Mbappe ចង់បានតម្លៃពលកម្ម២០៦​លានផោន បើសម្រេចទៅក្លិបថ្មី

តារា​បាល់ទាត់​ឆ្នើម Kylian Mbappe មាន​សេចក្តី​រាយការណ៍​កំពុងស្នើសុំកញ្ចប់​ពលកម្ម​ដែលមានតម្លៃ ២០៦លានផោន ប្រសិនបើក្លិបណាមួយចង់បានរូបគេនៅរដូវក្តៅនេះ។

កីឡាករ Kylian Mbappe ជាគោលដៅសំខាន់របស់ក្លិបយក្ស Real Madrid យូរមកហើយ ប៉ុន្តែនៅតែមិនអាចឈានដល់ការចុះកុងត្រាបានឡើយ។ ក្លិបអ្នកមានបារាំងមិនចង់ឲ្យ Kylian Mbappe ចាកចេញដោយគ្មានតម្លៃខ្លួនទេ ខណៈកិច្ចសន្យារបស់កីឡាករសញ្ជាតិបារាំងរូបនេះនឹងត្រូវផុតនៅរដូវក្ដៅខាងមុខ។

កីឡាកររូបនេះធ្លាប់បដិសេធសំណើរបស់ Real Madrid ដែលបានផ្ដល់ប្រាក់ឈ្នួលក្នុងមួយសបា្ដហ៍ប្រមាណ ៨៩៣,០០០ ផោនក្នុងការនាំយករូបគេទៅកាន់ទឹកដី Santiago Bernabeu។

យោងតាមការផ្សាយរបស់សារព័ត៌មាន Marca ថា ម្តាយរបស់ Kylian Mbappe គឺលោកស្រី Fayza Lamari ជាអ្នកស្នើសុំកញ្ចប់ទឹកប្រាក់ ២០៦ លានផោនសម្រាប់តម្លៃពលកម្មរបស់កូនប្រុស។

ក្លិប Paris Saint Germain បន្ទាប់​ពី​តារាឆ្នើម Lionel Messi បាន​ចាកចេញទៅទឹកដីសហរដ្ឋអាមេរិក មិនទាន់មានការនាំយកកីឡាករសំខាន់ៗរូបណាមកចូលរួម​ទេ។ សម្រាប់តារាឆ្នើមសញ្ជាតិប្រេស៊ីលគឺកីឡាករ Neymar ក៏​មាន​ព័ត៌មានជុំវិញការផ្លាស់ទៅលេងនៅក្លិបក្នុងលីគអារ៉ាប៊ីសាអូឌីតផងដែរ។

ទោះបីជាមានកង្វះកីឡាករនៅតំបន់ប្រយុទ្ធ ក្រោយពីការចាកចេញរបស់វីរបុរសបាល់ទាត់របស់ក្លិប Real Madrid គឺកីឡាករ Karim Benzema ក៏ក្រុមរបស់លោក Carlo Ancelotti មិនត្រូវបានគេរំពឹងថា នឹងនាំយកខ្សែប្រយុទ្ធម្នាក់ទៀតនាពេលបច្ចុប្បន្ននេះឡើយ៕

ប្រែសម្រួល៖ ផា រតនា
ប្រភព៖ Dailymail