កីឡា

កីឡាករ ឡុង សុភី ប្រកាសដើរចេញពីប្រដាល់គុនខ្មែរ ក្រោយប្រឡូក២០ឆ្នាំ

បានផុស

២ ថ្ងៃ មុន

នៅ

ថ្ងៃសុក្រ ១៥ កញ្ញា ២០២៣

ដោយ

កីឡាករប្រដាល់ ឡុង សុភី បានប្រកាសឈប់ពីរប្រដាល់គុនខ្មែរហើយ បន្ទាប់ពីបានប្រឡូកក្នុងអាជីពឈឺខ្លួនមួយនេះអស់រយៈពេលប្រមាណ២០ឆ្នាំដោយធ្លាប់បានឈ្នះខ្សែក្រវាត់ចំនួន៨គ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឡុង សុភី បាននិយាយថា ៖«សួស្តី ពុកម៉ែ បងប្អូន ដែលស្រឡាញ់ គាំទ្រ ប្រដាល់គុនខ្មែរទាំងអស់គ្នា ខ្ញុំបាទ ឡុង សុភី ហៅ នី សុភី សូមអរគុណ ពុកម៉ែ បងប្អូន ដែលស្រឡាញ់ គាំទ្រខ្ញុំពីមុនមក។ ចាប់ពីថ្ងៃនេះទៅខ្ញុំចាកចេញពីសង្វៀនប្រកួតហើយ។ ការខិតខំប្រឹងប្រែងរបស់ខ្ញុំ ២០ឆ្នាំ ដល់ថ្ងៃបញ្ចប់ហើយ»។

«នៅតែនឹក នៅតែស្រឡាញ់ តែកាត់ចិត្តដើរចេញពីវាដើម្បីដើរឲ្យបានឆ្ងាយ។ ខ្ញុំបាទ ឡុង សុភី សូមអរគុណបងប្អូនដែលស្រឡាញ់ គាំទ្រខ្ញុំទាំងអស់គ្នាខ្លាំងណាស់»។ ឡុង សុភី បានបន្ថែម។

ឡុង សុភី ជាសិស្សរបស់ក្លិបឡុងសាលវ័ន្តកីឡាដែលមានលោក ឡុង សាលវ័ន្ត ជាគ្រូបង្ហាត់បានចាប់អាជីពប្រដាល់គុនខ្មែរតាំងពីក្មេងដែលរហូតដល់ពេលនេះមានរយៈពេលប្រមាណ២០ឆ្នាំ។

កីឡាកររូបនេះមានសមត្ថភាពល្អដែលមានដៃគូជាមិត្តរួមជាតិខ្លាំងៗដូចជា កែវ រំចង់, រឿង សោភ័ណ្ឌ, ពេជ្រ សីហា និង ម៉ឺន សុភា ជាដើម។ ដៃគូដែលកក្រើករំជើបរំជួលខ្លាំងបំផុតក្នុងពិភពប្រដាល់គុនខ្មែរគឺ កែវ រំចង់ ដែលការប្រកួតរបស់ពួកគេរបស់ពួកគេម្តងៗបានធ្វើឲ្យអ្នកគាំទ្រផ្ទុះការចាប់អារម្មណ៍ខ្លាំងបំផុតនៅសង្វៀនបាយ័ន។

នៅឆ្នាំ២០២៣នេះ រូបគេបានឡើងប្រកួតបានប្រហែលជា៣ដងប៉ុណ្ណោះគឺឈ្នះពិន្ទុកីឡាករឡាវ ស៊ីធឿង, ចាញ់ពិន្ទុកីឡាករថៃ យ៉តឌីសេល និង ផេតសាម៉ាត’។

ក្នុងអាជីពប្រដាល់រយៈពេល២០ឆ្នាំកន្លងទៅនេះ ឡុង សុភី ធ្លាប់បានចូលរួមប្រកួតដណ្តើមខ្សែក្រវាត់ចំនួន១១ដង ក្នុងនោះបានឈ្នះខ្សែក្រវាត់៨ដង ហើយក៏ធ្លាប់ទទួលបានត្រឹមលេខ២ម្តង លេខ៣ម្តង និងលេខ៤ម្តង៕