កីឡា

ថ្ងៃនេះ U18 នារីកម្ពុជា ប៉ះ U18 នារីថៃ ពាន AFF U18

បានផុស

៣ years មុន

នៅ

ថ្ងៃសុក្រ ២២ កក្កដា ២០២២

ដោយ

បើកឆាកពូល A ពានរង្វាន់បាល់ទាត់នារីអាស៊ានអាយុក្រោម ១៨ ឆ្នាំ (AFF Under-18 Women’s Championship 2022) ក្រុមបាល់ទាត់នារីជម្រើសជាតិកម្ពុជាអាយុក្រោម១៨ឆ្នាំ ត្រូវធ្វើការធ្ងន់នៅពេលជួបក្រុម U18 នារីថៃ វេលាម៉ោង៣:៣០នាទីរសៀលថ្ងៃនេះនៅប្រទេសឥណ្ឌូណេស៊ី។

វានឹងក្លាយជាការប្រកួតដ៏លំបាកសម្រាប់ក្រុមបាល់ទាត់នារីកម្ពុជាអាយុក្រោម១៨ឆ្នាំ ដោយសារបទពិសោធ និងការអភិវឌ្ឍបាល់ទាត់នារីនៅក្នុងប្រទេសទាំងពីរមានលក្ខណៈខុសគ្នាឆ្ងាយ។ កម្ពុជាទើបតែមានសកម្មភាពបាល់ទាត់នារីទាំងក្លឹប និងលីគនារីកំពូល លីគនារីកម្រិយយុវជនប្រហែលជាពីរឆ្នាំចុងក្រោយនេះទេ ដូច្នេះកម្រិតគុណភាពនៅខ្សោយ។ ជាពិសេសទៀតនោះ ក្រុម U18 នារីកម្ពុជាក៏មិនមានបទពិសោធច្រើនទាំងការប្រកួតក្នុងស្រុក និងក្រៅប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែកកីឡាបាល់ទាត់នារីថៃមានការអភិវឌ្ឍជាច្រើនឆ្នាំមកហើយ។ ទាំងនារីជម្រើសជាតិក្រុមធំ និងកម្រិតយុវជនក៏មានបទពិសោធច្រើនក្នុងការប្រកួតក្នុងស្រុក ហើយបាល់ទាត់នារីថៃក៏លេចធ្លោនៅលើឆាកអន្តរជាតិដែរ ដូច្នេះក្រុម U18 ថៃក៏ជាផ្នែកមួយនៃការអភិវឌ្ឍ និងមានបទពិសោធច្រើនដែរ។

ទោះបីជាយ៉ាង លោក ទុំ សារ៉ាយ គ្រូបង្វឹកក្រុមបាល់ទាត់នារីជម្រើសជាតិកម្ពុជាអាយុក្រោម ១៨ឆ្នាំកម្ពុជា បានប្រាប់ថា ៖«វាល្អសម្រាប់កីឡាការិនីក្មេងៗដែលពួកគេទទួលបានឱកាសនេះដើម្បីលេង។ ក្នុងក្រុមអាយុនេះ វាជារឿងសំខាន់ដែលពួកគេបានបង្ហាញទេពកោសល្យ និងសមត្ថភាពរបស់ពួកគេ។ ប៉ុន្តែ ទោះបីជាបែបណាក៏ដោយ ខ្ញុំដឹងថា ការប្រកួតប្រជែងនឹងមានភាពតានតឹង»។

ក្រុម U18 នារីកម្ពុជា ស្ថិតនៅពូល A ជាមួយក្រុមខ្លាំងៗម្ចាស់ផ្ទះឥណ្ឌូណេស៊ី វៀតណាម ថៃ និងសិង្ហបុរី៕

អត្ថបទ៖ វីរបុត្រ

Related Topics:ក្រុមបាល់ទាត់នារីកម្ពុជា