កីឡា

ឃីកបុកស៊ីងមាន១០វិញ្ញាសា«កីឡាក្នុងសាល និងគុនចម្រុះអាស៊ី»នៅថៃ

បានផុស

១ year មុន

នៅ

ថ្ងៃអង្គារ ៥ មីនា ២០២៤

ដោយ

កីឡាឃីកបុកស៊ីងនឹងមានក្នុងព្រឹត្តិការណ៍កីឡាក្នុងសាល និងគុនចម្រុះអាស៊ីលើកទី៦ ឆ្នាំ២០២៤ នៅប្រទេសថៃ។

សហព័ន្ធកីឡាឃីកបុកស៊ីងអាស៊ីបានបង្ហាញបន្ទាប់ពីកិច្ចប្រជុំប្រតិភូថា កីឡាឃីកបុកស៊ីងនឹងមាន១០វិញ្ញាសាសម្រាប់ការប្រកួតក្នុងព្រឹត្តិការណ៍«កីឡាក្នុងសាល និងគុនចម្រុះអាស៊ីលើកទី៦ ឆ្នាំ២០២៤ (6th Asian Indoor & Martial Games 2024)។ កីឡាឃីកបុកស៊ីងមាន៣ប្រភេទដែលមាន៧វិញ្ញាសាសម្រាប់បុរស និង៣វិញ្ញាសាសម្រាប់នារី។ តាមការគ្រោងទុក កីឡាឃីកបុកស៊ីងនឹងរៀបចំការប្រកួតនៅសង្វៀន John Paul II Sports Center (ទីលានកីឡាបាល់បោះ)ក្នុងសាកលវិទ្យាល័យ Assumption University។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកិច្ចប្រជុំគណៈប្រតិភូបច្ចេកទេសពីថ្ងៃទី១-៣ ខែមីនា ឆ្នាំ២០២៤ ភាគីកម្ពុជាក៏បានចូលរួមដោយមានលោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជា។

តាមសេចក្តីប្រកាសក្នុងមហាសន្និបាតរបស់គណៈកម្មាធិការជាតិអូឡាំពិកកម្ពុជាកាលពីថ្ងៃទី២ ខែមីនា បង្ហាញថា កម្ពុជាក៏គ្រោងបញ្ជូនប្រតិភូកីឡាទៅចូលរួមប្រកួតកីឡាក្នុងសាល និងយុទ្ធគុនចម្រុះអាស៊ី លើកទី៦ ចាប់ពីថ្ងៃទី២១ ដល់ទី៣០ ខែវិច្ឆិកា ឆ្នាំ២០២៤ នៅទីក្រុងបាំងកក ប្រទេសថៃ។

ក្នុងនេះ កីឡាឃីកបុកស៊ីង ក៏ស្ថិតក្នុងចំណោមកីឡាច្រើនប្រភេទដែលកម្ពុជានឹងបញ្ជូនចូលរួមប្រកួត។ កាលស៊ីហ្គេម ឆ្នាំ២០២៣ កីឡាឃីកបុកស៊ីងរបស់កម្ពុជាក្នុងនាមជាម្ចាស់ផ្ទះទទួលបានមេដាយមាស៦ ប្រាក់១ និងសំរិទ្ធ៦ សុប១៣គ្រឿងស្ថិតនៅចំណាត់ថ្នាក់លេខ១ក្នុងចំណោមប្រទេស៧ចូលរួមប្រកួត។

ប្រទេសថៃក្នុងនាមជាម្ចាស់ផ្ទះកីឡាក្នុងសាល និងយុទ្ធគុនចម្រុះអាស៊ី លើកទី៦ គ្រោងដាក់កីឡា៣០ប្រភេទដែលស្មើនឹង២៩០វិញ្ញាសា៕