លីគហ្វីលីពីនរដូវកាលថ្មីមានក្រុមកើនឡើងជាងទ្វេដង

លីគបាល់ទាត់កំពូលរបស់ប្រទេសហ្វីលីពីនរដូវកាលឆ្នាំ២០២៤-២៥ នឹងមានក្រុមចូលរួមប្រកួតប្រជែងរហូតដល់១៥ក្រុម​ ប្រៀប​ធៀប​នឹង​​រដូវ​កាល​មុន​ៗ​មាន​តែ​​៧​ក្រុម​ ដែល​នេះ​មាន​ន័យ​ថា ក្រុម​បាន​កើន​ឡើង​ច្រើន​ជាង​ពីរ​ដង។

ការអភិវឌ្ឍដ៏អស្ចារ្យបំផុតសម្រាប់បាល់ទាត់ហ្វីលីពីន ខណៈ​ក្លិបបាល់ទាត់ទាំង១៥ បានបញ្ជាក់ពីការចូលរួម​សម្រាប់រដូវកាលឆ្នាំ២០២៤ Philippines Football League (PFL) គ្រោង​ចាប់ផ្តើមនៅថ្ងៃទី៩ ខែមីនា ឆ្នាំ២០២៤។ លីគបាល់ទាត់ហ្វីលីពីនបានចេញផ្សាយឃ្លីបវីដេអូខ្លីជាផ្លូវការ ដែល​បាន​បង្ហាញ​ពី​រូប​ភាព​នៃ​ក្លិប​ចុះហត្ថលេខាដើម្បីចូល​រួម។

ក្រុមខ្លាំងៗក្នុងលីគកំពូលហ្វីលីពីនរួមមានក្រុម Dynamic Herb Cebu, Stallion Laguna, United City, Mendiola 1991, Maharlika Taguig នឹងត្រូវបន្តប្រកួតប្រជែងជាមួយក្រុមម្ចាស់ជើងឯករដូវកាលមុន Kaya-Iloilo FC ខណៈក្រុម Manila Montet និង City of Taguig FC សុទ្ធតែជាក្រុមថ្មីនឹងត្រូវចាប់ផ្តើមបទពិសោធថ្មីមួយទៀតជាមួយក្រុម Don Bosco Garelli, Manila Digger,Tuloy FC ។ ការវិល​ត្រឡប់មកវិញរបស់ក្រុម Davao Aguilas, Loyola FC, Philippine Air Force និង Philippine Army ត្រូវបានគេរំពឹងថានឹង​ធ្វើ​កម្រិត​ប្រកួត​ប្រជែង​កាន់​តែ​ខ្ពស់។

សម្រាប់ក្រុមទាំងអស់សុទ្ធតែបានឈានជើងចូលទីលានរួចហើយ ខណៈពួកគេបានចូលរួមក្នុងការប្រកួតពានរង្វាន់ Copa Paulino Alcantara Cup ឆ្នាំ២០២៣ ក្នុង​នោះ​ការអបអរក្រុម Kaya-Iloilo FC ជាម្ចាស់ជើងឯកពានរង្វាន់លីគកាលពីរដូវកាលមុន៕

ប្រែសម្រួល៖ ផា រតនា
ប្រភព៖ Dugout