Ronaldo ថា​ លីគអារ៉ាប៊ីសាអ៊ូឌីតល្អជាងលីគបារាំង

ក្នុងកម្មវិធី Globe Soccer Awards នៅទីក្រុងឌូបៃកាលពីយប់ថ្ងៃស្រុក កីឡាករ Cristiano Ronaldo បានបង្ហាញពីការយល់ឃើញរបស់ខ្លួនថា Saudi Pro League មានកម្រិតប្រកួតប្រជែងខ្លាំងជាង Ligue 1 របស់បារាំង។

Ronaldo បានចូលរួមក្នុងកម្មវិធី Globe Soccer Awards នៅទីក្រុងឌូបៃ ​ដើម្បី​ទទួល​ពានរង្វាន់ចំនួន៣ រួមមានពានរង្វាន់អ្នកលេងនៅមជ្ឈិមបូព៌ាល្អបំផុតឆ្នាំ២០២៣ ពានរង្វាន់កីឡាករដែលមានអ្នកគាំទ្រចូលចិត្តប្រចាំឆ្នាំ២០២៣ និងពានរង្វាន់ម៉ារ៉ាដូណាឆ្នាំ២០២៣។ ចំណែក​កីឡាករ Erling Haaland បានឈ្នះពានរង្វាន់ជាកីឡាករល្អបំផុតផ្នែកបុរស។ មុនពេលពានរង្វាន់សំខាន់ៗត្រូវបានបង្ហាញ Ronaldo បានចូលរួមក្នុងវគ្គឆ្លើយសំណួរ​ពាក់ព័ន្ធកម្រិតលីគបាល់ទាត់នៅអារ៉ាប៊ីសាអ៊ូឌីត​នាពេលបច្ច្បន្ន។

Ronaldo បាននិយាយថា៖«លីគអារ៉ាប៊ីសាអ៊ូឌីត​ស្ថិតនៅក្នុងដំណើរការដែលកំពុងអភិវឌ្ឍហើយត្រូវចំណាយពេលយូរ។ ពីមួយជំហានទៅមួយជំហាន យើងនឹងឈានដល់កម្រិតខ្ពស់បំផុត។ ខ្ញុំជឿថា ពួកគេនឹងស្ថិតក្នុងលំដាប់កំពូល៣ឬ៤នៅលើលោក។ ខ្ញុំគិតថា យើងនឹងឈានទៅដល់ចំណុចនោះ»។

«និយាយឱ្យត្រង់ទៅ ខ្ញុំគិតថា លីគអារ៉ាប៊ីសាអ៊ូឌីត​មិនអន់ជាងលីគរបស់បារាំងទេតាមគំនិតរបស់ខ្ញុំ។ នៅលីគបារាំង ខ្ញុំគិតថា អ្នកមានក្រុម២ឬ​៣ដែលមានកម្រិតលេងល្អ។ នៅ​អារ៉ាប៊ីសាអ៊ូឌីត​ ខ្ញុំ​គិត​ថា​ វា​មាន​ការ​ប្រកួត​ប្រជែង​ជាង។ ពួកគេក៏អាចនិយាយអ្វីដែលពួកគេចង់និយាយ តែនេះគ្រាន់តែជាគំនិតរបស់ខ្ញុំ។ ខ្ញុំបានលេងនៅទីនោះអស់រយៈពេលមួយឆ្នាំ ដូច្នេះខ្ញុំដឹងពីអ្វីដែលខ្ញុំកំពុងនិយាយ ប៉ុន្តែ​ខ្ញុំ​គិត​ថា​ ពេល​នេះ​យើង​ល្អ​ជាង​លីគ​របស់​បារាំង​»។

សម្រាប់ការលើកឡើងខាង​លើ​គ្រាន់​តែ​ជាគំនិត​ផ្ទាល់​ខ្លួន​របស់ Cristiano Ronaldo ប៉ុណ្ណោះ​ បន្ទាប់​ពី​រូបគេចូល​រួម​​ជាមួយក្លិប Al Nassr កាលពីខែមករា ឆ្នាំមុន ហើយក្រោយមក​ប្រទេសអារ៉ាប៊ីសាអ៊ូឌីត​ក៏មាន​កីឡាករឆ្នើមៗ​ជា​ច្រើន​ដូចជា Sadio Mane, Karim Benzema, N’Golo Kante, Fabinho, Allan Saint-Maximin, Edouard Mendy, Neymar និង Kalidou Koulibaly៕

ប្រែសម្រួល៖ ផា រតនា
ប្រភព៖ Fannatio