កីឡា

តេក្វាន់ដូកម្ពុជាដាក់វិញ្ញាសាសម្តែងថ្មីមួយដែលមានបទភ្លេងខ្មែរសុទ្ធក្នុងស៊ីហ្គេម

បានផុស

២ years មុន

នៅ

ថ្ងៃព្រហស្បតិ៍ ១៣ មេសា ២០២៣

ដោយ

ក្នុងចំណោមវិញ្ញាសាដែលសហព័ន្ធកីឡាតេក្វាន់ដូកម្ពុជា និងគណៈកម្មាធិការជាតិរៀបចំការប្រកួតកីឡាស៊ីហ្គេម (CAMSOC) បានដាក់ឲ្យប្រកួតជាច្រើនក្នុងកីឡាស៊ីហ្គេម លើកទី៣២ ក៏មានវិញ្ញាសាសម្តែងមួយដែលថ្មីសុទ្ធសាធសម្រាប់អត្តពលិកតេក្វាន់ដូកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាការិនីតេក្វាន់ដូជម្រើសជាតិកម្ពុជា ឈឿង លីណា ដែលកំពុងហ្វឹកហាត់នៅប្រទេសកូរ៉េបានប្រាប់ថា កញ្ញាត្រៀមប្រកួតពីរវិញ្ញាសាក្នុងកីឡាស៊ីហ្គេម លើកទី៣២ គឺវិញ្ញាសាសម្តែងមេគុណធម្មតា (ស្រី៣នាក់) និងវិញ្ញាសាសម្តែងមេគុណ (ស្រី៣ ប្រុស២) ដែលមានបទភ្លេង និងចង្វាក់ភ្លេង។ វិញ្ញាសាសម្តែងថ្មីនេះគឺថ្មីសុទ្ធសម្រាប់តេក្វាន់ដូកម្ពុជា ពីព្រោះកន្លងមកកម្ពុជាមិនធ្លាប់បានចូលរួមប្រកួតឡើយ។

លីណា បាននិយាយថា ៖«សម្រាប់ការប្រកួតវិញ្ញាសានេះ យើងជាអ្នកបង្កើតបទភ្លេងខ្លួនឯងសុទ្ធសាធតែម្តង។ អ្វីដែលគួរឲ្យចាប់អារម្មណ៍នោះគឺយើងដាក់បទភ្លេងខ្មែរសុទ្ធ។ ចង្វាក់ភ្លេងគឺប្រទេសនីមួយៗជាអ្នកធ្វើខ្លួនឯង ហើយរកស្ទីលប្រកួតសម្តែងរៀងៗខ្លួន ធ្វើយ៉ាងណាឲ្យស៊ីនឹងបទភ្លេង»។

«បទភ្លេងហ្នឹងមានរយៈពេល១នាទី៤០វិនាទី យើងត្រូវសម្តែងយ៉ាងមិចឲ្យពេញតាមរយៈពេលបទភ្លេងគឺ មិនត្រូវសម្តែងឈប់មុនបទភ្លេងច្រើនពេក ឬសម្តែងលើសបទភ្លេង ក៏អត់បានទេ»។ កីឡាការិនីរូបនេះបានបញ្ជាក់។

តាមពិតទៅ វិញ្ញាសាសម្តែងបទភ្លេងស្រី៣ប្រុស២នេះមានយូរហើយដែលប្រទេសក្នុងតំបន់អាស៊ានមួយចំនួនក៏ខ្លាំងរួចទៅហើយ ប៉ុន្តែសម្រាប់កម្ពុជាទើបរៀបចំឲ្យមានការប្រកួតលើកដំបូង។

កញ្ញា ឈឿង លីណា ដែលបានបញ្ចប់ការសិក្សាពេទ្យជំនាញ «ឱសថការី» ពីប្រទេសវៀតណា បានបញ្ជាក់ថា សម្រាប់វិញ្ញាសាសម្តែងបទភ្លេងស្រី៣ប្រុស២នេះប្រទេសដែលខ្លាំងនៅតំបន់អាស៊ានគឺ វៀតណាម ថៃ និងហ្វីលីពីន ដែលនឹងធ្វើឲ្យលំបាកសម្រាប់ក្រុមកម្ពុជាក្នុងនាមជាម្ចាស់ផ្ទះ។

កីឡាការិនី ឈឿង លីណា បានចូលហ្វឹកហាត់តេក្វាន់ដូជាមួយក្រុមជម្រើសជាតិសាជាថ្មី បន្ទាប់ពីនាងឃ្លាតឆ្ងាយរយៈពេល៣ឆ្នាំទៅរៀនជំនាញឱសថការីនៅប្រទេសវៀតណាម។ បន្ទាប់ពីចប់ស៊ីហ្គេម កញ្ញាគ្រោងនឹងរកការងារធ្វើពិតប្រាកដពាក់ព័ន្ធនឹងជំនាញពេទ្យរបស់នាង៕

អត្ថបទ៖ វីរបុត្រ

Related Topics:កីឡាស៊ីហ្គេម ឆ្នាំ២០២៣ ឈឿង លីណា