រដ្ឋមន្រ្តីក្រសួងព័ត៌មានលើកទឹកចិត្តកីឡាករប្រដាល់គុនខ្មែរឱ្យប្រឹងប្រែងហ្វឹកហាត់ដើម្បីត្រៀមស៊ីហ្គេម ខាងមុខ

រដ្ឋមន្រ្តីក្រសួងព័ត៌មានលោក ខៀវ កាញារីទ្ធ បានលើកឡើងថា ការប្រកួតតែងមានឈ្នះ មានចាញ់ តែទោះយ៉ាងណាត្រូវតែខំប្រឹងឱ្យអស់ពីសមត្ថភាព ដើម្បីឱ្យវិស័យកីឡាគុនខ្មែរ កាន់តែរីកចម្រើន ឈានទៅមុខ។ លោករដ្ឋមន្រ្តីលើកឡើងបែបនេះ នៅក្នុងឱកាសអញ្ជើញចូលរួមកម្មវិធីប្រដាល់គុនខ្មែរ នៅខេត្តស្វាយរៀង កាលពីថ្ងៃទី ២៦ ខែ មីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្រ្តី បានលើកឡើងដូច្នេះថា« ការប្រកួត មានឈ្នះ មានចាញ់ ដូចក្រសួងអប់រំ បានលើកឡើងនៅ​ពេល​ប្រឡងថា អ្នកចេះ គឺជាប់ ដូចនៅក្នុងការប្រកួតប្រដាល់នេះដែរ អ្នកពូកែ គឺឈ្នះ ហើយយើងអ្នកទស្សនាសូមទះដៃ ទោះខ្មែរយើងឈ្នះ ឬបរទេសឈ្នះក៏ដោយ ព្រោះក្នុងការប្រកួតកីឡា សំខាន់យកបច្ចេកទេស ។ ដូច្នេះសម្រាប់​ការប្រកួតនេះ ក៏ជាការហ្វឹកហាត់កីឡាករខ្មែរយើង ដើម្បីពង្រឹងសមត្ថភាព បច្ចេកទេស ឈានទៅចូលរួមប្រកួត​ក្នុងកីឡាស៊ីហ្គេម ដែលកម្ពុជាធ្វើជាម្ចាស់ផ្ទះ នាពេលខាងមុខនេះ»។

ជាមួយគ្នានេះលោក ខៀវ កាញារីទ្ធ បានថ្លែងកោតសរសើរចំពោះអាជ្ញាធរខេត្តស្វាយរៀង ដែលបានផ្តល់ទីតាំង និងចូលរួមសហការជាមួយក្រុមការងារ ទូរទស្សន៍ជាតិកម្ពុជា ក្នុងការរៀបចំតុបតែង ទេសភាព ហេដ្ឋារចនាសម្ព័ន្ធ បានយ៉ាងស្រស់ស្អាត ដើម្បីរៀបចំបានការប្រកួត កីឡាប្រដាល់គុនខ្មែរ។

វិស័យកីឡាប្រដាល់គុនខ្មែរ បច្ចុប្បន្នមានការគាំទ្រខ្លាំងពីសំណាក់ពលរដ្ឋខ្មែរ ជាពិសេសនៅពេលដែលមាន​ការប្រកួត​លក្ខណៈ​អន្តរជាតិ។ កីឡាករប្រដាល់គុនខ្មែរ ដែលកំពុងមានឈ្មោះបោះសំឡេងសព្វថ្ងៃ និងមាន​ការគាំទ្រច្រើនពីមហា​ជន មានដូចជា កីឡាករ ធឿន ធារ៉ា ព្រំ សំណាង ពេជ្រ សម្បត្តិ ឈឿន ល្វៃ និងកីឡាករលំដាប់A របស់កម្ពុជា មួយចំនួនទៀត។

អ្នកជំនាញកីឡាមើលឃើញថា កំណើននៃការគាំទ្រដ៏សម្បើមនេះ គឺជាផ្នែកដ៏សំខាន់ ដែលជួយជំរុញវិស័យកីឡា​ប្រដាល់គុនខ្មែរ ឱ្យកាន់តែល្បីល្បាញទាំងថ្នាក់ជាតិ និងអន្តរជាតិ ជាពិសេសនឹងមានធនធានល្អៗសម្រាប់វិស័យមួយនេះ កាន់តែច្រើន និងបានផ្តល់តម្លៃខ្លួនក្នុងការប្រកួតកាន់តែខ្ពស់សម្រាប់កីឡាករ៕

អត្ថបទ៖ ភក្ដី