ថៃ ចោទថា កម្ពុជា មិនផ្តល់ប្រាក់ឧបត្ថម្ភ ឬកន្លែងស្នាក់នៅដល់អាជ្ញាកណ្តាល សម្រាប់ព្រឹត្តិការណ៍ ស៊ីហ្គេម

លើកនេះ ប្រទេសថៃ បានបង្ហាញក្តីព្រួយបារម្ភអំពីបញ្ហាបន្ថែមទៀត ពាក់ព័ន្ធនឹងព្រឹត្តិការណ៍ប្រកួតកីឡាស៊ីហ្គេមនៅប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់សារព័ត៌មាន Sanook, ប្រធាន​ក្រុម​អត្តពលិក​ថៃ លោក Thana Chaiprasit បាននិយាយថា “បញ្ហាមួយទៀតដែលកំពុងប្រឈមនៅពេលនេះគឺ ម្ចាស់ផ្ទះផ្ញើលិខិតអញ្ជើញទៅអាជ្ញាកណ្តាលនៃសហព័ន្ធកីឡានីមួយៗ ប៉ុន្តែមិនមានប្រាក់ឧបត្ថម្ភ ឬផ្តល់កន្លែងស្នាក់នៅឡើយ។ ធម្មតា​បើ​គ្មាន​ប្រាក់​ឧបត្ថម្ភ​ទេ យ៉ាង​ហោច​ក៏​គួរ​មាន​កន្លែង​ស្នាក់​នៅដែរ ប៉ុន្តែ​លើក​នេះ​មិន​មាន​អ្វី​ផ្តល់​ជូនសោះ”។

លោកបន្តថា “ពេល​ដែលយើង​សួរ​អំពី​បញ្ហា​នេះ​ពីមុន ​កម្ពុជា​ឆ្លើយ​ថា ​មិន​មាន​កញ្ចប់ថវិកា​ក្នុង​ផ្នែក​នេះ​ទេ។ ប្រសិនបើអាជ្ញាកណ្តាលអន្តរជាតិមកដល់ ពួកគេនឹងចេញថ្លៃចំណាយដោយខ្លួនឯង ហើយ​បើ​ក្រុម​អន្តរជាតិ​ត្រៀម​ខ្លួនមិនទាន់​ទេ កម្ពុជា​នឹង​ប្រើ​អាជ្ញាកណ្តាលខ្លួនឯង ​ដើម្បី​កាត់ក្តី​រាល់​ការ​ប្រកួត​ស៊ីហ្គេម”។

ទោះបីជាយ៉ាងណាក៏ដោយ នេះគ្រាន់តែជាការលើកឡើងពីភាគីថៃ តែម្ខាងប៉ុណ្ណោះ។

គួរបញ្ជាក់ថា សម្រាប់ការប្រកួតកីឡាស៊ីហ្គេមលើកទី៣២ នៅរាជធានីភ្នំពេញ នៃប្រទេសកម្ពុជា, ការប្រកួតនឹងធ្វើឡើងនៅចន្លោះថ្ងៃទី៥ ដល់ ១៧ ខែឧសភា ដោយមានកីឡាសរុប ៣៦ ប្រភេទ ប្រកួតប្រជែងដណ្តើមមេដាយមាសចំនួន៦០៨ ដែលជាចំនួនមេដាយមាសច្រើនបំផុតក្នុងប្រវត្តិសាស្ត្រកីឡាអាស៊ាន៕

ប្រែសម្រួល៖ Vann Vann

ប្រភព៖ Sanook

ចុចអាន៖ រដ្ឋមន្រ្តីក្រសួងព័ត៌មានលើកទឹកចិត្តកីឡាករប្រដាល់គុនខ្មែរឱ្យប្រឹងប្រែងហ្វឹកហាត់ដើម្បីត្រៀមស៊ីហ្គេម ខាងមុខ