សំឡេងផ្ទុះកក្រើកមេឃ! គុយវ៉ែត បន្លឺ​សំឡេង​ស៊ីរ៉ែន​​អាសន្ន និង​បើក​ប្រព័ន្ធខែល​ការពារ​អាកាស

ព្រឹក​ព្រលឹមស្រាងៗ​ថ្ងៃពុធ ទី​៣ ខែ​មិថុនា នេះ កងទ័ពរបស់ប្រទេសគុយវ៉ែត បានប្រកាសអាសន្នថា ប្រព័ន្ធការពារអាកាសរបស់ខ្លួន បានបើកប្រតិបត្តិការវាយបក និងស្ទាក់ចាប់យ៉ាងទាន់ហន់ ទៅលើការវាយប្រហារដោយមីស៊ីល និងដ្រូនពីសំណាក់សត្រូវ។

យោងតាម​ទីភ្នាក់ងារ​ព័ត៌មាន Anadolu ការប្រកាសនេះ បានធ្វើឡើង បន្ទាប់ពីប្រជាពលរដ្ឋនៅទូទាំងប្រទេស មាន​ភាព​ភ័យ​ខ្លាច និង​បានឮសំឡេងផ្ទុះយ៉ាងខ្លាំងៗកក្រើកពេញផ្ទៃមេឃ។ ភ្លាមៗនោះ ខាងយោធាគុយវ៉ែត បានចេញមុខមកជម្រាបជូនសាធារណជនថា សំឡេងផ្ទុះទាំងនោះ គឺជាលទ្ធផលនៃការកម្ទេចអាវុធសត្រូវនៅលើអាកាស ដោយជោគជ័យ ពីប្រព័ន្ធការពាររបស់ខ្លួនតែប៉ុណ្ណោះ ប៉ុន្តែព័ត៌មានលម្អិតបន្ថែមជុំវិញការខូចខាត ឬប្រភពពិតប្រាកដនៃការវាយប្រហារនេះ មិនទាន់ត្រូវបានបញ្ជាក់ច្បាស់លាស់នៅឡើយទេ។

យ៉ាង​ណាមិញ គេ​ដឹង​ថា ស្ថានភាពដ៏​គ្រោះថ្នាក់នេះ គឺជាដុំ​ភ្លើង ដែលបន្តឆេះរាលដាល តាំងពីចុងខែកុម្ភៈកន្លងទៅមក​ម៉្លេះ។ កាលណោះ សហរដ្ឋអាមេរិក និងអ៊ីស្រាអែល បានសហការគ្នា បើកការវាយប្រហារតាមអាកាសយ៉ាងចាស់ដៃទៅលើប្រទេសអ៊ីរ៉ង់។ ប្រតិបត្តិការយោធានោះ បាន​ឆក់​យកជីវិតមនុស្សអស់ជាង ៣ ០០០នាក់ រួមទាំងបានសម្លាប់មេដឹកនាំកំពូលរបស់អ៊ីរ៉ង់ គឺលោក Ayatollah Ali Khamenei ព្រមទាំងមន្ត្រីជាន់ខ្ពស់ និងមេបញ្ជាការយោធាជាច្រើនរូបទៀតផងដែរ។ ជា​ការ​សងសឹក អ៊ីរ៉ង់ បាន​បើក​ការ​វាយ​ប្រហារ​លើ​​ទីតាំង​​ឈរ​ជើង​របស់​កង​​ទ័ព​អាមេរិក​ នៅ​ទូទាំង​តំបន់​មជ្ឈិមបូព៌ា។​

ដ្បិត​មានការសម្របសម្រួលពីប្រទេសប៉ាគីស្ថាន រហូតឈានទៅដល់ការបង្កើតកិច្ចព្រមព្រៀងបទឈប់បាញ់គ្នា កាលពីថ្ងៃទី៨ ខែមេសា ក៏ដោយ ក៏សន្តិភាពពិតប្រាកដ នៅតែមិនទាន់អាចកើតមានឡើងបាននៅឡើយ។ រាល់កិច្ចខិតខំប្រឹងប្រែង ដើម្បីឈានទៅរកការចរចាបង្កើតកិច្ចព្រមព្រៀងសន្តិភាពឱ្យបានទូលំទូលាយ និងរឹងមាំជាងមុនរវាងភាគីពាក់ព័ន្ធ ហាក់ដូចជាកំពុងជួបភាពទាល់ច្រក និងបរាជ័យជាបន្តបន្ទាប់ ដែលបន្សល់ទុកនូវស្រមោលសង្គ្រាម និងការវាយប្រហារសងសឹកគ្នាទៅវិញទៅមក មិនចេះចប់មិនចេះហើយបែបនេះ៕

ប្រែសម្រួល៖ ឈាង