កីឡាក្រសួងមហាផ្ទៃ ចេញទៅប្រកួតកីឡានគរបាលពិភពលោក នៅកាណាដា

នៅថ្ងៃអង្គារ៍ ទី២៥ ខែកក្កដា ឆ្នាំ២០២៣ ប្រតិភូកីឡានគរបាលកម្ពុជា បានទៅចូលរួមប្រកួតកីឡានគរបាល និងកងពន្លត់អគ្គិភ័យពិភពលោក លើកទី២០ ឆ្នាំ២០២៣ (The 20th World Police and Fire Games 2023) នៅប្រទេសកាណាដា។

ប្រតិភូកីឡាក្រសួងមហាផ្ទៃធ្វើដំណើរទៅប្រទេសកាណាដា ដើម្បីចូលរួមព្រឹត្តិការណ៍កីឡាកម្រិតពិភពលោកនេះ មានសរុបចំនួន ៤៨នាក់ ដែលកម្មវិធីប្រកួតនឹងចាប់ផ្ដើមពីថ្ងៃទី២៨ ខែកក្កដា ដល់ថ្ងៃទី៦ ខែសីហា ឆ្នាំ២០២៣។

លោក​ សរ សិទ្ធិ អនុរដ្ឋលេខាធិការក្រសួងមហាផ្ទៃ ​ដែល​ជា​អ្នក​ដឹកនាំប្រតិភូ បាន​និយាយថា ការរៀបចំកីឡានគរបាល និងកងពន្លត់អគ្គិភ័យពិភពលោក គឺដើម្បីបង្ហាញពីសាមគ្គីភាព សមត្ថភាព និងទេពកោសល្យរបស់កងនគរបាលនៃប្រទេសសមាជិក​នីមួយៗ និងតែងតែមានប្រទេសជាង៧០ បានចាត់បញ្ជូនប្រតិភូកីឡាចូលរួមរៀងងរាល់ការប្រកួត ហើយប្រទេសកម្ពុជាធ្លាប់បានបញ្ជូនប្រតិភូកីឡាចូលរួមចំនួន២លើក ក្នុងចំណោមការរៀបចំ២០លើក​កន្លង​មក។

កីឡាករ កីឡាការិនីកម្ពុជា នឹងប្រកួតលើ ១៣ប្រភេទកីឡា រួមមានកីឡាវាយសី កីឡាលើកទម្ងន់ កីឡាយូដូ កីឡាជីជិតស៊ូ កីឡាការ៉ាតេ កីឡាហែលទឹក កីឡាវាយកូនឃ្លីលើតុ កីឡាបាល់ទះក្នុងសាល កីឡាបាល់ទះឆ្នេរខ្សាច់ កីឡាចំបាប់ កីឡាចំបាច់កាច់ដៃ កីឡាវាយកូនគោល កីឡា Bench Press និងកីឡា Push Pull Lifting៕

អត្ថបទ៖ មន្នីរ័ត្ន