក្លាយជាសង្គ្រាមក្តៅគគុក តែខ្ញុំមិនរអានឹងកណ្តាប់ដៃរបស់គាត់ឡើយ»៕

Related Topics:ខ្សែក្រវាត់

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា